35 C
Phnom Penh

កូន​អតីត​ស្នង​ការ​ខេត្ត​បើក​រថយន្ត​បុក​​គេ​ស្លាប់ ហើយ​បើក​រត់​

ដោយ ឌឹ ខេមបូឌា ដេលី

បទវិភាគ

នគរ​បាល​បាននិយាយ​ថា កាលពីថ្ងៃ​សៅរ៍ កូន​មន្ត្រី​រដ្ឋាភិបាល​ម្នាក់​បាន​គេច​ខ្លួន​ពី​កន្លែង​គ្រោះថ្នាក់​ចរាច​រណ៍​​ក្នុង​ខេត្ត​កណ្ដាល ដែល​បាន​បណ្ដាល​ឲ្យ​បុរស​ម្នាក់​ស្លាប់​ និង​​បណ្ដាល​ឲ្យ​មនុស្ស​ពីរ​នាក់​ទៀត​បាត់​បង់​ជើង​ម្ខាង​។

យោង​តាម​នគរ​បាល​មូល​ដ្ឋាន​បាន​ឲ្យ​ដឹង​ថា ឯក សុវណ្ណារ៉ា កូន​លោក ឯក ក្រឹត អតីត​ស្នង​​​ការ​នគរ​បាល​ខេត្ត​កណ្ដាល ដែល​ឥឡូ​វ​នេះ​ជា​ទីប្រឹក្សា​នៅ​ក្រសួង​មហាផ្ទៃ បាន​បើក​រថ​យន្ត​បុក​ម៉ូតូមួយ​គ្រឿង​ដែលមាន​មនុស្ស​ជិះបីនាក់​ ពេល​កំពុង​ធ្វើដំណើរ​តាម​ផ្លូវ​ជាតិ​លេខ​៨ ពីភ្នំពេញ​ទៅ​ខេត្ត​ព្រៃ​វែង ។

យោង​តាម​លោក ម៉ែន សុខឿន អធិការ​នគរ​បាល​ស្រុក​ខ្សាច់​កណ្ដាល​ បាន​ឲ្យ​ដឹង​ថា នគរ​បាល​អនុញ្ញាត​ឲ្យ​លោក សុវណ្ណារ៉ា ប៉ះ​កង់​​រថយន្ត​ Lexus ដែល​បែក​របស់​គាត់​មុន​ពេល​គាត់​បើក​គេច​ចេញពី​កន្លែង​កើត​ហេតុ។

លោក សុខឿន មាន​ប្រសាសន៍​ថា “ជន​​បង្ក​បានសុំអនុញ្ញាត​ប៉ះកង់​​រថយន្ត​សិន​ ហើយ​បាន​និយាយ​ថា គាត់​នឹង​ដោះស្រាយ​បញ្ហានេះ​នៅ​​​ពេល​ក្រោយ​។ ប៉ុន្តែ​គាត់​បាន​គេ​ចខ្លួន​បន្ទាប់​ពីប៉ះកង់​នោះរួច​។

លោក​បានបន្ថែម​ថា “ លោក សុវណ្ណារ៉ា ​បាន​បើក​យ៉ាង​លឿន និង​ប៉ុនប៉ង​បុក​ប៉ូលិស​យើង​ទៀត​នៅពេល​យើង​ព្យាយាម​​​​ឃាត់​រថ​យន្ត​នោះ​ ក្រោយពីជន​នេះ​និង​មនុស្ស​ដែល​ជិះរថ យន្ត​ជាមួយ​គាត់​បាន​ប៉ះកង​់​នោះរួច​”។

គ្រោះ​ថ្នាក់នេះ​បានធ្វើ​ឲ្យ​ឈ្មោះ ដោក ម៉េង អាយុ​២៨​ឆ្នាំ វ៉ាន់ ចាន់ អាយុ​២៨​ឆ្នាំ និង​ យ៉ន តែង៉ោ អាយុ​៣០​ឆ្នាំ​ ដែល​សុទ្ធ​តែ​ជា​ប្រជា​ពល​រដ្ឋ​រស់​នៅក្នុង​ស្រុក​ខ្សាច់​កណ្ដាល​ បាន​រង​របួស​ធ្ងន់ ហើយ​ត្រូវបាន​បញ្ជូន​ទៅ​ព្យាបាល​នៅ​មន្ទីរ​ពេទ្យ​កាល់ម៉ែត។ មនុស្ស​ទាំង​បីនាក់​ត្រូវ​កាត់​ជើង​ឆ្វេង​លើ​ជង្គង់។

យោងតាម​ឪពុក​មារ​របស់​គាត់​បាន​ឲ្យ​ដឹង​ថា កាលពីព្រឹកម្សិលមិញ ឈ្មោះ ដោក ម៉េង ដែលជា​អ្នក​បើក​ម៉ូតូ​​បាន​ស្លាប់​ ដោយសារ​រង​របួស​ធ្ងន់​។

លោក សុវណ្ណារ៉ា ជា​អនុ​ប្រធាន​នគរ​បាល​​​ច្រក​ទ្វារ​ព្រំដែនអន្តរជាតិ​ព្រៃវល្លិ៍ ក្នុង​ខេត្ត​ស្វាយ​រៀង បាន​ឲ្យនាម​ប័ណ្ណ​របស់​គាត់​ទៅ​នគរ​​​​​​​បាល​នៅកន្លែង​កើត​ហេតុ​ ប៉ុន្តែ​បាន​គេ​ច​ខ្លួន​មុនពេល​​​​បញ្ចប់​​​ការ​​​ធ្វើ​របាយការណ៍​ផ្លូវ​ការ។

លោក​ សុខឿន បាន​មាន​ប្រសាសន៍​ថា ជន​​​​​​​​​​​​សង្ស័យ​រូប​នេះមានពេល​រហូត​ដល់​ថ្ងៃ​ក្រោយ​​​​​​ចូល​ឆ្នាំ​ខ្មែរ​ ដើម្បីចូល​មក​ដោះ​ស្រាយ​​​​បញ្ហា​នេះ​ បើមិនដូច្នោះ​ទេ​ នគរ​បាលនឹង​ស្វែង​​​រក​ចាប់​ខ្លួនគាត់​។ លោក សុខឿន មាន​ប្រសាសន៍​ថា “ យើង​​​ស្គាល់​អត្ត​សញ្ញាណ​ជន​បង្ក​ហើយ ព្រោះ​គាត់​​​​​បាន​ឲ្យនាម​ប័ណ្ណ​គាត់​មក​យើង​ ដូច្នេះ យើង​អាច​រក​អាសយដ្ឋាន​ផ្ទះ​របស់​គាត់​ឃើញ​”។

លោក​បានមាន​ប្រសាសន៍​ថា “យើង​នឹង​បញ្ជូន​ករណីនេះទៅ​ឲ្យតុលាការ​សម្រេច​តាម​​​ច្បាប់​ក្រោយ​ថ្ងៃ​ចូល​ឆ្នាំ​ ប្រសិន​បើ​មិនចូល​មក​ដោះ​ស្រាយ​បញ្ហា​នេះទេ​”។

កាលពីខែ​វិច្ឆិកា ឆ្នាំមុន អាជ្ញាធរ​ខេត្ត​កណ្ដាលមិន​បាន​ដោះស្រាយករណី​បុក​ហើយ​​​​​​​រត់​ ក្រោយពីរថយន្ត​ដែលលោក ជាម យៀប សមា​​ជិក​សភា​គណបក្ស​ប្រជា​ជន​​​ជិះ​ បាន​​​​​​​បុក​​​​​​​​​​គ្នា​​ចំ​ពីមុខ​​ជាមួយម៉ូតូ​មួយ​គ្រឿង​ធ្វើ​ ឲ្យ​ស្ត្រី​​​ម្នាក់​ស្លាប់ និង​ប្ដី​របស់គាត់​រង​របួស​ធ្ងន់​។

នៅពេល​នោះ​ លោក ជាម យៀប បាន​អះអាង​ថា ​លោក​មិនខុស​ទេ ពីព្រោះលោក​មិនមែន​ជា​អ្នក​បើក​បរ​រថយន្តនោះ​ និង​បាន​ប្រាប់​ពី​ហេតុ​ផល​ចំពោះការ​បើក​គេ​ចចេញ​ពី​កន្លែង​កើត​ហេតុ​ ដោយសារ​ខ្លាច​មាន​​ការ​បង្ក​​​​អំពើ​ហិង្សា​ពីក្រុម​មនុស្ស​ទាំង​នោះ ប្រសិន​​​​​​​​​បើ​គាត់​ស្ថិត​នៅ​កន្លែង​កើត​​​ហេតុ​។

មាត្រា ៣៦ នៃ​ច្បាប់​ចរាចរណ៍ផ្លូវ​គោក ចែង​ថា ក្នុង​ករណី​បង្ក​គ្រោះ​ថ្នាក់​ចរាចរណ៍​ “អ្នក​បើក​បរ​ និង​អ្នក​ប្រើ​ប្រាស់​ផ្លូវ​ទាំង​អស់​ដែល​ជាប់​ពាក់​ព័ន្ធ​ក្នុង​គ្រោះ​ថ្នាក់​ចរាចរណ៍ និង​អ្នក​ឈរ​មើល​​ត្រូវតែបញ្ឈប់យាន​ជំនិះ​​​​​​នោះ​​​​ភ្លាម​ ហើយ​រាយការណ៍ទៅ​អាជ្ញាធរ​មូល​​​​​​​ដ្ឋាន ឬ​នគរ​បាល​ចរាចរ​”​​​។ យោង​តាម​ច្បាប់​នេះ “ការ​ចាក​ចេញពី​កន្លែង​កើត​ហេតុ​ត្រូវ​ហាម​ឃាត់​ បើគ្មានការ​អនុញ្ញាតពី​នគរ​បាល​ចរាចរ”៕ ​គឹមហឿន

 

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស