36 C
Phnom Penh

កាកបាទក្រហមកម្ពុជា​សាងសង់​សណ្ឋាគារ​ប្រណីត​កម្ពស់​ប្រាំ​មួយ​ជាន់​នៅ​ក្នុង​ខេត្ត​ព្រះ​វិហារ​

ដោយ ឌឹ ខេមបូឌា ដេលី

បទវិភាគ

កាកបាទក្រហមកម្ពុជា ​ដែល​​ចាត់​ទុកខ្លួន​ឯងថា​​ជា​អង្គការ​មនុស្ស​​ធ​ម៌​​​ធ​ំបំផុត​​​នៅក្នុង​ប្រទេសកម្ពុជា​​ កំពុងសាងសង់​សណ្ឋាគារ​ប្រណីត​មួយ​ដែល​មានកម្ពស់​​ប្រាំមួ​យ​​ជាន់​​​នៅក្នុង​ក្រុង​ព្រះ​វិហារ​។

ក្រុម​​​មន្ត្រី​រដ្ឋាភិបាល​​​បា​ន​ឲ្យ​ដឹង​កា​ល​​ពី​ម្សិល​មិញថា ​សណ្ឋាគារ​​នេះ​​​នឹង​​ត្រូវ​​ប្រើ​ដើម្បី​​រក​ប្រាក់​ចំណូល​​ឲ្យកាក​បាទ​ក្រហម​កម្ពុជា​។ សណ្ឋាគារ​​នេះ​កំពុងតែ​​​ត្រូវ​បាន​​សាងសង់​​​ដោយសាខា​កាកបាទ​ក្រហម​រាជ​ធានី​ភ្នំពេញ​និងព្រះ​វិហារ​​របស់​​កាកបាទ​ក្រហម​កម្ពុជា។ លោកស្រី ប៊ុន រ៉ានី ​ភរិយា​​​របស់​លោក​​​​នាយក​រដ្ឋមន្ត្រី ហ៊ុន សែន ​ជា​ប្រ​ធាន​កាក​បាទ​​ក្រហម​កម្ពុជា​​​ចាប់​​តាំងពី​​​ឆ្នាំ​១៩៩៨​មក។

លោក អ៊ុយ សំអាត ​នាយក​​ទទួល​​បន្ទុក​ដោះ​ស្រាយ​​​គ្រោះ​​មហន្តរាយ​​នៅ​​កាកបាទ​ក្រហមកម្ពុជា ​​បានមាន​ប្រសាសន៍ថា “ ​​គំនិត​ផ្តួច​ផ្តើមនេះគឺកើតចេញ​ពី​​លោក​ បា៉ សុជាតិ​វង្ស ​​អភិបាល​រាជធានីភ្នំពេញ​ និងសមាជិក​​​ផ្សេងទៀត​​​ក្នុង​ក្រុមរបស់​លោក​”។

លោកបាន​មាន​ប្រសាសន៍ថា “ប្រាក់នេះ​​គឺបាន​មក​ពី​មនុស្ស​មួយក្រុម​​ដឹកនាំ​​ដោយ​លោក ប៉ា សុជាតិ​វង្ស ​​ហើ​យពួកគេ​​បាន​​រួមគ្នា​​សាងសង់​​សណ្ឋាគារ​នេះ ​ដើម្បី​​ទទួល​​ភ្ញៀវ​​​ទេសចរ​ទៅ​កាន់ប្រាសាទ​ព្រះ​វិហារ​”។

លោក​បាន​​បដិសេធ​​​មិ​នបរិយាយលម្អិត​អំពី​​​ការ​​ចំ​ណាយ​​​ឬ​ប្រាក់​ចំ​ណូល​រំពឹង​​​ទុក​​​​​​ពីសណ្ឋាគារ​ ដែល​​កំពុង​​​ត្រូវ​បាន​សាងសង់​​​នៅ​ចម្ងាយ​៧៥​គីឡូម៉ែត្រ​ភាគ​​​ខាង​ត្បូ​ង​ប្រទេស​ឡាវ។

លោក ប៉ា ​សុជាតិ​វង្ស ​​ដែល​ដឹកនាំ​សាខា​កាកបាទ​​ក្រហម​​​រាជ​​ធានីភ្នំពេញ​​​​របស់​កាក​បាទ​​​​​​​​​​​​​ក្រហម​កម្ពុជា ​បា​ន​​បដិសេធ​មិនធ្វើ​​អត្ថា​​ធិប្បាយ​​​អំពីសណ្ឋាគារ​នេះ​​​កាល​​ពីម្សិលមិញ។​

លោកស្រី ​ជឿក ហេង ប្រធាន​ការិយា​​​ល័យ​​​​​​​​​​​​កាក​បាទក្រហម​​​កម្ពុជា​​​​ខេត្តព្រះ​វិហារ​ក៏​មិន​ហា៊ន​​​ផ្តល់​សេចក្តីលម្អិត​​​ពី​គម្រោង​​នេះ​​​ដែរ។ លោក​ស្រី​បាន​មាន​ប្រសាសន៍​ថា “សកម្ម​​ ភាព​​សាង​សង់​បាន​ចាប់​ផ្តើម​នៅ​ឆ្នាំ​២០១៣​។ ​យើង​កំពុង​តែសាងសង់​សណ្ឋាគារ​ ដើម្បី​រក​ចំណូល​ជួយ​ទ្រទ្រង់​សាខា​កាកបាទ​ក្រហម​​នៅ​​​​​​តាម​ខេត្ត​ និង​ដើម្បី​បន្ត​គាំទ្រ​សកម្ម​ភាព​កម្ម​​​វិធី​​​​មនុស្ស​ធម៌​របស់​យើង​”។

លោកស្រី​ ហេង បាន​ឲ្យ​ដឹង​ទៀត​ថា អគារ​នេះ​បាន​បញ្ចប់​ការ​សាង​សង់​៦០ភាគ​រយ​ហើយ​ ក៏​ប៉ុន្តែ លោកស្រី​បាន​បដិសេធ​មិន​ប្រាប់​ថា តើ​អ្នក​ណា​បាន​ទទួល​កិច្ច​សន្យា​សាង​សង់​អគារ​សណ្ឋាគារ​នេះ។

លោក​ អាន​ឌ្រា អាសឺប៊ីស (Andrea Acerbis) ប្រធាន​គណៈកម្មាធិកា​រ​អន្តរជាតិ​នៃ​កាក​​​បាទ​ក្រហម​នៅ​កម្ពុជា​ បាន​លើក​ឡើង​ថា វា​មិន​មែន​ជា​រឿង​ប្លែក​ទេ​ដែល​សាខា​កាក​​​បាទ​​​​ក្រហម​នៅ​​​​​​​មូលដ្ឋាន​បង្កើត​មុខ​របប​ដើម្បី​រក​ចំណូល​។

លោក អាសឺប៊ីស បាន​មាន​ប្រសាសន៍​ថា “ខ្ញុំ​បាន​ឃើញ​រឿង​បែប​នេះ​នៅ​ក្នុងប្រទេស​ផ្សេងៗទៀត​ ដែល​កាកបាទ​ក្រហម​សាង​សង់​ផ្ទះ​សំណាក់​ ឬ​ក៏​អ្វី​ផ្សេង​ទៀត​ ដើម្បីទ្រទ្រង់​ប្រតិបត្តិការ​របស់​ខ្លួន​”។

ទោះ​ជា​យ៉ាង​ណា​លោក ឡោ ចាន់ អ្នក​សម្រប​សម្រួល​អង្គការ​សិទ្ធិ​មនុស្សអាដហុក ប្រចាំ​ខេត្ត​ព្រះ​វិហារ​ បាន​មាន​លើក​ឡើង​ពី​កត្តា​ជំរុញ​ផ្សេងទៀត​នៅ​ពី​ក្រោយ​គម្រោង​សាង​សង់​សណ្ឋាគារ​នេះ​ ក្រោម​ឈ្មោះ​កាក​​​បាទ​ក្រហម​។

លោក​ ឡោ ចាន់ បាន​មាន​ប្រសា​​​ស​ន៍​ថា “ពួក​គេ​ប្រហែល​ជា​សាងសង់​សណ្ឋាគារ​នេះ​ដោយ​ប្រើ​ឈ្មោះ​កាកបាទ​ក្រហម​ ដើម្បី​គេច​វេស​ពីការ​បង់​ពន្ធ​ជូន​រដ្ឋ​”។ លោក​បាន​មាន​ប្រសាសន៍​បន្ថែម​ទៀត​ថា “ខណៈ​ដែល​កាកបាទ​ក្រហម​កម្ពុជា​ចំណាយ​ប្រាក់​រាប់​លាន​ដុល្លារ​ទៅ​សាង​សង់​សណ្ឋាគារ​​មាន​ប្រជាជន​យ៉ាង​ច្រើន​​​ក្នុង​ប្រទេស​កម្ពុជា​ ត្រូវ​ការ​ជំនួយ​មនុស្ស​ធម៌​”។

កាកបាទ​ក្រហម​កម្ពុជា​ដែល​មាន​សាខា​នៅ​២៤ខេត្ត​-ក្រុង ត្រូវ​បាន​គេ​ដឹង​យ៉ាងទូលំ​ទូលាយ​ថា ជា​សេនា​ធិការ​របស់​គណបក្ស​ប្រ​ជាជន​កម្ពុជា។

លោកស្រី​ ប៊ុន ​រ៉ានី​ ដែល​ជា​ប្រធាន​កាក​​​បាទ​​​​​​​​​​ក្រហម​កម្ពុជា​ បាន​ប្រើ​ឋានៈ​របស់​លោក​ស្រី​កាលពី​ឆ្នាំ​មុន ក្នុង​ការ​ថ្លែង​សុន្ទរកថា​​​ទាក់​​​​​​​ទង​ នឹង​រឿង​នយោបាយអំឡុង​ពេល​លោក​​​ស្រី ចុះ​ទៅ​ផ្តល់​ជំនួយ​ដល់​ជន​រង​គ្រោះ​ដោយ​សារ​ទឹក​ជំនន់​នៅ​ខេត្ត​បៃលិន។ នៅពេល​នោះ​លោកស្រី ប៊ុន រ៉ានី ​លើក​​ឡើង​​​​​​​ថា គណបក្ស​ប្រជាជន​កម្ពុជា ជា​គណ​​​បក្ស​​​​នយោបាយ​តែ​មួយ​គត់​ដែល​ជន​រង​គ្រោះ​​​​​​​ដោយ​សារ​​ទឹក​ជំនន់ ពឹង​អាស្រ័យ​បាន។

លោកស្រី​បាន​មាន​ប្រសាសន៍​ថា “ នៅ​ពេល​​មាន​ទឹក​ជំនន់​ ឬ​ក៏​មាន​រឿង​អ្វី​កើត​ឡើង​ពុក​ម៉ែបង​ប្អូន​ឃើញ​ថា មិន​មាន​គណបក្ស​ណា​ផ្សេង​មក​ជួយ​បង​ប្អូន​នៅ​ទី​នេះ​ទេ។ មាន​តែ​គណបក្ស​ប្រជាជន​តែ​ប៉ុណ្ណោះ​ ពីព្រោះ​មន្ត្រី​រាជការ​ទាំង​អស់​ជា​សមាជិក​គណបក្ស​ប្រជា​ជន​កម្ពុជា​”។

កាលពី​ខែ​ឧសភាឆ្នាំ​មុន ពោល​គឺ​រយៈ​ពេល​បី​ខែ​មុន​ពេល​បោះ​ឆ្នោត​ជ្រើស​តាំង​តំណាង​រាស្ត្រ អ្នក​នយោបាយ​ និង​អ្នក​ជំនួញ​ធំ​ៗ​នៅ​ក្នុង​ប្រទេស​កម្ពុជា​ បាន​ចូលរួម​ទិវា​កាកបាទ​ក្រហម​ពិភពលោក ដោយ​ផ្តល់​អំណោយ​ជា​ប្រាក់​១៤លាន​ដុល្លារ​ដល់​កាក​​​បាទ​ក្រហម​កម្ពុជា​ នេះ​បើ​យោង​តាម​ប្រភព​ក្នុង​ស្រុក​មួយ​៕សុធា

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស