28 C
Phnom Penh

ឧត្តម​​​ក្រុម​​​ប្រឹក្សា​​​អង្គ​​​ចៅក្រមកម្ពុជា​​​​​​ដំឡើង​​​និងផ្ទេរ​​​តំណែងចៅក្រម ​និងមន្ត្រីតុលាការ​ចំនួន​៧៨រូប​

ដោយ ឌឹ ខេមបូឌា ដេលី

បទវិភាគ

យោងតាម​ព្រះរាជក្រឹតមួយ​ចុះព្រះ​ហត្ថ​លេខា​កាលពីថ្ងៃទី៦ ខែមេសា បានឲ្យដឹងថា​តាមរយៈច្បាប់ថ្មីដែល​​​មានគោលបំណង​​​កែទម្រង់​ប្រព័ន្ធ​តុលាការ ឧត្តមក្រុម​ប្រឹក្សា​​​អង្គចៅក្រម​បាន​ប្រកាស​ផ្លាស់​​​​ប្តូរ​តំណែង​​ចៅក្រមនិងមន្ត្រី​​​​តុលាការ ដោយមាន​មន្ត្រី​ចំនួន​៧៨រូបត្រូវ​បាន​​តែងតាំង ឬផ្ទេរ​។

យោងតាម​លោក សំ ប្រជាមានិត ​ប្រធាន​ខុទ្ទកាល័យ​​របស់ក្រសួង​យុត្តិធម៌​​បានឲ្យដឹង​ថា ការផ្លាស់ប្តូរការងារ​ ដែលរាប់​បញ្ចូល​ចៅ​ក្រម​​និងព្រះរាជអាជ្ញាជាន់​ខ្ពស់នៅ​តុលាការ​កំពូល សាលាឧទ្ធរណ៍និង​សាលា​ដំបូង​ខេត្ត​គឺ​ជាការ​ប្តូរគ្នា​តាម​និយាម​មួយ​​របស់​ចៅ​ក្រម​និងព្រះរាជ​​អាជ្ញា ក្នុងគោល​បំណង​កម្ចាត់​​អំពើ​​ពុក​រលួយ។

លោកបាន​មាន​ប្រសាសន៍ថា “វាជា​រឿង​ធម្មតាទេ ពីព្រោះ​ចៅក្រមនិងព្រះ​រាជអាជ្ញា​មិនអាចធ្វើការ​លើស​ពីរយៈពេល​បួនឆ្នាំ​[នៅក្នុង​តួនាទី​ដដែល] ទេ។ ដូច្នេះត្រូវតែ​ផ្លាស់ប្តូរ”។ លោកបានមានប្រសាសន៍បន្ថែមទៀត​ថា “ក៏ប៉ុន្តែការផ្លាស់​ប្តូរ​ដោយ​ឧត្តម​ក្រុម​ប្រឹក្សា​​អង្គ​ចៅក្រម​ក្នុងការ​ផ្ទេរ​តួនាទី​​​របស់​ចៅក្រម​ ក៏ជា​ផ្នែក​នៃ​​ដំណើរ​ការ​កែទម្រង់​ស៊ីជម្រៅនៅក្នុងប្រព័ន្ធតុលាការ​របស់​រដ្ឋា​ភិបាល​​​អាណត្តិ​​ទី៥”។

ការផ្លាស់​ប្តូរភាគច្រើនបំផុតនេះ គឺ​​នៅ​ក្នុងតុលា​ការកំពូល។ លោក ជីវ កេង ប្រធាន​សាលាដំបូងរាជធានីភ្នំពេញ ត្រូវបាន​​​ផ្លាស់​​​ឲ្យទៅ​កាន់​មុខតំណែងជា​អនុប្រធាន​តុលា​​​ការ​កំពូល​។ លោក និល ណុន ប្រធាន​សាលា​ដំបូងខេត្ត​សៀមរាប ក៏ត្រូវបាន​​តែង​​តាំង​ជា​អនុប្រធាន​តុលាការ​​ជាន់​ខ្ពស់​បំផុត​របស់​កម្ពុជា​​ផងដែរ​។

លោក ជីវ កេង បាន​បញ្ជាក់​កាល​ពីម្សិល​មិញ​​ថា លោកត្រូវបាន​ដំឡើង​ឋានៈ ​និង​បាន​​មានប្រសាសន៍ថា ការ​ផ្ទេរ​​តំណែងនេះ​គ្មាន​​​អ្វី​ប្លែកទេ។ លោក​ថ្លែងថា “ វាជាភារកិច្ច​និង​កា​តព្វ​កិច​្ច​របស់​ខ្ញុំ ហើយវាជារឿងធម្មតាទេ”។

លោក សេង នាង ចៅក្រម​សាលាដំបូង​រាជធានីភ្នំពេញ លោក ចាំង ស៊ីណាត លោក​សែម សកុឡា និងលោក តែ សំអាង កា្លយ​​ជា​ចៅក្រម​របស់​តុលាការកំពូល។

ចៅក្រមប្រាំរូប​ឡើងទៅ​សាលា​ឧទ្ធរណ៍​រាប់ទាំង​លោក ស៊ិន វិសាល ចៅក្រម​សាលា​ដំបូង​រាជធានីភ្នំពេញ និងលោកចៅក្រម​ ​អុិន វ៉ាន់​វិបុល ប្រធាន​សាលា​ដំបូង​ខេត្តកណ្តាល​។ លោកចៅក្រម វ៉ាន់វិបុល បានមាន​ប្រ​សា​​សន៍កាលពីម្សិលមិញថា “នៅពេល​រដ្ឋ​បញ្ជា​ឲ្យខ្ញុំទៅធ្វើការ​នៅកន្លែងណា​មួយ យើង​​​ នឹងទៅធ្វើការ​​នៅទីនោះ​”។

ក្នុងចំណោម​មន្ត្រី​​​៥៩​​​រូប​​​ដែល​​​ត្រូវ​​​បាន​​​ផ្ទេរនិង​ដំឡើងតួនាទី​​នៅ​កម្រិត​សាលា​ដំបូង​​​ខេត្ត​និង​សាលាដំបូងរាជធានី ​​​ក៏មាន​​​លោក អាំង ម៉ាល់ឌី ប្រធាន​សាលា​ដំបូង​ខេត្ត​បន្ទាយ​​​ជ័យដែល​នឹងកាន់តួនាទី​​ជា​ប្រធាន​ថ្មី​​នៃ​សាលា​​​ដំបូង​រាជធានីភ្នំពេញផងដែរ​​​៕ ប៊ុននី​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស