28 C
Phnom Penh

សាលាឧទ្ធរណ៍​សម្រេច​តម្កល់​សាល​ក្រម​ផ្ត​ន្ទាទោស​លោក ហេង​ ពៅ​ ពីបទ​ប៉ុន​ប៉ង​មនុស្ស​ឃាត

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ សាលា​ឧទ្ធរណ៍​បាន​តម្កល់​ សាល​ក្រម​សាលា​ដំបូង​​រាជ​ធានី​ដែល​បាន​ផ្តន្ទា​ទោស​លោក ហេង ពៅ អតីត​ស្នង​ការ​នគរ​បាល​រាជ​​ធានី​ភ្នំេពញ​ដែល​​អប​​យស​ពី​បទ​​ប៉ុនប៉ង​សម្លាប់​ចាង​ហ្វាង​កាសែត​ម្នាក់​​​ឲ្យ​ជាប់​ពន្ធនាគារ​រយៈពេល​ប្រាំមួយ​ឆ្នាំ​​។

លោក សេង ស៊ីវុត្ថា ចៅក្រម​ប្រធាន​ក្រុម​ ប្រឹក្សា​ជំនុំ​ជម្រះ​​មាន​ប្រសាសន៍​ថា “តុលាការ ​សម្រេច​តម្កល់​សាល​ក្រម​ផ្ត​ន្ទា​ទោស​លោក​ ហេង ពៅ ដែល​បាន​ប៉ុនប៉ង​​សម្លាប់​លោក ថុង អ៊ុយ​ប៉ាង ចាង​ហ្វាង​កាសែត​កោះ​សន្តិ​ភាព​”។ លោក​បាន​បន្ថែម​ថា លោក ហេង ពៅ គឺ​ជា​ “មេគំនិត” ក្នុង​ការ​រៀប​ចំ​​ផែនការ​សម្លាប់​ចាង​ហ្វាង​កាសែត​រូបនេះ។

កាលពី​ឆ្នាំ​២០០៨ សាលាដំបូង​រាជ​ធានី​ភ្នំពេញ​បាន​ផ្តន្ទាទោស​លោក ហេង​ ពៅ ឲ្យ​ជាប់​ពន្ធនាគារ​រយៈពេល​១៨ឆ្នាំ​ពី​បទ​​ប៉ុន​ប៉ង​សម្លាប់​លោក ថុង អ៊ុយប៉ាង​។​

លោក​ លី រ៉ាស៊ី អតីត​នាយ​នគរបាល​ព្រហ្ម​ទណ្ឌ​កម្រិត​ស្រាល​រាជ​ធានី លោក ផេង ផៃ អតីត​​នាយ​ការិយាល័យ​នគរបាលជន​​បរទេស​​រាជ​ធានី និង​លោក​ ហេង វេង អតីតមន្ត្រី​នគរបាល​នៃនាយក​ដ្ឋាន​ប្រឆាំង​ គ្រឿង​ញៀន​ក៏​ត្រូវ​បាន​ផ្តន្ទាទោស​ឲ្យ​ជាប់​ពន្ធនា​គារ​រយៈ​ពេល​​១៨ឆ្នាំផងដែរ​​ពី​បទ​​​​ជាប់​ពាក់​ព័ន្ធ​​នឹង​ការ​ប៉ុន​ប៉ង​​មនុស្ស​ឃាត​​​នេះ​។

យោង​តាម​លោក​ចៅក្រម​ ស៊ីវុត្ថា បាន​មាន​ប្រសាសន៍​ថា ទោស​ជាប់​ពន្ធនាគារ​របស់​ពួកគាត់ត្រូវ​បាន​កាត់​បន្ថយ​​​ពីរ​ឆ្នាំ​កាលពី​ម្សិលមិញ​បន្ទាប់ពី​សាលា​ឧទ្ធរណ៍សម្រេច​ថា ពួកគាត់​គ្រាន់​តែ​ជា​អ្នក​សម​គំនិត​​​ក្នុង​​ការ​ប៉ុនប៉ង​មនុស្ស​ឃាត​នេះ​ប៉ុណ្ណោះ។

មេធាវី​រ​បស់លោក ហេង​ ពៅ ដែល​ត្រូវ​បាន​ផ្តន្ទាទោស​ឲ្យ​ជាប់​ពន្ធនាគារ​រយៈ​ពេល​ជិត​១០០ឆ្នាំពី​បទ​ល្មើស​ជា​ច្រើន​លើក​​​ទាក់​ទង​ទៅ​នឹង​ពេល​ដែល​លោក​នៅ​ជា​ស្នង​ការ​នគរបាល​រាជធានី​នោះ​ បាន​មាន​ប្រសាសន៍​ថា សេចក្តីសម្រេច​របស់​សាលា​ឧទ្ធរណ៍មិន​យុត​្តិ​ធម៌​ឡើយ។

លោក កៅ ស៊ូផា បាន​មាន​ប្រសា​សន៍​ថា “វា​អយុត្តិ​ធម៌ណាស់​សម្រាប់​កូនក្តី​របស់​ខ្ញុំ ពីព្រោះគាត់​មិន​បាន​ប្រព្រឹត្ត​បទ​ឧក្រិដ្ឋ​ទេ”។ លោក​បាន​បន្ថែម​ថា លោក​នឹង​ពិភាក្សា​ជាមួយ​លោក ហេង ពៅ ថាតើ​ត្រូវ​ដាក់​ពាក្យ​ បណ្តឹង​​សា​​ទុក្ខ​​​​​ទៅ​តុលាការ​កំពូល​ទៀត​​ឬ​​អត់​នោះទេ​​៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស