ក្រុមហ៊ុន ហុងហៀប (ខេមបូឌា) ខូ អិលធីឌី [Hung Hiep (Cambodia) Co., Ltd.] ដែលជា ក្រុមហ៊ុនលក់រថយន្ត Mercedes-Benz ផ្តាច់មុខនៅលើទីផ្សារកម្ពុជាបានផ្អាកការនាំចូលតាំងពីខែមករាមក ដោយសារតែមានពន្ធនាំចូលថ្មីត្រូវបានដាក់ទៅលើរថយន្តទំនើបៗដែលត្រូវបាននាំចូលមកលក់លើទីផ្សារកម្ពុជា។
ក្រុមហ៊ុននាំចូលរថយន្តទំនើបៗដទៃទៀតដូចជា ក្រុមហ៊ុន Porsche Audi BMW និងក្រុមហ៊ុន Jaguar Land Rover បានឲ្យដឹងផងដែរថា តាំងពីដើមឆ្នាំមក បន្ទាប់ពីមានសេចក្តីប្រកាសសម្រាប់មន្ត្រីគយកាលពីខែធ្នូឆ្នាំមុន អគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ចនិងហិរញ្ញវត្ថុ បានដំឡើងពន្ធ២០ភាគរយលើរថយន្តទំនើបថ្មីៗ ដែលភាគច្រើនត្រូវបាននាំចូលពីតំបន់អឺរ៉ុប។
លោក ពីលី វ៉ុង (Pily Wong) ប្រធាននាយក ប្រតិបត្តិក្រុមហ៊ុន ហុងហៀប បានលើកឡើង ថា ថ្លៃដើមកើនឡើងលើរថយន្តថ្មី បន្ទាប់ពីរដ្ឋាភិបាលបានដំឡើងពន្ធបែបនេះបានបង្ខំ ឲ្យលោកឈប់នាំចូលរថយន្ត ដើម្បីចៀស វាងការដំឡើងថ្លៃរថយន្តនៅលើទីផ្សារ។ លោកបានមានប្រសាសន៍ថា “ ខ្ញុំបានបញ្ឈប់សកម្មភាពនាំចូលរថយន្តហើយនាពេលនេះ ដោយសារតែបទបញ្ញត្តិថ្មីនេះ”។
លោក វ៉ុង ដែលក៏ជាប្រធានសហព័ន្ធឧស្សាហកម្មយានយន្តកម្ពុជា (CAIF) ផងដែរនោះ បានលើកឡើងបន្ថែមទៀតថា សហព័ន្ធនេះបានជួបពិភាក្សាជាមួយលោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម ដើម្បីជំរុញឲ្យរដ្ឋាភិបាលពិចារណាឡើងវិញអំពីគោលនយោបាយដំឡើងអត្រាពន្ធនេះ។ លោកបានមានប្រសាសន៍បន្ថែមទៀតថា “ខ្ញុំកំពុងតែរង់ចាំលទ្ធផលនៃកិច្ចពិភាក្សារបស់យើងជាមួយរដ្ឋាភិបាល”។
សេចក្តីប្រកាសចុះថ្ងៃទី២៤ ខែធ្នូ ទទួលបានពីអគ្គនាយកដ្ឋានគយ និងរដ្ឋាករ ដែលត្រូវបានចុះហត្ថលេខាដោយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានបង្ហាញពីរបៀបដែលមន្ត្រីផ្នែកនាំចូលប្រើប្រាស់ក្នុងការកំណត់តម្លៃរថយន្តដែលត្រូវបាននាំចូលមកលក់លើទីផ្សារកម្ពុជា។
សេចក្តីប្រកាសដដែលមានខ្លឹមសារថា សម្រាប់រថយន្តទំនើបថ្មីៗ ដូចជា BMW Mercedes Audi និងរថយន្តទំនើបៗផ្សេងៗទៀត អត្រាពន្ធគយមានយ៉ាងតិច២០ភាគរយលើតារាងពន្ធគយ”។
សេចក្តីប្រកាសនេះមានខ្លឹមសារបន្ថែមទៀតថា “សម្រាប់រថយន្តចិន ដែលត្រូវបានផលិតនៅប្រទេសចិន អត្រាពន្ធគយអាចមានតិចជាងអត្រាក្នុងតារាងនេះ៦០ភាគរយ”។ គួរបញ្ជាក់ថា តារាងនេះគឺជាតារាងពន្ធគយដែលបង្ហាញអត្រាលម្អិតសម្រាប់រថយន្តឆ្នាំជាក់លាក់ណាមួយ និងសមត្ថភាពម៉ាស៊ីន។
លោក ភីតធើ ប្រុនហ្គើ (Peter Brongers) ប្រធាននាយកប្រតិបត្តិក្រុមហ៊ុន BMW Cambodia បានត្អូញត្អែរថា សេចក្តីប្រកាសនេះបានផ្តល់អត្ថប្រយោជន៍មិនយុត្តិធម៌ ដល់ក្រុមហ៊ុនផលិតរថយន្តចិន ក្នុងពេលដែលរថយន្តទំនើបៗមកពីលោកខាងលិចទើបតែបានចូលមកបង្ហាញវត្តមាននៅលើទីផ្សារកម្ពុជា។
លោកបានមានប្រសាសន៍ថា “ពួកគេកំពុងផ្តោតលើរថយន្តម៉ាកល្បី។ រថយន្តរបស់យើងបានប្រឈមនឹងថ្លៃដើមនាំចូលកើនឡើងគួរឲ្យកត់សម្គាល់ ហើយកំណើននេះបានប៉ះពាល់ដល់បរិមាណលក់របស់យើង ខណៈដែលរថយន្តដទៃជាច្រើនទៀតមិនបានរងផលប៉ះពាល់ទាល់តែសោះ”។ លោក ប្រុនហ្គើ បានលើកឡើងបន្ថែមទៀតថា ការដាក់ពន្ធលើម៉ាកសញ្ញារថយន្ត ជាជាងម៉ូឌែល នឹងអនុញ្ញាតឲ្យក្រុមហ៊ុនលក់រថយន្តមិនមែនទំនើប ដូចជា រថយន្ត Land Cruiser របស់ក្រុមហ៊ុនតូយ៉ូតាជាដើម មានឱកាសគេចផុតពីការបង់ពន្ធក្នុងអត្រាខ្ពស់ជាងមុន។
លោក លី ប៊ុនហៃ អ្នកគ្រប់គ្រងទូទៅក្រុមហ៊ុន តូយ៉ូតា (ខេមបូឌា) ខូ អិលធីឌី [Toyota (Cambodia) Co., Ltd.] បានលើកឡើងថា លោកមិនបានឃើញមានការប្រែប្រួលចំពោះពន្ធនាំចូលលើរថយន្តរបស់ក្រុមហ៊ុនលោកទេ។ លោកបានមានប្រសាសន៍ថា “យើងមិនមែនជាក្រុមហ៊ុនលក់រថយន្តម៉ាកទំនើបទេ ហើយយើងក៏មិននាំចូលរថយន្តទំនើបដែរ”។
លោក ពាង ម៉ាន់ ប្រធាននាយកប្រតិបត្តិក្រុមហ៊ុន យានដ្ឋានពិភពលោក (Worldwide Garage) ដែលនាំចូលរថយន្ត Great Wall ពីប្រទេសចិន បានលើកឡើងថា រដ្ឋាភិបាលកំពុងលើកទឹកចិត្តឲ្យមានការនាំចូលរថយន្ត ចិន ដោយសារតែទំនាក់ទំនងរវាងប្រទេសទាំងពីរមានភាពរឹងមាំ។
ទោះជាយ៉ាងណា លោកបានលើកឡើងបន្តទៀតថា រថយន្ត Great Wall បានជួបការលំបាកក្នុងការប្រកួតប្រជែងនៅលើទីផ្សាររថយន្តក្នុងប្រទេសកម្ពុជា។
លោកបានមានប្រសាសន៍ថា “តាំងពីបានមកដល់ក្នុងឆ្នាំ២០១០ យើងបាននិងកំពុងជួបការលំបាកក្នុងការលក់រថយន្តដ៏ច្រើនរបស់យើង ក៏ប៉ុន្តែ គោលនយោបាយលើកទឹកចិត្តផ្នែកពាណិជ្ជកម្មដែលរដ្ឋាភិបាលកំពុងដាក់ចេញ និងអនុវត្ត ប្រហែលជាផ្តល់កម្លាំងបន្ថែមដល់យើងក្នុងការប្រកួតប្រជែង”។ លោកបានលើកឡើងបន្ថែមទៀតថា ក្រុមហ៊ុនរបស់លោកមិនទាន់ឃើញថ្លៃដើមនាំចូលធ្លាក់ចុះទេ តាំងពីមានសេចក្តីប្រកាសក្នុងខែធ្នូ ឆ្នាំមុនមក។
លោក ប៊ូ ប៊ុនណារ៉ា ប្រធានផ្នែកទំនាក់ទំនងសាធារណៈនៃអគ្គនាយកដ្ឋានគយ និងរដ្ឋាករ បានលើកឡើងថា សេចក្តីប្រកាសអំពីពន្ធគយនេះត្រូវបានបកស្រាយខុស ហើយប្រព័ន្ធពន្ធដារសម្រាប់រថយន្តនាំចូលមិនមានការប្រែប្រួលទេក្នុងរយៈពេល១០ឆ្នាំកន្លងមកនេះ។ លោកបានបន្ថែមថា មូលហេតុនៅក្នុងសេចក្តីប្រកាសទាក់ទងនឹងអត្រាពន្ធគយខ្ពស់ជាងមុនលើម៉ាករថយន្តទំនើប មិនមែនមានន័យថា ពន្ធកើនឡើងទេ ក៏ប៉ុន្តែ ជាឧបករណ៍បង្ហាញផ្លូវសម្រាប់មន្ត្រីគយក្នុងការកំណត់តម្លៃរថយន្តនាំចូលឲ្យបានត្រឹមត្រូវ។
លោក ប៊ុនណារ៉ា បានឲ្យដឹងថា ប្រសិនបើរថយន្តទំនើបថ្មីមួយគ្រឿងត្រូវបាននាំចូល មន្ត្រីគយក៏ត្រូវដឹងថា តម្លៃប្រកាសសម្រាប់រថយន្តនោះមាន២០ភាគរយខ្ពស់ជាងរថយន្តមិនមែនទំនើប។ លោកបានបន្ថែមថា ប្រសិនបើតម្លៃប្រកាសលើរថយន្តនោះ មានទាបជាងនេះ មន្ត្រីគយមានសិទ្ធិដាក់ពន្ធសមស្របណាមួយ។ លោក ប៊ុនណារ៉ា បានមានប្រសាសន៍បន្ថែមទៀតថា “ក្រុមហ៊ុនគ្មានដឹងអំពីប្រព័ន្ធពន្ធគយទេ។ ជួនកាលពួកគេដំឡើងថ្លៃដើម្បីឆ្លៀតយកផលចំណេញខ្ពស់ពីអ្នកទិញ ហើយក្រោយមកក៏បែរជាបន្ទោសគយទៅវិញ”៕សុធា