29 C
Phnom Penh

មូលនិធិ​ពិភពលោកកំណត់​ផ្តល់​ថវិកា​ចំនួន​១៤៨,៨​លាន​ដុល្លារ​សម្រាប់​កម្ពុជា​ប្រើ​ប្រាស់​រយៈពេល​បី​ឆ្នាំ​

ដោយ ឌឹ ខេមបូឌា ដេលី

បទវិភាគ

មូលនិធិ​ពិភពលោក​ដើម្បី​ប្រយុទ្ធ​ប្រឆាំង​ជំងឺ​អេដស៍​ របេង​ និង​ជំងឺ​គ្រុន​ចាញ់​ បាន​កំណត់​ផ្តល់​ប្រាក់​ចំនួន​១៤៨​,​៨​លាន​ដុល្លារ​​មក​ឲ្យ​ប្រទេស​កម្ពុជា​សម្រាប់​ប្រើ​ប្រាស់​ក្នុង​រយៈ​​​ពេល​បី​ឆ្នាំ​ក្រោយ​ បន្ទាប់​ពី​មូលនិធិ​នេះ​បាន​ធ្វើ​កំណែ​ទម្រង់​មូលនិធិ​​របស់​ខ្លួននៅទូ​ទាំង​ពិភព​លោក​​​។​

មូលនិធិ​នេះត្រូវ​បាន​បែង​ចែក​ទៅ​ផ្នែក​នីមួយៗ​ដូច​ជា​​ ៧៥​,៣លាន​ដុល្លារ​សម្រាប់​ប្រើ​ប្រាស់​ក្នុង​ការ​ប្រយុទ្ធ​ប្រឆាំង​ជំងឺ​អេដស៍ ១៥,៦​លាន​ដុល្លារ​សម្រាប់​ជំងឺ​របេង ៤៩,៣​លាន​ដុល្លារ​សម្រាប់​ជំងឺ​គ្រុន​ចាញ់​ និង​​៨,៥​លាន​ដុល្លារ​សម្រាប់​ប្រើ​ដើម្បី​ពង្រឹង​ប្រព័ន្ធ​សុខាភិបាល​។

លោក​ ស៊ន ពិសិដ្ឋ​ ជំនួយ​កា​រ​របស់​លោក​ អៀង​ ម៉ូលី​ ប្រធាន​គណៈ​កម្មាធិ​ការ​​សម្រប​សម្រួល​ប្រចាំ​ប្រទេស​របស់​មូល​និធិ​ពិភព​លោក​ និង​ជា​អតីត​រដ្ឋ​មន្ត្រី​ក្រសួង​ព័ត៌មាន​ និង​អតីត​ប្រធាន​មជ្ឈមណ្ឌល​សកម្ម​ភាព​កម្ចាត់​មីន​កម្ពុជា​ (CMAC) បាន​ឲ្យ​ដឹង​ថា ការ​ព្រម​ព្រៀង​​លើក​មុន ​មូលនិធិ​ពិភព​លោក​បាន​យល់​ព្រម​ផ្តល់​ថវិកា​មក​​ឲ្យ​ប្រទេស​កម្ពុជា​ចំនួន​ប្រហែល​​​១៤៥​លាន​ដុល្លារ​សម្រាប់​ប្រើ​ប្រាស់​រហូត​ដល់ឆ្នាំ​២០១៦​ ប៉ុន្តែ​ឥឡូវ​នេះ​​​​បាន​បន្ថែម​រយៈពេល​ប្រើ​ប្រាស់​មួយ​ឆ្នាំ​ទៀត​។

លោក​ ពិសិដ្ឋ​​​ បាន​មាន​ប្រសាសន៍​ថា “ការ​​ផ្លាស់​ប្តូរ​នេះ​ គឺ​ទាក់​ទិន​នឹង​រយៈពេល​នៃ​ការ​ប្រើ​ប្រាស់​ថវិកា​។ [ពី​មុន​] មូលនិធិ​ពិភព​លោក​​​បាន​ព្រម​ព្រៀង​ផ្តល់​ថវិកា​ប្រហែល​១៤៥​លាន​​ដុល្លារ​សម្រាប់​ការ​ប្រើ​ប្រាស់​រយៈ​ពេល​​ពីរ​ឆ្នាំ​ ប៉ុន្តែ​ឥឡូវ​មូលនិធិ​នេះ​បាន​បន្ថែម​រយៈ​ពេល​រហូត​ដល់ទៅ​​ជាងបី​ឆ្នាំ” ។

លោក​ ម៉ូលី​ ដែល​បាន​ក្លាយ​ជា​ប្រធាន​គណៈ​កម្មាធិការ​សម្រប​សម្រួល​ប្រចាំ​ប្រទេស​​របស់​មូលនិធិ​ពិភពលោក​ កាល​ពី​ខែ​មករា​ បាន​​លើ​ក​ឡើង​ថា ការកាត់​បន្ថយ​មូលនិធិ​នេះ​ គឺ​ដោយ​សារ​តែ​អ្នក​ទទួល​ជំនួយ​ក្នុង​ស្រុក​មិន​អាច​ចំណាយ​ប្រាក់​ដែល​មូលនិធិ​ពិភពលោក​បាន​ផ្តល់​ឲ្យ​ កាល​ពី​ឆ្នាំ​មុន​ៗ​អស់​។ លោក​ ម៉ូលី​ បាន​មាន​ប្រសាសន៍​ថា “ដោយ​​សារ​តែ​យើង​ប្រើ​ប្រាស់​អស់​ត្រឹម​តែ​៦០​ភាគ​រយ​​នៃ​ថវិកា​ដែល​មូលនិធិ​ពិភពលោក​​បានផ្តល់​ឲ្យ​យើង​ ហេតុដូច្នេះ​មូលនិធិ​ពិភព​លោក​កាត់​បន្ថយ​ថវិកា​”។

​ជា​ផ្នែក​នៃ​អន្តរកាល​ឆ្ពោះ​ទៅ​រក​កំណែ​ទម្រង់​មូលនិធិ​ថ្មី​របស់​ខ្លួន​ មូលនិធិ​ពិភពលោក​​បាន​ត្រួត​ពិនិត្យ​ឡើង​វិញ​នូវ​​ចំនួន​ទឹក​ប្រាក់​ដែល​ផ្តល់​ទៅ​ឲ្យ​ប្រទេស​នីមួយ​ៗ​ សម្រាប់​ប្រយុទ្ធ​ប្រឆាំង​ជំងឺ​ផ្សេងៗ​។ មូលនិធិ​ពិភព​លោក​​​​​បាន​លើក​​ឡើង​ថា ការ​ផ្តល់​ថវិកា​សម្រាប​​់​​​​ប្រយុទ្ធ​ប្រឆាំង​ជំងឺ​ផ្សេង​ៗ​ គឺ​សុទ្ធ​តែ​លើស​បរិមាណ​។

នៅ​ក្នុង​ប្រទេស​កម្ពុជា​មូលនិធិ​ដែល​ផ្តល់​សម្រាប់​ប្រយុទ្ធប្រឆាំង​ជំងឺ​អេដស៍​ គឺ​វា​ច្រើន​ហួស​គួរ​ឲ្យ​កត់​សម្គាល់​ រីឯ​ថវិកា​សម្រាប់​ប្រយុទ្ធ​ប្រឆាំង​ជំងឺ​គ្រុន​ចាញ់​និង​របេង​ ក៏​ច្រើន​ហួស​ដែរ​​។

ជាជាង​​ផ្តល់​មូលនិធិ​សម្រាប់​ប្រយុទ្ធ​ប្រឆាំង​​​​ជំងឺ​ផ្សេងៗ​ជាក់​លាក់ណា​មួយ​​ កំណែ​ទម្រង់​ថ្មី​របស់​មូលនិធិ​ពិភពលោក​ បាន​ផ្តោត​លើ​ចំនួន​ទឹក​ប្រាក់​សរុប​ដែល​ផ្តល់​ទៅ​ឲ្យ​ប្រទេស​មួយ​។ ប៉ុន្តែ​មូលនិធិ​ពិភព​លោក​ បាន​អនុញ្ញាត​ឲ្យ​មាន​ការ​បត់​បែន​ទាក់​ទិន​នឹង​ថា​តើ​ថវិកា​នឹង​ត្រូវ​យក​ទៅ​ចំណាយ​ដោយ​របៀប​ណា​។

បន្ទាប់​ពី​មូលនិធិ​ពិភពលោក​ បាន​ចេញ​របាយ​ការណ៍​មួយ​កាល​ពី​ឆ្នាំ​មុន​ដែល​រក​ឃើញ​​​​ថា មា​ន​ការ​ប្រព្រឹត្ត​​អំពើ​ពុករលួយ​ខ្លាំង​នៅ​ក្នុង​វិស័យ​សុខាភិបាល​​ក្នុង​​ប្រទេស​កម្ពុជា​ មូល ​និ​ធិ​ពិភពលោក​ បាន​ផ្អាកការ​ផ្តល់​ថវិកា​ទៅ​ឲ្យ​ម​ជ្ឈមណ្ឌល​ជាតិ​ប្រយុទ្ធ​ប្រឆាំង​ជំងឺ​គ្រុន​ចាញ់​ ព្រោះ​ប្រធាន​មជ្ឈ​មណ្ឌល​នេះ​ត្រូវ​បាន​គេ​សង្ស័យ​ថា ទទួល​បាន​​ប្រាក​់​ជាង​៤០០.០០០​​ដុល្លារ​ពី​កិច្ច​សន្យា​ផ្គត់​ផ្គង់​មុង​។

លោក​ ម៉ូលី​​ បាន​លើក​ឡើង​ថា ការ​កាត់​បន្ថយ​ថវិកា​សម្រាប់​ការ​ប្រើ​ប្រាស់​នៅ​ឆ្នាំ​ក្រោយៗ​នេះ​មិន​ជាប់​ទាក់​ទិនរបាយ​ការណ៍​​​ដែល​ពាក់​ព័ន្ធ​នឹង​មន្ត្រី​ក្រសួង​សុខាភិ​បាល​​ និង​អង្គការ​ក្រៅរ​ដ្ឋាភិបាល​​ដែលទទួល​បន្ទុក​បែង​ចែក​ថវិកា​បាន​ពី​មូលនិធិ​ពិភពលោក​។ លោក​​ ម៉ូលី​ បានបន្ថែម​ទៀត​​​​ថា “ [ការ​កាត់​​បន្ថយ​​​ថវិកា​] គឺ​មិន​ពាក់​ព័ន្ធ​នឹង​បញ្ហានេះ​ទេ​”៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស