កាលពីម្សិលមិញ សាលាដំបូងរាជធានីភ្នំពេញបានបើកសវនាការជំនុំជម្រះរឿងក្តីនៃសំណុំរឿងដែលជនបរទេសចំនួនបីនាក់ត្រូវបានចោទប្រកាន់ពីបទប៉ុនប៉ងរត់ពន្ធថ្នាំញៀនប្រភេទ ហេរ៉ូអុីន ទម្ងន់២២គីឡូក្រាមពីប្រទេសកម្ពុជាទៅកាន់ប្រទេសអូស្ត្រាលី កាលពីខែកញ្ញា។
ជនសង្ស័យឈ្មោះ យូសេ អាន ថាយល័រ(Yoshe Ann Taylor) ជនជាតិអូស្ត្រាលី អាយុ៤១ឆ្នាំ និងជនសង្ស័យ ស្សាឡង់ សាវ៉ារីណូ (Charlene Savarino) ដែលជាជនជាតិបារាំងត្រូវបានចាប់ខ្លួន កាលពីថ្ងៃទី១៩ ខែកញ្ញានៅអាកាសយានដ្ឋានអន្តរជាតិភ្នំពេញ នៅពេលនគរបាលបានរកឃើញគ្រឿងញៀនដែលលាក់នៅក្នុងសាក់កាដូរបស់ជនសង្ស័យថាយល័រ។ ក្រោយមកនគរបាលបានចាប់ខ្លួនជនសង្ស័យ ឈ្មោះ ព្រីសឺស ឈីណេមេវណូកូ (Precious Chinemewnoko) ជនជាតិនីហ្សេរីយ៉ាដែលត្រូវបានចោទប្រកាន់ថា ជា មេខ្លោងនៅក្នុងក្រុមនៅខណ្ឌចំការមន។
កាលពីម្សិលមិញ ជនសង្ស័យ ថាយល័រ បានប្រាប់តុលាការថា សាក់កាដូដែលនាងស្ពាយនៅពីក្រោយមិនមែនជារបស់នាងទេ។ នាងបានលើកឡើងថា វាជាកម្មសិទ្ធិរបស់ជនសង្ស័យ ឈីណេមេវណូកូ ដែលសុំឲ្យនាងស្ពាយយកទៅប្រទេសអូស្ត្រាលី។
នាងបាននិយាយថា “ខ្ញុំមិនដឹងថា សាក់កាដូនេះមានគ្រឿងញៀនឡើយ។ ខ្ញុំបានដឹងថា ខ្ញុំមានគ្រឿងញៀន នៅពេលនគរបាលបានមកចាប់ខ្លួនខ្ញុំនៅឯអាកាសយានដ្ឋាន ហើយបានឲ្យខ្ញុំបើកសាក់កាដូនោះ”។
ជនសង្ស័យ ថាយល័រ បានលើកឡើងទៀតថា សាក់កាដូនេះត្រូវ សាវ៉ារីណូ ដែលជាមិត្តស្រីរបស់ ឈីណេមេវណូកូ បានប្រគល់ ឲ្យនាងអំឡុងពេលនោះ។ សាវ៉ារីណូ បាននិយាយកាលពីម្សិលមិញថា នាងបានស្ពាយសាក់កាដូនេះឲ្យ ឈីណេមេវណូកូ ហើយក្រោយមកបានប្រគល់ទៅឲ្យជនសង្ស័យ ថាយល័រ ប៉ុន្តែនាងមិនបានដឹងថា ក្នុងសាក់កាដូនោះមានថ្នាំញៀនឡើយ៕ស៊ុយឈាង