29 C
Phnom Penh

ប្រជាជនរង​គ្រោះ​ដោយសារ​តែការ​បណ្តេញចេញនាំគ្នា​គំរាមតវ៉ាប្រឆាំង​ធនាគារអភិវឌ្ឍ​ន៍អាស៊ី​

ដោយ ឌឹ ខេមបូឌា ដេលី

បទវិភាគ

គ្រួសារប្រជាជន​​ដែលត្រូវបា​ន​បណ្តេញ​ចេញ​ដោយសារគម្រោង​ស្ថាបនា​ផ្លូវដែក​​​ក្រោម​មូល​និធិ​របស់​ធនាគារ​​អភិវឌ្ឍន៍​​អាស៊ី​(ADB) បាន​​គំរាម​​ធ្វើបាតុកម្ម​ ប្រសិន​បើ​ធនា​គារនេះ​មិនបង្ហាញ​ផែន​ការ​ដល់ពួកគាត់ ទាក់ទង​នឹង​ការ​លើកកម្ពស់​កម្រិតជីវភាព​​របស់​ពួកគាត់​ក្នុង​រយៈ​ពេល​មួយ​សប្ដាហ៍។

ប្រជា​ពល​រដ្ឋ​ប្រហែល​១.០០០​គ្រួសារ​ដែល​បាន​សាង​សង់​ផ្ទះ​នៅ​លើ​កំណាត់​ផ្លូវ​ដែក​ដែល​គេ​បោះ​បង់​ចោលជា​យូរ​មក​ហើយ​​​នៅ​ក្នុង​ប្រទេស​នេះ ត្រូវ​បាន​បណ្ដេញ​ចេញ​ ដើម្បីទុក​ផ្លូវ​ឲ្យ​គម្រោង​ស្ថាបនា​ផ្លូវ​ដែក​​ដែល​ត្រូវ​ចំណាយ​ទឹក​ប្រាក់​១៤៣លាន​ដុល្លារ​។ ប្រជាពល​រដ្ឋ​៣.០០០​គ្រួសារ​ទៀត​បាន​បាត់​បង់​ដី​ដោយ​សារ​តែ​គម្រោង​នេះ​។

កាលពីក្នុង​ខែកុម្ភៈ ធនាគារ​នេះ​បាន​ទទួល​យក​ការ​ទទួល​ខុស​ត្រូវ​ចំពោះបំណុល​បន្ថែម​ និង​ទុ​ក្ខ​វេទនា​របស់​គ្រួសារ​ប្រជា​ជន​ទាំង​នោះ​។ ថ្មីៗ​នេះ គេ​បាន​បញ្ចប់​ការ​រៀប​ចំ​ផែន​​ការ​សកម្មភាព​មួយ​ដើម្បីជួយ​ពួកគាត់​ ប៉ុន្តែ​ធនាគារ​នេះ​មិន​ទាន់​បាន​ចេញ​ប្រកាស​នៅ​ឡើយទេ​។

នៅ​ក្នុង​លិខិត​មួយ​ច្បាប់​ផ្ញើជូនការិយា​ល័យ​​ធនាគារ​អភិវឌ្ឍន៍អាស៊ី​ក្នុង​រាជធានី​ភ្នំពេញកាលពីម្សិលមិញ​ គ្រួសារ​ទាំង​នេះ​ចោទ​លោក​ អេរិក ស៊ីត​វីក (Eric Sidgwick) នាយក​ប្រចាំ​ប្រទេស​ថា បាន​ក្បត់​ពាក្យ​សន្យា​ក្នុង​ការ​ផ្សព្វផ្សាយ​ផែន​ការឲ្យ​ពួកគាត់​បាន​ដឹង​មុន​ពេល​ផែ​នការ​នោះត្រូវ​បាន​បញ្ជូន​ទៅ​​ក្រុម​ប្រឹក្សានាយក​របស់​ធនាគារនេះ​។

ផែន​ការ​នេះ​ត្រូវ​គេ​រំពឹង​ថា នឹងត្រូវបាន​បញ្ជូន​ទៅ​ក្រុម​ប្រឹក្សា​នេះ​នៅ​ថ្ងៃ​ណាមួយ​ ក៏ប៉ុន្តែ​គ្រួសារ​ទាំង​នេះ​នៅតែ​ពុំទាន់​បាន​ឃើញ​ផែន​ការ​នេះ​នៅឡើយ​ទេ។  លិខិត​នេះ​មាន​ខ្លឹម​សារ​ថា “ក្នុង​កាលៈ​ទេសៈ​ដែលការ​ឆ្លើយ​តប​មួយ​មិន​ត្រូវ​បាន​ទទួល​ក្នុង​​រយៈ​ពេល​មួយ​សប្ដាហ៍  បាតុកម្ម​នឹង​ធ្វើ​ឡើង​នៅមុខ​ការិយាល័យ​ធនាគារ​អភិ​វឌ្ឍន៍​​អាស៊ី រហូត​ដល់​យើង​ទទួល​បាន​ចម្លើយ​គ្រប់​គ្រាន់ ព្រមទាំង​ដំណោះស្រាយ​​ចំពោះ​សំណើ​​ របស់​​យើង​”​។

ក្រុម​គ្រួសារ​ទាំង​នេះ​អះអាង​ថា លោក ស៊ីតវីក បាន​សន្យា​នៅ​ក្នុងជំនួប​មួយ​កាល​ពីថ្ងៃ​ទី​១១ ខែកុម្ភៈ ថា នឹង​ផ្សព្វផ្សាយ​ផែន​ការ​​​​ប្រាប់ពួកគេ មុន​ពេល​ផែន​ការ​នេះ​ផ្ញើទៅ​ក្រុម​ប្រឹក្សា​​ធនាគារ​អភិវឌ្ឍន៍អាស៊ី​។

លោក ឃួន ព្រំសារិទ្ធ ដែល​ត្រូវ​បាន​បណ្ដេញ​ចេញពីផ្ទះ​របស់​លោក​ក្នុង​រាជ​ធានី​ភ្នំពេញ​កាលពី​ឆ្នាំ​២០១១ បានឲ្យដឹង​ថា​លោក​នឹង​អ្នក​តំណាង​១៩​រូប​ទៀត​បាន​ផ្ដិត​មេដៃ​លើ​លិខិត​នេះ​ និង​កំពុង​ធ្វើ​សកម្ម​ភាព​ជួស​មុខ​ឲ្យ​ប្រជា​ពល​រដ្ឋ​ទាំង​អស់​៤.០០​០​គ្រួសារ​ ដែល​រង​ផល​ប៉ះពាល់​ដោយសារតែ​គម្រោង​ផ្លូវដែក​នេះ​មក​ពី​រាជ​ធានីភ្នំពេញ ខេត្ត​បន្ទាយ​មាន​ជ័យ បាត់​ដំបង ព្រះសីហនុ និង​ខេត្ត​ពោធិ៍សាត់។

លោ​កបាន​ឲ្យ​ដឹង​ថា “ខ្ញុំជាជ​ន​រង​គ្រោះ​រង​ផល​ប៉ះពាល់​ដោយសារ​ការ​បណ្ដេញ​ចេញ​។ ដូច្នេះ ខ្ញុំគួរ​តែ​ដឹង​ពី​អ្វីៗ​ទាំង​នេះ​។ ខ្ញុំចង់​ដឹង​​ថា តើ​គាត់​ពិត​ជាមាន​មនសិការ​ដោះ​ស្រាយ​បញ្ហានេះ​​ដែរ​ឬអត់​”។

លោក ស៊ីតវីក បាន​ទទួ​ល​ស្គាល់​ថា លោក​ពិត​ជា​បាន​ទទួល​លិខិត​នេះ​មែន​។ លោក​បាន​លើក​ឡើង​តាម​អុីម៉េល​ថា “យើង​ពិត​ជា​មាន បំណង​​អនុ​វត្ត​ស្មារតីប្ដេជ្ញា​របស់​យើង​ ដើម្បីស្វែង​រក​ប្រតិ​កម្ម​តប​ពី​សហគមន៍​ដែល​រង​ប៉ះពាល់​លើ​សកម្ម​ភាព​ ទាក់ទង​នឹង​សកម្មភាព​ដោះស្រាយ​ដែលត្រូវ​បាន​​ស្នើ​ឡើងឲ្យ​បានឆាប់ៗ”។

លោកនាយក​ប្រចាំ​ប្រទេស​នេះ​បាន​បដិ​សេធ​មិន​និយាយ​ថា ពេល​ណា​ក្រុមគ្រួសារ​ទាំង​នេះ​នឹង​ត្រូវ​បានពិគ្រោះ​ ឬ​ថាតើ​លោក​បាន​សន្យា​បង្ហាញពួកគាត់នូវ​ផែន​ការ​សកម្ម​ភាព​មុន​ពេល​ផែន​ការ​នេះ​ត្រូវ​បាន​បញ្ជូន​ទៅ​ក្រុម​ប្រឹក្សា​ធនាគារអភិវឌ្ឍន៍អាស៊ី​ ឬ​យ៉ាង​ណា​ទេ​៕ ប៊ុននី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស