បណ្តាញព័ត៌មានអូស្ត្រាលីបានរាយការណ៍ថា អ្នកស្វែងរកសិទ្ធិជ្រកកោនជាង១.០០០នាក់ដែលត្រូវបានឃាត់ខ្លួន ខណៈដែលកំពុងធ្វើដំណើរទៅរស់នៅក្នុងទឹកដីប្រទេសអូស្ត្រាលី អាចមកដល់ប្រទេសកម្ពុជា ក្រោមផែនការតាំងទីលំនៅមួយ ក្រោមកិច្ចចរចារវាងប្រទេសទាំងពីរ។
សារព័ត៌មានអូស្ត្រាលីដដែលបានរាយការណ៍កាលពីថ្ងៃសៅរ៍ថា លោក ស្កុត ម៉ូរីសុន (Scott Morrison) រដ្ឋមន្ត្រីក្រសួងអន្តោប្រវេសន៍អូស្ត្រាលី ឲ្យដឹងថា កិច្ចព្រមព្រៀងនេះអាចមើលឃើញថា អ្នកស្វែងរកសិទ្ធិជ្រកកោនទាំងអស់ដែលមានការអះអាងថាស្របច្បាប់ និងបច្ចុប្បន្ននេះកំពុងត្រូវឃុំខ្លួននៅមណ្ឌលឃុំឃាំងនៅលើកោះណូរូ និងគ្រីស្មាស នឹងត្រូវបានបញ្ជូនមកប្រទេសកម្ពុជាវិញ។
ខណៈដែលមណ្ឌលទាំងពីរមានអ្នកស្វែងរកសិទ្ធិជ្រកកោនប្រមាណ២.៤០០នាក់កាសែតនេះរាយការណ៍ទៀតថា មានតែ៥០ទៅ៦០ភាគរយប៉ុណ្ណោះក្នុងចំណោមអ្នកស្វែងរកសិទ្ធិជ្រកកោនទាំងនេះអាចទទួលបានសិទ្ធិរស់នៅ។ការិយាល័យរបស់លោក ម៉ូរីសុន មិនបានឆ្លើយតបនឹងសំណើមួយសុំធ្វើសេចក្តីអត្ថាធិប្បាយទេ។
ក្រុមមន្ត្រីកម្ពុជាដែលពាក់ព័ន្ធក្នុងការចរចានេះមិនអាចទាក់ទងបានទេកាលពីម្សិលមិញនេះ។ ដំបូង ក្រុមមន្ត្រីកម្ពុជាបានបង្ហាញសំណើរបស់ប្រទេសអូស្ត្រាលីសុំឲ្យសង់ទីលំនៅសម្រាប់អ្នកស្វែងរកសិទ្ធិជ្រកកោននៅទីនេះកាលពីខែកុម្ភៈ អំឡុងដំណើរទស្សនកិច្ចមួយរបស់លោកស្រីជូលី ប៊ីសប (Julie Bishop)
រដ្ឋមន្ត្រីក្រសួងការបរទេសនៃប្រទេសអូស្ត្រាលី ។នៅពេលនោះ លោក ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានលើកឡើងថា ប្រទេសកម្ពុជានឹង “ ពិចារណាដោយប្រុងប្រយ័ត្ន” អំពីសំណើនេះ។
អង្គការសិទ្ធិមនុស្សនិងតំណាងរាស្ត្រមកពីភាគីគណបក្សប្រឆាំងក្នុងប្រទេសកម្ពុជានិងប្រទេសអូស្ត្រាលីបានចោទប្រកាន់រដ្ឋាភិបាលរបស់លោកនាយករដ្ឋមន្ត្រីអូស្ត្រាលី តូនី អាបបុត(Tony Abbott) ថា បានព្យាយាមគេចចេញពីការទទួលខុសត្រូវរបស់ខ្លួនចំពោះអ្នកស្វែងរកសិទ្ធិជ្រកកោននៅក្នុងប្រទេសមួយក្នុងចំណោមប្រទេសក្រីក្របំផុតនៅក្នុងតំបន់៕ ប៊ុននី