36 C
Phnom Penh

ពលរដ្ឋពាក់ព័ន្ធ​ក្នុង​វិវាទ​ដីធ្លី​​នៅកំពង់ឆ្នាំងដើរចេញ​​ពី​កិច្ច​​ចរចា​

ដោយ ឌឹ ខេមបូឌា ដេលី

បទវិភាគ

មន្ត្រីម្នាក់បាន​ដឹងថា កាល​​ពីម្សិល​មិញ​ប្រជា​​​ពលរដ្ឋ​ចំនួន​ប្រាំបីគ្រួសារដែល​​ជាប់​ពាក់​ព័ន្ធ​ក្នុង​​វិវាទ​ដី​ធ្លីមួយ​នៅក្នុងខេត្ត​កំពង់​ឆ្នាំង ជា​មួយ​​អ្នកស្រី​ ជា ខេង ភរិយា​​របស់​លោក ​ស៊ុយ សែម រដ្ឋ​មន្ត្រី​ក្រសួង​​​ឧស្សា​ហកម្ម​ រ៉ែ និង​​ថាម​ពល ​បាននាំគ្នា​ដើរ​ចេញ​​ពីជំ​នួប​ប្រជុំ​​មួយ​ ​ដែល​ត្រូវបានរៀបចំ​នៅ​ឯការិ​យាល័យ​រដ្ឋ​បាល​ស្រុក​របស់​ពួកគាត់​ដើម្បីដោះ​ស្រាយ​ ​ជម្លោះ​​នេះ​។

លោក ហ៊ុល ចាន់ថូ អភិបា​ល​ស្រុក​កំពង់​ត្រឡាច បាន​មាន​ប្រសាសន៍​ថា ជំនួប​នេះ​ត្រូវ​បាន​ធ្វើ​ឡើង​ដើម្បីពិភាក្សា​ពីលទ្ធភាព​ក្នុង​ការ​បង់​សំណង​ឲ្យ​គ្រួសារ​ប្រជា​ពល​រដ្ឋ​ដែល​ពាក់​ព័ន្ធ​ក្នុង​វិវាទ​ដីធ្លីជាមួយ​ក្រុម​ហ៊ុន​ KDC Interna​-tional របស់​អ្នកស្រី ជា ខេង តាំង​ពី​ក្រុម​ហ៊ុន​នេះ​ចូល​កាន់​កាប់​ដីស្រែ​ចម្ការ​​១៤៥​​​ហិកតា​ក្នុង​ឆ្នាំ២០០៧​។

លោក​បានមាន​ប្រសាសន៍​ថា “យើង​បាន​អញ្ជើញ​ប្រជាជន​ទាំង​នោះ​មក​ជួប​ប្រជុំ​គ្នា​ដើម្បី​​ដោះស្រាយ​បញ្ហា​នេះ​នៅ​ថ្ងៃ​នេះ​ ក៏​ប៉ុន្តែ​ពួកគាត់មិន​ស្ដាប់​គណៈកម្មាធិការ​នេះ​ទេ ហើយពួកគេ​បាន​ដើរ​ចេញពី​ជំនួប​ប្រជុំ​នេះ​ពីព្រោះ​ពួកគេ​មិន​សប្បាយ​ចិត្ត​នឹង​​គោល​​ការណ៍​សំណង​នេះឡើយ​”។

លោក ចាន់ថូ ដែល​បាន​ចូល​រួម​ជំនួប​ប្រជុំនេះ​ដែរ​បាន​លើក​ឡើង​ថា ក្នុង​ចំណោម​​ប្រជា​ពល​រដ្ឋ​៥២​គ្រួសារ​ដែល​ពាក់​ព័ន្ធ​នឹង​ជម្លោះ​នេះ មាន​៣៥​គ្រួសារ​ បានយល់ព្រម​លើ​ដំណោះ​ស្រាយ​មួយ​រួច​ហើយ​។

លោក​ ចាន់ថូ បាន​ឲ្យ​ដឹង​ថា “យើង​កំពុង​តែ​ព្យា​យាម​ស្វែង​រក​ដំណោះ​ស្រាយ​មួយ​សម្រាប់​ប្រជា​ជន​ដែល​នៅ​សេសសល់​ទាំង​នេះ​ ក៏ប៉ុន្តែ​​យើង​​ប្រឈម​នឹង​បញ្ហា​មួយ​​ ពី​ព្រោះ​​គ្រួសារ​ខ្លះ​គ្មាន​បំណង​ដោះស្រាយ​បញ្ហា​​​ជាមួយ​យើង​​ទេ​”​។  លោក​​បាន​បន្ថែមថា លោក​គិត​ថា មាន​​​គេ​កំពុង​លើក​ទឹក​ចិត្ត​គ្រួសារ​​ទាំង​នេះ​មិន​ឲ្យ​សហ​ការ​ជាមួយ​អាជ្ញា​ធរ​ឡើយ​។

ឈ្មោះ​ រាជ សីមា អាយុ​៤៣​ឆ្នាំ ដែល​មាន​ដីមួុយ​ហិកតា ពាក់​ព័ន្ធ​ក្នុង​ជម្លោះ​នេះ​បាន​​មាន​ប្រសាសន៍​ថា គ្រួសារ​របស់​លោក​បាន​ដើរ​ចេញពី​ជំនួប​ប្រជុំកាលពី​ម្សិលមិញ ដោយ​​​សារ​តែ​ការ​ផ្ដល់​សំណង​តិច​ពេក​។

លោក សីមា បាន​ឲ្យ​ដឹង​ថា លោកជឿ​ថា ដីដែល​មាន​បញ្ហា​មាន​តម្លៃ​១០.០០០​ដុល្លារ​​ក្នុងមួយ​ហិកតា ក៏ប៉ុន្តែ​ថា ក្រុម​ហ៊ុន​ KDC ផ្ដល់​ប្រាក់​ឲ្យ​គ្រួសារ​នីមួយ​ៗ​ពី​តែ​មួយ​លាន​រៀល​​ទៅ​ប្រាំមួយ​​លាន​រៀល​ (ឬប្រហែល​២៥​០​ដុល្លារ​ទៅ​១.៥០០​ដុល្លារ) ៕ ប៊ុននី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស