កាលពីម្សិលមិញ សមាគមរោងចក្រកាត់ដេរនៅកម្ពុជា (GMAC) បានព្រមានកម្មកររោងចក្រកាត់ដេរថា ពួកគាត់អាចនឹងបាត់បង់ការងារ ប្រសិនបើពន្យារពេលឈប់សម្រាកបន្ទាប់ពីពិធីបុណ្យចូលឆ្នាំខ្មែរប្រពៃណីជាតិដោយចូលរួមនៅក្នុងការធ្វើកូដកម្មស្នាក់នៅផ្ទះនោះ។
ដើម្បីគេចពីការបង្ក្រាបរបស់នគរបាលលើការតវ៉ាតាមផ្លូវដើម្បីទាមទារដំឡើងប្រាក់ខែគោលនោះ សហជីពបានអំពាវនាវឲ្យកម្មកររោងចក្រកាត់ដេរស្នាក់នៅផ្ទះចំនួនប្រាំថ្ងៃ បន្ទាប់ពីពិធីបុណ្យចូលឆ្នាំខ្មែរដែលបញ្ចប់នៅថ្ងៃពុធសប្តាហ៍ក្រោយ។
ប៉ុន្តែនៅក្នុងចុះផ្សាយតាមទំព័រកាសែត សមាគមរោងចក្រកាត់ដេរនៅកម្ពុជាបានលើកឡើងថា បើយោងតាមច្បាប់ការងារ កូដកម្មគឺគ្រាន់តែជាកូដកម្ម ប្រសិនបើវា កើតឡើង “នៅក្នុងសហគ្រាស ឬរោងចក្រណាមួយ” ។
ការចុះផ្សាយនេះមានខ្លឹមសារបន្តដូច្នេះថា ការរៀបចំឲ្យការឈប់សម្រាកប្រចាំឆ្នាំគឺត្រូវបានធ្វើឡើងរវាងកម្មករ និងនយោជកដោយផ្ទាល់។
ការចុះផ្សាយនេះ មានខ្លឹមសារបន្តដូច្នេះទៀតថា “គ្មានច្បាប់ណាផ្តល់សិទ្ធិឲ្យសហជីព ឬក៏អង្គការវិជ្ជាជីវៈនូវសិទ្ធិសម្រេច ឬក៏ការស្នើសុំច្បាប់ឈប់សម្រាកប្រចាំឆ្នាំឲ្យកម្មករនោះទេ” ។ ការចុះផ្សាយនេះបាន ព្រមានថា កម្មករណាដែលស្នាក់នៅផ្ទះបន្ទាប់ពីចូលឆ្នាំខ្មែររួចនឹងប្រឈមការផាកពិន័យ។
ការចុះផ្សាយនេះ មានខ្លឹមសារបន្តទៀតថា “ ទោះបីជាកម្មករខ្លះនឹងមិនធ្វើការ ដើម្បីទាមទារអ្វីមួយពីនិយោជកក៏ដោយ ក៏សកម្មភាពនេះមិនអាចចាត់ទុកថា ជាធ្វើកូដកម្មឡើយ។ មិនមកធ្វើការត្រូវបានចាត់ទុកថា អវត្តមានដែលកម្មករអាចនឹងប្រឈមការផាកពិន័យដោយអនុលោមទៅតាមច្បាប់ការងារនិងបទបញ្ជាផ្ទៃក្នុងរបស់ក្រុមហ៊ុន”។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ជាសហជីពមួយក្នុងចំណោមសហជីពមួយចំនួនដែលរៀបផែនការធ្វើកូដកម្មបានលើកឡើងថា កម្មករកាត់ដេរ អាចសម្រេចបានថា តើគួរចូលរួម ឬមិនចូលរួមនៅក្នុងការធ្វើកូដកម្មនេះ។
លោកបានមានប្រសាសន៍ថា “ពួកគាត់ [កម្មករ] មានច្បាប់ឈប់សម្រាកប្រចាំដែលពួកគាត់ចង់ឈប់ពេលណាក៏បាន។ ដោយសារយើងជាតំណាងពួកគាត់ យើងស្នើសុំឲ្យពួកគាត់ ដោយយោងទៅតាមច្បាប់ការងារ។ កម្មករបានស្នើមកកាន់សហជីព ហេតុដូច្នេះយើងត្រូវតែធ្វើតាមសំណើរបស់ពួកគាត់”។
លោក ស៊ីណា ក៏បានគូសបញ្ជាក់ដែរថា មានរោងចក្រយ៉ាងតិចចំនួនបួនបានយល់ព្រមធ្វើតាមសំណើសុំឈប់សម្រាករបស់កម្មករបន្ទាប់ពីពិធីបុណ្យចូលឆ្នាំខ្មែររួច។មានរោងចក្រកាត់ដេរប្រមាណ៤០០នៅទូទាំងប្រទេស។
បុរសម្នាក់នៅក្នុងរោងចក្រកាត់ដេរ Ocean ដែលជារោងចក្រមួយក្នុងចំណោមរោងចក្រជាច្រើនក្នុងរាជធានីភ្នំពេញ បានឆ្លើយបញ្ជាក់តាមទូរស័ព្ទដោយមិនប្រាប់ឈ្មោះថា កម្មករនៅក្នុងរោងចក្រនេះ ត្រូវបានអនុញ្ញាតឲ្យឈប់សម្រាកបន្ថែម បន្ទាប់ពីពិធីបុណ្យចូលឆ្នាំខ្មែរ។
បុរសរូបនេះបាននិយាយថា “ យើងអនុញ្ញាតឲ្យកម្មករឈប់សម្រាកចាប់ពីថ្ងៃទី១២ ដល់ថ្ងៃទី២១ តាមសំណើរបស់សហជីព ហើយយើងនឹងមិនកាត់ប្រាក់ឧបត្ថម្ភផ្សេងៗ[ប្រចាំខែ] របស់ពួកគាត់ឡើយ ប៉ុន្តែយើងនឹងកាត់ប្រាក់ឈ្នួល [ប្រចាំថ្ងៃ] របស់ពួកគាត់”៕ ស៊ុយឈាង