38.8 C
Phnom Penh

រដ្ឋាភិបាល​ទំនង​ជា​មិន​អាច​សម្រេច​គោលដៅកាត់​បន្ថយ​ការ​ស្លាប់​ដោយ​សារ​គ្រោះថ្នាក់​ចរាចរណ៍​​ឆ្នាំ​២០២០

ដោយ ឌឹ ខេមបូឌា ដេលី

បទវិភាគ

អ្នក​ជំនាញ​ខាង​សុវត្ថិភាព​ផ្លូវ​គោក​បាន​លើក​ឡើង​នៅ​ក្នុង​វេទិកាមួយ​ កាល​ពី​ម្សិល​មិញ​ថា ប្រសិន​បើ​រដ្ឋាភិបាល​មិន​ខិតខំ​បន្ថែម​ដើម្បី​ផាកពិន័យ​អ្នក​រំលោភ​បំពាន​ច្បាប់​ចរា​ចរណ៍​ទេ​នោះ​ គោលដៅ​ដែល​ចង់​កាត់​បន្ថយ​​អ្នក​ស្លាប់​ដោយ​សារ​គ្រោះ​ថ្នាក់​ចរាចរណ៍​ឲ្យ​បាន​២០​ភាគរយ​ និង​ការ​ស្លាប់​ដោយសារ​បើក​បរ​ពេល​ស្រវឹង​ឲ្យបាន​៥០​ភាគរយ​នៅ​ត្រឹម​ឆ្នាំ​២០២០​​ គឺ​មិន​អាច​ទៅ​រួចឡើយ​។ 

យោង​តាម​តួលេខ​របស់​រដ្ឋាភិបាល​បាន​ឲ្យ​ដឹង​ថា អ្នក​ស្លាប់​ដោយ​សារ​គ្រោះ​ថ្នាក់​ចរា​ចរណ៍​កាល​ពី​ឆ្នាំ​មុនមាន​ចំនួន​១.៩១០​នាក់​។​ តួលេខ​នេះ​ គឺ​មិន​សូវ​ជា​ប្រែ​ប្រួល​ឡើយ​​នៅ​ក្នុង​ប៉ុន្មាន​ឆ្នាំ​ថ្មីៗ​នេះ​។

លោក​ អៀ​ ចរិយា​​ ប្រធាន​គ្រប់​គ្រង​កម្មវិធី​សុវត្ថិភាព​ផ្លូវ​គោក​នៅ​អង្គការ​ជន​ពិការ Handicap International Cambodia ជា​អង្គការ​មួយ​ក្នុង​ចំណោម​អង្គការ​សង្គម​ស៊ីវិល​ចំនួន​៧០​​ ដែល​បាន​ចូល​រួម​នៅ​ក្នុង​វេទិកា​នេះ​ដែរ​​ បាន​លើក​ឡើង​ថា​ គោល​នយោបាយ​ជាតិ​ឆ្នាំ​២០១៤​របស់​រដ្ឋា​ភិបាលស្តី​អំពី​សុវត្ថិភាព​ផ្លូវ​គោក​មិន​មាន​មូល​និធិ​គ្រប់​គ្រាន់​ដើម្បី​​ធ្វើ​ឲ្យគោល​នយោ​​បាយ​នេះ​ទទួល​បាន​ជោគ​ជ័យនោះ​ទេ​។​

លោក​ ចរិយា​ បាន​​មាន​ប្រសាសន៍​ទាក់​ទិន​នឹង​ការ​ចំណាយរបស់​រដ្ឋាភិបាលដើម្បី​​ធ្វើ​ឲ្យ​ចំនួន​អ្នក​ស្លាប់​ដោយ​​​សារ​គ្រោះ​ថ្នាក់​ចរាចរណ៍​ថយ​ចុះ​ថា “ខ្ញុំ​គ្មាន​សង្ឃឹម​ទេ​ ថា​ ការ​ស្លាប់​ដោយ​សារ​គ្រោះ​ថ្នាក់​ចរាចរណ៍​នឹង​អាច​​កាត់​បន្ថយ​បាន​ចំនួន​២០​ភាគរយ​​ ព្រោះ​​គ្មាន​ថវិកា​គ្រប់​គ្រាន់​។ យើង​ត្រូវ​ការ​យ៉ាង​តិច​១០​​លាន​ដុល្លារ​ក្នុង​មួយ​ឆ្នាំ​ ហើយ​ [រដ្ឋាភិបាល] អាច​មាន​លទ្ធភាព​ផ្តល់​ត្រឹម​តែ​ ១,៧លាន​ដុល្លារ​ប៉ុណ្ណោះ ពោល​គឺ​វា​តិច​ជាង​ប្រហែល​១០​ភាគរយ​នៃ​អ្វី​ដែល​យើង​ត្រូវ​ការ​”។

ដោយ​គ្មាន​ការ​អនុវត្ត​ច្បាប់​ចរាចរណ៍​ផ្លូវ​គោក​ឲ្យ​បាន​ត្រឹម​ត្រូវ​​ លោក​ ចរិយា​ បាន​​​​​ប៉ាន់​ប្រមាណ​ថា​ ចំនួន​អ្នក​ស្លាប់​ដោយ​សារ​គ្រោះ​ថ្នាក់​ចរាចរណ៍​ នឹង​កើន​ឡើង​ដល់​៣.២០០​នាក់​ក្នុង​មួយ​ឆ្នាំ​ ត្រឹម​ឆ្នាំ​២០២០ ពោល​​​​​គឺ​​វា​នឹង​កើន​ឡើង​ទ្វេ​ដង​នៃ​គោល​ដៅ​របស់​រដ្ឋាភិបាល​ដែលចង់កំណត់​ឲ្យ​អ្នក​ស្លាប់​ដោយ​សារ​គ្រោះ​ថ្នាក់​ចរាចរណ៍មាន​ចំនួន​ត្រឹម​តែ​​​ប្រហែល​១.៦០០​នាក់​។

លោកស្រី​​ លឹម​​ សុជាតិ​​ នាយក​ប្រតិបត្តិនៅ​អង្គការ​សម្ព័ន្ធ​សម្រាប់​សុវត្ថិភាព​ផ្លូវ​គោក (Coalition for Road Safety)បាន​គូស​បញ្ជាក់​ថា នៅ​ក្នុង​ការ​សិក្សា​មួយ​កាល​ពី​ឆ្នាំ​មុន​ដែល​ធ្វើ​ឡើង​នៅ​ក្នុង​ខេត្ត​ចំនួន​ប្រាំ​ អ្នក​ដែល​ត្រូវ​បាន​​សម្ភាស​ចំនួន​៥១​ភាគរយ​បាន​ឆ្លើយ​​ថា ​បាន​បើក​បរ​ពេល​ស្រវឹង​។

លោក​ស្រី​ សុជាតិ បាន​មាន​ប្រសាសន៍​​​​ថា “រដ្ឋាភិ​បាល​ចាំ​បាច់​​ត្រូវ​​តែ​មាន​គោល​នយោ​បាយ​គ្រប់​គ្រង​​គ្រឿង​ស្រវឹង​ ដេើម្បី​កាត់​បន្ថយ​​​​គ្រោះ​​​​ថ្នាក់​ចរាចរណ៍​ដែល​បង្ក​ឡើង​ដោយ​អ្នក​បើក​បរ​ស្ថិត​ក្រោម​ឥទ្ធិពលនៃ​ជាតិ​ស្រវឹង​​ដូច​ជា​ការ​ដំឡើង​ពន្ធ​លើ​គ្រឿង​ស្រវឹង​ជា​ដើម​”។

លោក​ គង់​ សុវណ្ណ​ អ្នក​គ្រប់​គ្រង​កម្មវិធី​ប្រចាំ​ប្រទេស​នៅ​អង្គការ​ភាព​ជា​ដៃ​គូ​សុវត្ថិ​ភាព​ផ្លូវ​គោក​ពិភពលោក​ (Global Road Safety Partnership)បាន​លើក​ឡើង​ថា ​ការ​យឺត​យ៉ាវ​នៅ​ក្នុង​ការ​អនុម័ត​​ច្បាប់​ចរា​ចរណ៍​ថ្មី​ក៏​រារាំង​ដល់​ការ​ខិតខំ​ប្រឹង​ប្រែង​ដើម្បី​​កាត់​បន្ថយ​ការ​ស្លាប់​ដោយ​សារ​គ្រោះ​ថ្នាក់​​ចរាចរណ៍​ដែរ​។

លោក​បាន​មាន​ប្រសាសន៍​ថា “ប៉ុន្តែ​ប្រសិន​​បើ​គ្មាន​ការ​អនុវត្ត​ប្រកប​ដោយប្រសិទ្ធភាព​នោះ​ ទោះ​បី​ជា​មាន​ច្បាប់​ថ្មី​ក៏​ដោយ​ ក៏​វា​គ្មាន​ប្រសិទ្ធ​ភាព​ដែរ។​​ នៅ​ពេល​រដ្ឋាភិបាល​អនុវត្ត​​ច្បាប់​ឲ្យ​បាន​កាន់​តែ​ខ្លាំង​ ការ​គោរព​ជីវិត​មនុស្ស​​​​ក៏​មាន​កាន់​តែ​ច្រើន​ផង​ដែរ​”៕ ស៊ុយ​ឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស