26 C
Phnom Penh

ស្នងការនគរបាលខេត្តមាន​រឿងអាស្រូវ ត្រូវបានតែងតាំង​​ជា​ស្នងការ​នគរបាល​ខេត្ត​ត្បូងឃ្មុំ

ដោយ ឌឹ ខេមបូឌា ដេលី

បទវិភាគ

លោក ​ម៉ៅ ​ពៅ ដែលត្រូវបាន​​​ដក​ចេញ​តួនាទី​របស់លោក​​ជាស្នងការ​នគរបាល​ខេត្ត​ព្រះវិហារ​ក្នុងឆ្នាំ​២០១២ បន្ទាប់​ពីបាញ់​បោះ​នៅសណ្ឋាគារ​មួយ​នៅខេត្ត​សៀមរាប​ ត្រូវ​បាន​​តែងតាំង​​​ជាស្នងការ​នគរបាល​ខេត្ត​​ត្បូង​​ឃ្មុំ ​ដែលទើបបង្កើតថ្មី​។

លោកឧត្តម​សេនីយ៍ត្រី ម៉ៅ ​ពៅ បាន​ឲ្យ​ដឹងកាល​​ពីម្សិល​មិញថា លោក​នឹង​រង់​ចាំ​ រហូត​ដល់​ពេលបោះ​ឆ្នោត​​​ក្នុងខែឧសភា ដើម្បី​​ទទួល​ការងារ​នេះ។

លោក ម៉ៅ ពៅ បានមាន​ប្រសាសន៍ថា​ “ខ្ញុំ​ត្រូវបាន​តែងតាំង​​​ជា​ស្នងការ​​នគរបាល​ខេត្ត​ត្បូង​​ឃ្មុំ ​ក៏ប៉ុន្តែ​យើងកំពុងរង់ចាំ​​​រហូត​ដល់ពេលបោះឆ្នោតជ្រើសរើសក្រុមប្រឹក្សា​ខេត្ត ក្រុង​/​រាជធានី ស្រុក/ខណ្ឌ​ នៅក្នុងខែ​ឧសភា​មកដល់។ ខ្ញុំ​មិន​ទាន់ចូលកាន់​​​តួនាទី​​នៅ​ឡើយ​ទេ​”។

លោក ស ខេង រដ្ឋមន្ត្រីក្រសួងមហាផ្ទៃ​​​បាន​ចេញសេចក្តីប្រកាស​មួយ​កាលពីថ្ងៃ​ទី៤ ខែ មេសា ដើម្បីតែងតាំង​លោក ម៉ៅ ​ពៅ ​ឲ្យ​​​ចាប់​ផ្តើម​កសាង​កម្លាំងនគរបាល​នៅក្នុង​ខេត្ត​ដែល​​ទើប​​បង្កើតថ្មីនេះ។

សេចក្តីប្រកាស​​នេះ​មាន​​ខ្លឹមសារដូច្នេះ​ថា “​សេចក្តីសម្រេច​នេះ​​នឹងប្រគល់​​ភារកិច្ច​ដល់​លោកឧត្តម​សេនីយ៍ត្រី ម៉ៅ ​ពៅ ដើម្បី​ចូល​រួម​​ជាមួយ​ក្រុមការងារ ​និងមន្ត្រីរាជការ​​ក្នុង​ការ​បង្កើត​រដ្ឋបាល​នគរបាល​ខេត្ត​ត្បូង​​ឃ្មុំ​”។

លោក ម៉ៅ ពៅ បាន​​បាត់បង់​ការងារ​កន្លង​មក​ ​ជាស្នងការ​​នគរបាល​ខេត្តព្រះ​វិហារ​ក្នុង​ខែតុលា ​ឆ្នាំ​២០១២ បន្ទាប់ពី​ត្រូវបានចាប់​ខ្លួន​​ដោយនគរបាល​ខេត្តសៀមរាប ​និង​​ជាប់​ឃុំមួយយប់​​​ដោយសារ​បាញ់​​បោះបួន​​ទៅ​ប្រាំមួយគ្រាប់​​​នៅ​ខាង​​ក្នុង​សណ្ឋាគារ​​មួយ។

យោងតាមលោក ទី សុវិនថាល់ ព្រះរាជ​អាជ្ញា​​អមសាលាដំបូងខេត្ត​​ បានឲ្យដឹងថា ​លោក ម៉ៅ ​ពៅ ផឹកស្រវឹងជោក​​​ជាមួយ​សហ​ការីនគរបាល​ ហើយក៏​មាន​ការ​​​ឈ្លោះ​ប្រកែក​​គ្នា​ផ្ទុះ​​ឡើង។​

ក្រោយ​​រំលងអាធ្រាត្របន្តិច លោក ​ពៅ​បានបាញ់​​​ពិដាន​និងទ្វារសណ្ឋាគារ​​។​បន្ទាប់ពី​លោក ម៉ៅ ​ពៅ ត្រូវ​បានដោះលែង លោក​សត ​ណូឌី ស្នងការ​​នគរបាល​ខេត្ត​សៀមរាប​​​បានមាន​ប្រសាសន៍ថា លោក​បានដក​ហូត​យក​​កាំ​ភ្លើងរបស់​គាត់ “ព្រោះគាត់​ខឹង​មេឃ”។​

ខេត្តត្បូងឃ្មុំ​ត្រូវបាន​បង្កើតឡើង​​​​​ដោយ​កាត់ពាក់កណ្តាលភាគ​ខាងកើតនៃ​​ខេត្ត​កំពង់ ចាមកាលពី​ខែ​មករា។ ខេត្តថ្មីនេះ​រាប់​​បញ្ចូល​ស្រុកទាំងអស់​ប្រាំ ​ដែលគណបក្សប្រជាជន កម្ពុជាឈ្នះ​ការ​បោះឆ្នោត​ជ្រើសតាំង​តំណាង ​រាស្ត្រ​ឆ្នាំ​២០១៣។ គណ​បក្សសង្គ្រោះជាតិ​​​ ដែល​ជា​គណបក្សប្រឆាំង​ទទួល​​បាន​សំឡេង​ភាគ​ច្រើន​នៅក្នុងស្រុក​ចំនួន​១២​ដែល​​ពេល​នេះ​បង្កើត​​ជា​ខេត្តកំពង់ចាម។

កាលពីចុងខែ​​មករា ទីស្តីការគណៈ​រដ្ឋ​ មន្ត្រី​​​បានប្រកាស​ថា លោក ប្រាជ្ញ ច័ន្ទ ត្រូវ​​​ផ្លាស់​​ពី​តួនាទី​​របស់​លោក​​​ជាអភិបាល​ខេត្ត​បាត់​ដំបង ​ទៅកាន់​​តួនាទី​​ជា​អភិ​បាល​ខេត្ត​ត្បូង​​ឃ្មុំ​វិញ៕ ប៊ុននី​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស