30 C
Phnom Penh

អ្នកភូមិ​ជន​ជាតិ​ភាគតិច​ជង​បន្ត​បិទផ្លូវ​​​ឆ្ពោះ​​ទៅ​​​​ការដ្ឋាន​​​​សាងសង់​ទំនប់​វារី​អគ្គិសនី​​​​អំឡុង​បុណ្យ​ចូលឆ្នាំ​ខ្មែរ​​​​

ដោយ ឌឹ ខេមបូឌា ដេលី

បទវិភាគ

​​​​អំឡុង​ពិធី​​​​បុណ្យ​ចូល​ឆ្នាំ​​​ខ្មែរ​​​កន្លង​​​ទៅ​​​ថ្មីៗ​​​នេះ​​​ ក្រុម​អ្នក​ភូមិ​មក​ពី​សហគមន៍ជន​ជាតិ​ភាគ​តិច​​ក្នុង​តំបន់​​ឆាយ​​​អារ៉ែង​​ខេត្ត​កោះ​កុង​​​ បាន​បន្ត​​បិទ​ផ្លូវទៅកាន់​ការ​ដ្ឋាន​សាងសង់​ទំនប់​វារី​អគ្គិ​​​សនី​​​មួយ​​​កន្លែងដែល​​​ពួកគា​ត់​លើកឡើង​​​ថា​​​នឹង​បំផ្លាញ​​​​ជីវភាព​រស់នៅ​របស់ខ្លួន​​​​​​។

ទោះ​ជា​​​យ៉ាង​ណា សមាជិក​​សហ​គមន៍​ជន​ជាតិ​ភាគ​តិច​ជងនេះ​​​មិន​បាន​​​​​​បណ្តោយ​​​​ឲ្យ​កា​រ​ត​វ៉ា​របស់ខ្លួន​​​​​​​ប៉ះពាល់​​​​ដល់​ពិធីបុណ្យ​ចូល​ឆ្នាំ​ខ្មែរ​​​ទេ​​​ដោយពួកគាត់​​​បាន​​​​​​នាំ​​​គ្នា​​​រាំ​កម្សាន្ត​និង​​លេង​ល្បែង​ប្រជាប្រិយ​ ខណៈ​​​បន្ត​​​​​​ការ​​​ឃ្លាំ​​​មើល​ក្រែង​​​​​​លោ​​​មាន​​​កម្មករ​​​​​​​​​មកពី​​​ក្រុមហ៊ុន Sinohydro (Cambodia) United Ltd., ដែល​មាន​​គម្រោង​​សាង​សង់​ទំនប់​វារី​អគ្គិសនី​ស្ទឹង​ឆាយ អារ៉ែង​​កម្លាំង​១០៨មេហ្គាវ៉ាត់នៅក្នុង​រយៈ ពេល​ប៉ុន្មាន​ខែ​​បន្ទាប់​​​​នេះ។

ព្រះ​តេជគុណ ហេង ម៉េង​ហុង ព្រះជន្ម​២១ព្រះ​វស្សា​មកពី​បណ្តាញ​ព្រះ​សង្ឃ​ឯក​រាជ្យ​ដើម្បី​យុត្តិ​ធម៌​សង្គម​​បាន​មាន​សង្ឃ​ដីកាកាលពី​ល្ងាច​ថ្ងៃ​អង្គារ​ថា ជន​ជាតិ​ភាគតិច​ជាង​៣០នាក់​​បាន​បិទផ្លូវ​នៅក្នុង​ភូមិ​ថ្មបាំង​ ឃុំ​ឫស្សីជ្រុំ។

ព្រះ​តេជគុណ​បាន​មាន​សង្ឃដីកាថា “​ពួក​​ គាត់​បាន​យក​ធុង​ជ័រ និង​ឆ្នាំង​វាយដំធ្វើ​ជា​ភ្លេង​ សម្រាប់​រាំ​​ ​ច្រៀង​​ និង​លេង​ល្បែង​ប្រជា​ប្រិយ​​អំឡុង​បុណ្យ​ចូលឆ្នាំ​ខ្មែរ​។ ពួក​គាត់​បារម្ភ​​​ខ្លាច​​​ក្រុម​ហ៊ុន​ចិន​នេះ​ឆ្លៀត​ឱកាសដឹក​គ្រឿង​ចក្រ​ទៅ​កាន់​ការដ្ឋាន​សាងសង់​ទំនប់​វារីអគ្គិសនី​​​នោះអំឡុង​បុណ្យ​ចូលឆ្នាំ​ខ្មែរ​​​​ ដូច្នេះ ​ហើយ​ទើប​​​អ្នក​ភូមិ​ជន​ជា​តិ​ភាគតិច​ជង​បន្ត​បិទ​ផ្លូវ…​ដើម្បី​ឃ្លាំ​មើល​​​​ក្រែង​​​លោ​​​មាន​​​កម្មករ​​ឆ្លៀត​​​ឱកាស​​​ចូលទៅកាន់​​តំបន់​នោះ”។ព្រះ​តេជ​គុណបាន​ឲ្យ​​​ដឹង​​​​បន្ត​​​ថា ក្រុម​អ្នក​ភូមិ​បាន​បោះ​តង់​​​ចំនួន​១៥ហើយ​ផ្លាស់​ប្តូរ​​​វេន​​​គ្នា​យាម​ផ្លូវ។

ការ​បិទ​ផ្លូវ​របស់​សហ​គមន៍ជន​ជាតិភាគ​តិច​ជង​​បាន​ចាប់ផ្តើម​កាលពី​ខែ​មីនា​​​នៅ​ពេល​​ ​ក្រុមហ៊ុន Sinohydro សាងសង់​កន្លែង​ស្តុក​ទឹក​​នៅ​ក្បែរ​ការ​ដ្ឋានដែល​អាច​ចេញ​ចូល​បាន​​​​តាម​ផ្លូវ​លំតែ​​​មួយ​​​នោះ​​​។ ទោះ​ជា​​​យ៉ាង​ណា មក​​​ទល់​​​នឹង​​​ពេល​​​នេះ​​​នៅ​​​មិន​ទាន់​មាន​កាល​​បរិច្ឆេទ​សម្រាប់​ការ​សាងសង់​​​ទំនប់​​​ដែល​សហ​​​គមន៍នេះ​​​និ​ង​អង្គការក្រៅ​​​រដ្ឋាភិបាល​មួយ​ចំនួន​​ក្នុង​តំបន់​នេះ​​​បារម្ភថា នឹង​ធ្វើ​ឲ្យ​លិច​លង់​​​​ផ្ទៃ​​​ដីទំហំ​២០.០០០ ហិកតា​រាប់​​​ទាំង​​​​ផ្នែក​​​នៃ​​​​ព្រៃការ​ពា​រភ្នំក្រវាញដែល​ពួក​​​គាត់​​​ចាត់​​​ទុក​ថា​​​ជា​តំបន់​​​ដ៏​​​ពិសិដ្ឋ​​​​​​ទេ​​​។

លោក កែវ នីបូរ៉ា អភិបាល​រង​ស្រុក​ថ្ម​បាំង​​ បានបញ្ជាក់​ថា អ្នក​ភូមិ​​​​មួយ​​​ចំនួន​​​តូច​​​​បាន​បន្ត​​ឃ្លាំមើល​​​​​ផ្លូវ​​​នេះ​​​​​​អំឡុងពិធី​​​​​បុណ្យ​ចូលឆ្នាំ​​​​ថ្មី​​​ប្រពៃណី​​​ខ្មែរ​​​មែន​​​។លោក បន្តថា​ “ក្រុម​ អ្នក​ភូមិ​​អាច​ធ្វើ​អ្វី​ក៏បាន​តាម​ចិត្ត​​​របស់​​​ពួកគាត់​​​​ប៉ុន្តែ​យើង​បារម្ភថា ប្រសិន​បើ​ពួក​គាត់​ធ្វើ​ការ​តវ៉ា​​​យូរ​​​ជាង​​​នេះ​​​​ វានឹង​ធ្វើ​​​ឲ្យ​​​ប៉ះពាល់​ដល់​ការ​ប្រកប​របរ​ចិញ្ចឹម​ជីវិត​​និង​​​​​ដល់​​​សុខ​ភាព​របស់​ពួកគាត់ ពីព្រោះ​ពួកគា​ត់​ប្រចាំការ​នៅ​ក្នុង​​ព្រៃ​​​រហូត​​​”៕​សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស