យោងតាមអាជ្ញាធរបានឲ្យដឹងថា ជនជាតិបែលហ្សិកម្នាក់ ដែលជាប់ពន្ធនាគារនៅក្នុងខេត្តកំពតអស់រយៈពេលជិតមួយឆ្នាំ ជាជនសង្ស័យតែម្នាក់ឯងក្នុងករណីធ្វើឃាតអ្នកទេសចរជនជាតិបារាំងម្នាក់កាលពីដើមឆ្នាំមុន ត្រូវបានដោះលែងឲ្យនៅក្រៅឃុំកាលពីថ្ងៃសុក្រ។
ឈ្មោះ អូលីវ័រ វ៉ាន ដិន ហ្កឺត (Oliver van den Bogaert) អាយុ៤១ឆ្នាំ ត្រូវបានចាប់ខ្លួនកាលពីខែមេសាឆ្នាំ២០១៣ រយៈពេល១០សប្តាហ៍បន្ទាប់ពីសាកសពភ្ញៀវទេសចរមួយរូបឈ្មោះ អូហ្វេលី បេកនីស (Ophelie Begnis) អាយុ២៥ឆ្នាំ ត្រូវបានប្រទះឃើញនៅមាត់ស្ទឹងក្នុងក្រុងកំពត។
កាលពីសប្តាហ៍មុន សាលាឧទ្ធរណ៍បានបង្គាប់ឲ្យដោះលែងជនសង្ស័យឲ្យនៅក្រៅឃុំជាបណ្តោះអាសន្នពីពន្ធនាគារខេត្តកំពត ដោយសារខ្វះភ័ស្តុតាងក្នុងរឿងក្តីរបស់គាត់។
លោក សេង ស៊ីវុត្ថា អនុប្រធានសាលាឧទ្ធរណ៍ បានមានប្រសាសន៍ថា “ យើងគ្មានភ័ស្តុតាងគ្រប់គ្រាន់ដើម្បីចោទគាត់ទេ ដូច្នេះលោកចៅក្រមសាលាឧទ្ធរណ៍ ឃុន លាងម៉េង បានបង្គាប់ឲ្យដោះលែងគាត់”។ លោកបានឲ្យដឹងបន្ថែមថា ព្រះរាជអាជ្ញានឹងមានពេល១៥ថ្ងៃដើម្បីឧទ្ធរណ៍សារទុក្ខ។
លោក អែម បូវ ប្រធានពន្ធនាគារខេត្តកំពតបានបញ្ជាក់ថា ជនសង្ស័យ វ៉ាន ដិន ហ្កឺត ត្រូវ បានដោះលែងកាលពីថ្ងៃសុក្រ បន្ទាប់ពីពន្ធនាគារបានទទួលបទបញ្ជាពីសាលាឧទ្ធរណ៍កាលពីថ្ងៃព្រហស្បតិ៍។
ឈ្មោះ វ៉ាន ដិន ហ្កឺត ត្រូវបានចោទប្រកាន់ ពីបទមនុស្សឃាតកាលពីថ្ងៃទី២៥ ខែមេសាឆ្នាំមុន បន្ទាប់ពីសាក្សីម្នាក់បានអះអាងថា បានឃើញជនសង្ស័យមានកង់មួយគ្រឿង ដែលជនរងគ្រោះឈ្មោះ អូហ្វេលី បេកនីស កំពុងជិះ នៅថ្ងៃដែលនាងបាត់ខ្លួន។
ជនជាប់ចោទ និងមេធាវីរបស់ខ្លួនបានអះអាងថា ជនសង្ស័យឈ្មោះ វ៉ាន ដិន ហ្កឺត គ្មានកំហុសទេពីព្រោះនគរបាលខេត្តកំពតមិនបាននាំភ័ស្តុតាងថែមទៀតសម្រាប់ចោទប្រកាន់គាត់ឡើយ។
កាលពីខែមីនា ក្រុមធ្វើកោសល្យវិច័យមួយក្រុមមកពីប្រទេសបារាំងបានធ្វើការស៊ើបអង្កេតឃាតកម្មនេះ ប៉ុន្តែក៏មិនបានរកឃើញភ័ស្តុតាងភ្ជាប់ជនសង្ស័យឈ្មោះ វ៉ាន ដិន ហ្កឺត ទៅនឹងករណីឃាតកម្មនេះដែរ។
លោក នីកូឡាស់ បូឌីន(Nicolas Baudouin) លេខាទី១នៅស្ថានទូតបារាំងបានលើកឡើងកាលពីម្សិលមិញថា លោកមិនបានដឹងថា ជនសង្ស័យឈ្មោះ វ៉ាន ដិន ហ្កឺត ត្រូវបានដោះលែងទេ។
លោក ធារី ដាលីម័រ (Thierry Dalimier) កុងស៊ុលកិត្តិយសនៅស្ថានកុងស៊ុលបែលហ្សិក បានបដិសេធមិនធ្វើអត្ថាធិប្បាយទាក់ទងនឹងរឿងក្តីនេះទេ៕ ប៊ុននី