គណៈកម្មាធិការជាតិគ្រប់គ្រងគ្រោះមហន្តរាយបាននិយាយកាលពីម្សិលមិញថា ខ្លួនត្រូវការមូលនិធិ២១៧លានដុល្លារបន្ថែមទៀតពីម្ចាស់ជំនួយនិងអង្គការក្រៅរដ្ឋាភិបាលនានា ដើម្បីជួយដល់កិច្ចប្រឹងប្រែងស្ដារឡើងវិញក្រោយទឹកជំនន់កាលពីខែកញ្ញា និងខែតុលា ឆ្នាំ២០១៣។
នៅពេលបញ្ចេញរបាយការណ៍ស្ដីពីប្រសិទ្ធភាពនៃការឆ្លើយតបទៅនឹងគ្រោះទឹកជំនន់កាលពីឆ្នាំមុន អនុប្រធានគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា ពេលនេះនៅខ្វះមូលនិធិច្រើននៅឡើយសម្រាប់ការស្ដារឡើងវិញក្រោយទឹកជំនន់។
លោក ញឹម វណ្ណដា អនុប្រធានគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា “យើងសូមអំពាវនាវដល់បណ្ដាដៃគូអភិវឌ្ឍន៍របស់យើងសូមជួយផ្ដល់មូលនិធិបន្ថែមទៀត។ យើងសូមអំពាវនាវដល់អង្គការជាតិ និងអន្តរជាតិ និងសង្គមសីុវិល សូមជួយផ្ដល់ជំនួយហិរញ្ញវត្ថុ និងបច្ចេកទេស”។
ឯកសារមួយអមរបាយការណ៍វាយតម្លៃស្ដីពីតម្រូវការស្ដារឡើងវិញក្រោយទឹកជំនន់ ដែលរៀបរៀងដោយរដ្ឋាភិបាលដោយមានជំនួយពីកម្មវិធីអភិវឌ្ឍន៍របស់អង្គការសហប្រជាជាតិ ហៅកាត់ UNDP បង្ហាញថា រដ្ឋាភិបាលទទួលបានមូលនិធិតែ៨៨,០១លានដុល្លារប៉ុណ្ណោះក្នុងចំណោមមូលនិធិ៣០៦លានដុល្លារ ដែលខ្លួនត្រូវការសម្រាប់កិច្ចប្រឹងប្រែងស្ដារឡើងវិញ។
លោក ញឹម វណ្ណដា មិនបានបញ្ជាក់ថា មូលនិធិបន្ថែមនឹងត្រូវប្រើប្រាស់ទៅលើអ្វីឲ្យចំៗនោះទេ ប៉ុន្តែឯកសារនេះបញ្ជាក់ថា ត្រូវការមូលនិធិសម្រាប់ស្ដារ “ហេដ្ឋារចនាសម្ព័ន្ធ” “វិស័យសេដ្ឋកិច្ច” និង “វិស័យសង្គម”។
ឯកសារនេះក៏បានបញ្ជាក់ដែរថា រដ្ឋាភិបាលបានផ្ដល់ជំនួយមនុស្សធម៌ភ្លាមៗចំនួន៥,១៤លានដុល្លារ បន្ទាប់ពីទឹកជំនន់ រីឯអង្គការក្រៅរដ្ឋាភិបាលនិងម្ចាស់ជំនួយផ្សេងៗបានផ្ដល់១,៣លានដុល្លារបន្ថែមទៀត។
យោងតាមតួលេខរបស់គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ប្រជាជននៅតាមផ្ទះជាង៣១.០០០ខ្នងត្រូវបានជម្លៀសចេញ ប្រជាពលរដ្ឋ១៦៨នាក់បានបាត់បង់ជីវិត ហើយការខាតបង់ដោយសារទឹកជំនន់នៅក្នុងខែកញ្ញា និងខែតុលា សរុបជាទឹកប្រាក់មានចំនួន៣៥៦លានដុល្លារ។
លោក ណាប៉ូឡេអុង ណាវ៉ារ៉ូ (Napoleon Navarro) អនុប្រធាន UNDP ប្រចាំប្រទេសកម្ពុជាបានមានប្រសាសន៍ថា ជាញឹកញាប់ ការងាររបស់គណៈកម្មាធិការជាតិគ្រប់គ្រងគ្រោះមហន្តរាយត្រូវរាំងស្ទះដោយសារការលំបាកក្នុងការសម្របសម្រួលរវាងក្រសួងផ្សេងគ្នាជាច្រើន។
លោកបានមានប្រសាសន៍ទៀតថា “តួនាទីរបស់គណៈកម្មាធិការជាតិគ្រប់គ្រងគ្រោះមហន្តរាយគឺត្រូវដាក់ក្រសួងណាឲ្យចំទៅនឹងការដោះស្រាយគ្រោះមហន្តរាយ។ គណៈកម្មាធិការជាតិគ្រប់គ្រងគ្រោះមហន្តរាយគ្មានថវិកានិងគ្មានធនធានទេ ហើយក្រសួងភាគច្រើនមិនទាន់យល់ពីតម្លៃនៃការកាត់បន្ថយហានិភ័យគ្រោះមហន្តរាយនៅឡើយទេ”។
លោកបានលើកឡើងបន្ថែមទៀតថា “ឧទាហរណ៍ដូចជាទឹកស្អាតជាដើម គឺជាបញ្ហាមួយក្នុងចំណោមបញ្ហាធំៗបំផុតនៅទីនេះ។ គណៈកម្មាធិការជាតិគ្រប់គ្រងគ្រោះមហន្តរាយអាចលើកសំណើឲ្យចាត់វិធានការបានតែនៅពេលមានគ្រោះមហន្តរាយប៉ុណ្ណោះ ប៉ុន្តែថវិកាគឺស្ថិតនៅឯក្រសួងធនធានទឹក និងឧតុនិយម”៕ សុខុម