29 C
Phnom Penh

មនុស្ស​​​ពីរ​​​នាក់​​​រង​​​របួស​​​​​​​​​ជា​​​ទម្ងន់​​​ដោយ​​​សារ​​​គ្រាប់មីន​​​នៅ​​​ក្នុង​​​ខេត្ត​​​កំពត​​​ និងនៅក្នុង​​​​​​ខេត្ត​​​កោះ​​​កុង​​​

ដោយ ឌឹ ខេមបូឌា ដេលី

បទវិភាគ

យោង​​​តាម​​​​​​មន្ត្រី​​​មូល​​​ដ្ឋាន​​​បាន​​​ឲ្យ​​​ដឹង​​​ថា ការ​​​​​​ផ្ទុះ​​​មីន​​​​​​កប់​​​ក្នុង​​​ដី​​​​​​​​​នៅ​​​ក្នុង​​​ខេត្ត​​​​​​កោះ​​​កុង​​​ និង​​​ខេត្តកំពត​​​កាល​​​ពី​​​ថ្ងៃ​​​ច័ន្ទ​​​ និង​​​ថ្ងៃ​​​អង្គារ​​​​​​ បាន​​​បណ្ដាល​​​ឲ្យ​​​បុរស​​​ម្នាក់​​​​​​ និង​​​​​​ក្មេង​​​ស្រី​​​​​​វ័យ​​​ជំទង់​​​ម្នាក់​​​​​​រង​​​របួស​​​ជា​​​ទម្ងន់​​​​​​​​​។

លោក​​​ ឈីម និន ប្រធាន​​​នគរបាល​​​​​​ព្រំ​​​ដែន​​​​​​ខេត្ត​​​បាន​​​មាន​​​ប្រសាសន៍​​​ថា កាលពី​​​ថ្ងៃ​​​អង្គារ​​​​​​ក្មេង​​​​​​ស្រី​​​ សួត​​​ ម៉ាទីម៉ាស់​​​ អាយុ​​​១៤​​​ឆ្នាំ​​​បាន​​​ឡើង​​​​​​ដើម​​​ឈើ​​​មួយ​​​ដើម​​​នៅ​​​ក្នុង​​​ស្រុក​​​មណ្ឌល​​​​​​​​​សីមា ខេត្ត​​​កោះកុង​​​ ជិតព្រំដែន​​​ថៃ។ នៅ​​​ពេល​​​​​លោត​​​​​​ចុះ​​​ពី​​​ដើម​​​​​​ឈើ​​​វិញ​​​ នាង​​​ក៏​​​ជាន់​​​ត្រូវ​​​មីន​​​មួយ​​​គ្រាប់​​​បណ្ដាល​​​ឲ្យ​​​ផ្ទុះ​​​។

វរសេនីយ៍​​​ទោ​​​ ឈីម និន បាន​​​មាន​​​ប្រសា​​​សន៍​​ថា ​នគរបាល​​​​​​ព្រំ​​​ដែន​​​​​​ដែល​​​ឈរ​​​​​​ជើង​​​​​​នៅ​​​ក្បែរ​​​នោះ​​​​​​​​​បាន​​​​​​ធ្វើ​​​ប្រតិបត្តិការ​​​ក្រោយ​​​ពី​​​ឮ​​​សំឡេង​​​ផ្ទុះ ហើយ​​​បាន​​​ប្រទះ​​​ឃើញ​​​​​​កុមារី​​​រង​​​គ្រោះ​​​​​​ស្រែក​​​យំ​​​​​​នៅ​​​នឹង​​​គល់​​​ឈើ​​​។ ក្មេង​​​ស្រី​​​រូប​​​នេះ​​​ត្រូវ​​​បាន​​​បញ្ជូន​​​ទៅកាន់​​​មន្ទីរ​​​ពេទ្យ​​​ខេត្ត​​​ ដើម្បី​​​ទទួល​​​ការ​​​ព្យាបាល​​​​​​ ដោយ​​​សារ​​​តែ​​​ជើង​​​របស់​​​នាង​​​​​​រង​​​របួស​​​ជា​​​ទម្ងន់នៅ​​​ក្នុង​​​ហេតុ​​​ការណ៍​​​ផ្ទុះ​​​មីន​​​នោះ​​​។

ក្នុង​​​ករណី​​​ដោយ​​​ឡែក​​​ពី​​​គ្នា​​​ ក្នុង​​​ស្រុក​​​កំពង់​​​ត្រាច​​​ ខេត្ត​​​កំពត នៅ​​​ក្បែរ​​​ព្រំ​​​ដែន​​​​​​ប្រទេស​វៀត​​​​​​ណាម លោក ឆាយ​​​ សឿន ដែល​​​មាន​​​វ័យ​​​​​​​៥៣​​​ឆ្នាំ​​​ បាន​​​រង​​​របួស​​​ ខណៈពេល​​​កំពុង​​​​​​ដុត​វាល​​​​​​ប្ញស្សី​​​នៅ​​​ចម្ងាយ​​​ប្រហែល​​​១​​​គីឡូម៉ែត្រពី​​​ផ្ទះ​​​របស់​​​គាត់​​​។

យោង​​​តាម​​​​​​លោក​​​ សីុម​​​ នៅ អធិការ​​​រង​​​ស្រុក​​​​​​បាន​​​ឲ្យ​​​ដឹង​​​ថា នៅ​​​ពេល​​​វាល​​​ប្ញស្សី​​​​​​នោះ​​​កំពុង​​​​​​ឆេះ​​​ងំ​​​នៅ​​​ឡើយ​​​គាត់​​​បាន​​​អូស​​​ដើម​​​ប្ញស្សី​​​ពីរ​​​ដើម​​​​​​កាត់​​​​​​ទីវាល​​​នោះ​​​ ហើយ​​​ពេល​​​នោះ​​​​​​មីន​​​កាប់​​​​​​ក្នុង​​​ដី​​​មួយ​​​គ្រាប់​​​​​​ក៏​​​បាន​​​ផ្ទុះ​​​ឡើង​​​។ លោក​​​បាន​​​មាន​​​ប្រសាសន៍​​​ទៀត​​​ថា ការ​​​ផ្ទុះ​​​នេះ​​​បើ​​​មិន​​​បណ្ដាល​​​មក​​​ពី​​​​​​កម្ដៅ​​​ភ្លើង​​​ទេ​​​នោះ​​​ ក៏​​​បណ្ដាល​​​មក​​​ពី​​​ប្ញស្សី​​​លោក​​​ ឆាយ សឿន បាន​​​អូស​​​កាត់​​​​​​ដែរ​​​។

បុរស​​​ជា​​​កសិករ​​​រូប​​​នេះ​​​បាន​​​រង​​​របួស​​​ចំហៀង​​​ខ្លួន​​​ខាង​​​ស្ដាំ​​​ និង​​​​​​ខ្នង​​​ដោយ​​​សារ​​​តែ​​​អំបែង​​​​​​គ្រាប់​​​​​​មីន​​​ ហើយ​​​ត្រូវ​​​បាន​​​​​​បញ្ជូន​​​ទៅ​​​ព្យាបាល​​​នៅ​​​មន្ទីរពេទ្យ​​​មួយ​​​ក្បែរ​​​នោះ​​​នៅ​​​ក្នុង​​​ប្រទេស​​​វៀតណាម​​​៕ សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស