កាលពីម្សិលមិញ សាលាដំបូងរាជធានីភ្នំពេញបានបើកសវនាការរឿងក្តីភរិយាអាយុ៥០ឆ្នាំរបស់អ្នកជំនួញមានទ្រព្យសម្បត្តិស្តុកស្តម្ភមួយរូប ក្រោមបទចោទប្រកាន់ថា បានធ្វើទារុណកម្មលើក្មេងស្រីពីរនាក់ ដែលមានការអះអាងថា ជាកូនចិញ្ចឹមរបស់ជនជាប់ចោទ តាំងពីជាងមួយទសវត្សរ៍មុន។
ជនរងគ្រោះម្នាក់ឈ្មោះ សោម ផល្លី អាយុ២០ឆ្នាំ និងម្នាក់ទៀតឈ្មោះ សំ សុគន្ធា អាយុ១៨ឆ្នាំ បានរត់គេចពីលំនៅដ្ឋានរបស់លោក វ៉េង តិចឡា កាលពីខែកុម្ភៈ ឆ្នាំ២០១៣ បន្ទាប់ពីរងការវាយដំ ធ្វើទារុណកម្ម និងឃុំទុកអស់រយៈពេលច្រើនឆ្នាំ នេះបើយោងតាមសេចក្តីអះអាងរបស់ជនរងគ្រោះទាំងពីរនាក់។
កញ្ញា ផល្លី បានប្រាប់តុលាការថា “ខ្ញុំខំរត់គេចចេញពីផ្ទះពីរដង នៅពេលខ្ញុំត្រូវបានគេធ្វើទារុណកម្ម។ ខ្ញុំត្រូវគេវាយនឹងប្រដាប់ព្យួរខោអាវ និងត្រូវគេឃុំទុកនៅក្នុងផ្ទះ”។ ជនរងគ្រោះរូបនេះបាននិយាយបន្ថែមទៀតថា នៅពេលជនជាប់ចោទឈ្មោះ លី ពៅ បានយកនាង និងកញ្ញា សុគន្ធា ទៅចិញ្ចឹមនាងមានអាយុប្រាំពីរឆ្នាំ។
ជនរងគ្រោះឈ្មោះ សុគន្ធា បាននិយាយថា “ ពេលលោកស្រី ពៅ មិនពេញចិត្តការងាររបស់ពួកយើងនៅក្នុងផ្ទះ យើងតែងតែរងទារុណកម្ម”។ ជនរងគ្រោះបាននិយាយបន្តថា “គាត់មិនឲ្យយើងទៅរៀនទេ ទើបឥឡូវហ្នឹងពួកយើងមិនចេះអក្សរទេ”។ បន្ទាប់ពីក្មេងស្រីទាំងពីរបានរត់គេចខ្លួនកាលពីឆ្នាំមុន ពួកគេបានស្វែងរកជំនួយពីនគរបាលនៅខណ្ឌទួលគោក។
លោក ពុទ្ធ ធាវី មេធាវីការពារក្តីរបស់ជនជាប់ចោទឈ្មោះ ពៅ បានលើកឡើងថា ក្មេងស្រីទាំងពីរប្រៀបដូចជាកូនស្រីរបស់កូនក្តីរបស់លោក។ លោកបានមានប្រសាសន៍ថា “គាត់មិនបានធ្វើទារុណកម្មពួកគេទេ…។ ខ្ញុំបដិសេធបទចោទប្រកាន់នេះ និងស្នើឲ្យដកបទចោទប្រកាន់ទាំងនេះចេញ”។
លោក កោ វណ្ណឌី ប្រធានក្រុមប្រឹក្សាជំនុំជម្រះ បានឲ្យដឹងថា សាលក្រមនឹងត្រូវបានប្រកាសនៅថ្ងៃទី២ ខែឧសភា។ ជនជាប់ចោទឈ្មោះ ពៅ កំពុងរត់គេចខ្លួន៕ សុធា