ក្រុមមន្ត្រីបានលើកឡើងកាលពីម្សិលមិញថា មន្ទីរសង្គមកិច្ចរាជធានីភ្នំពេញបានស្នើឲ្យសាលារាជធានីភ្នំពេញប្រើអគារមួយក្នុងខណ្ឌពោធិ៍សែនជ័យ ជាមណ្ឌលសំចតបណ្តោះអាសន្នទូទាំងរាជធានីថ្មីមួយសម្រាប់អ្នកគ្មានផ្ទះសម្បែងស្នាក់នៅ និងអ្នកសុំទាន រួមទាំងកុមារ។
លោក ភី ចន្ថា អនុប្រធានមន្ទីរសង្គមកិច្ចបានមានប្រសាសន៍ថា មណ្ឌលនេះនឹងជាទីកន្លែងបណ្តោះអាសន្នសម្រាប់អ្នកសុំទាន និងអ្នកគ្មានផ្ទះសម្បែងទាំងអស់ក្នុងកិច្ចប្រឹងប្រែងដើម្បីកាត់បន្ថយការសុំទាន និងធ្វើឲ្យរាជធានីភ្នំពេញកាន់តែមានភាពទាក់ទាញ។
លោកបានមានប្រសាសន៍ថា “យើងត្រូវការការអនុញ្ញាតឲ្យសាលារាជធានីប្រើអគារនេះនៅក្នុងខណ្ឌពោធិ៍សែនជ័យ និងប្រមូលអ្នកសុំទាន”។
មជ្ឈមណ្ឌលបណ្តុះបណ្តាលពោធិ៍សែនជ័យ ក្នុងសង្កាត់ចោមចៅ បច្ចុប្បន្ននេះត្រូវបានប្រើជាមណ្ឌលកុមារកំព្រារបស់រដ្ឋជាទីដែលអ្នកគ្មានលំនៅដ្ឋានស្នាក់នៅម្ដងម្កាល នេះបើយោងតាមលោក សន សុផល នាយក មន្ទីរសង្គមកិច្ចរាជធានីភ្នំពេញ។
លោក សុផល បានឲ្យដឹងថា លោកបានស្នើឲ្យសាលារាជធានីអនុញ្ញាតឲ្យមានការប្រើអគារនេះសម្រាប់អ្នកសុំទានមកពីខណ្ឌចំនួនប្រាំបួនក្នុងរាជធានីភ្នំពេញ។
លោក សុផល បានឲ្យដឹងថា “យើងបានប្រមូលពួកគាត់[អ្នកសុំទាន]ពីមុនមក ហើយរក្សាពួកគាត់នៅក្នុងអគារតូចមួយ ប៉ុន្តែអង្គការសង្គមស៊ីវិលចោទយើងថា ទុកពួកគាត់នៅនឹងកន្លែងតូចពេក”។ លោកបានបន្ថែមថា ការបណ្ដុះបណ្ដាលវិជ្ជាជីវៈនេះគួរតែឲ្យនៅក្នុងអគារថ្មីនេះ។ លោកបានឲ្យដឹងបន្តថា បន្ទាប់ពីការអប់រំឡើងវិញ និងការបណ្ដុះបណ្ដាលវិជ្ជាជីវៈរយៈពេលជាច្រើនថ្ងៃ អ្នកសុំទាននឹងត្រូវត្រឡប់ទៅផ្ទះវិញ។
អង្គការសិទ្ធិមនុស្សបានរាយការណ៍អំពីការរំលោភផ្លូវភេទក្នុងមជ្ឈមណ្ឌលសង្គមកិច្ចបែបេនះ។ ពួកគេលើកឡើងថា ស្ថានភាពបែបនេះមិនល្អឡើយ ហើយថា ការបណ្ដុះបណ្ដាលវិជ្ជាជីវៈកម្រមានណាស់។
មុនពេលមេដឹកនាំបរទេសមកធ្វើទស្សនកិច្ចនៅកម្ពុជា ក៏ដូចជាមុនពេលព្រឹត្តិការណ៍អន្តរជាតិធំៗកើតឡើង ដូចជាកិច្ចប្រជុំកំពូលអាស៊ានឆ្នាំ២០១២ជាដើមនោះ សាលារាជធានីភ្នំពេញ បានរៀបចំកែលម្អ និងឲ្យប្រជាជននៅតាមដងផ្លូវចាកចេញពីទីនោះ។
លោក ចាន់ថា បានឲ្យដឹងថា លោកមិនដឹងថា មានអ្នកសុំទានប៉ុន្មាននាក់នៅក្នុងរាជធានីភ្នំពេញទេ ក៏ប៉ុន្តែ លោកបានលើកឡើងថា ចំនួនប្រជាជននៅតាមដងផ្លូវទំនងជាកើនឡើងក្នុងរយៈពេលប៉ុន្មានសប្តាហ៍មុនពេលពិធីបុណ្យចូលឆ្នាំប្រពៃណីជាតិខ្មែរមកដល់។
លោកបានលើកឡើងបន្តថា អ្នកសុំទានភាគច្រើនពិតជាមិនមានលំនៅដ្ឋានស្នាក់នៅទេ ក៏ប៉ុន្តែ ជាផ្នែកមួយនៃបណ្តាញដែលត្រូវបានរៀបចំឡើង។ លោកបានមានប្រសាសន៍ថា “គេប្រាប់ខ្ញុំថា អ្នកសុំទានកំពុងត្រូវបានដាក់ពង្រាយនៅគ្រប់ទីកន្លែងក្នុងទីក្រុង ដើម្បីបំពេញកិច្ចការសុំទាន”។
លោក ចាន់ សុវ៉េត មន្ត្រីស៊ើបអង្កេតអង្គការសិទ្ធិមនុស្សអាដហុក បានលើកឡើងថា នេះគឺជាតួនាទីរបស់រដ្ឋាភិបាលគឺមិនមែនត្រឹមតែប្រមូលអ្នកសុំទាន និងដោះលែងពួកគាត់ប៉ុន្មានថ្ងៃក្រោយមកប៉ុណ្ណោះទេ ប៉ុន្តែ ថែមទាំងផ្តល់ការងារ និងជំនាញឲ្យពួកគាត់ទៀតផង ដើម្បីកុំឲ្យពួកគាត់មកធ្វើសកម្មភាពនៅតាមដងផ្លូវទៀតផងដែរ។
លោកមានប្រសាសន៍ថា “ប្រសិនបើពួកគេចាប់ពួកគាត់ ទុកពួកគាត់ និងដោះលែងពួកគាត់ដោយមិនផ្តល់ការបណ្តុះបណ្តាល ឬក៏រកការងារឲ្យពួកគាត់ធ្វើ ពួកគាត់នឹងត្រឡប់មកសុំទានទៀតជាមិនខាន៕ ប៊ុននី