41.3 C
Phnom Penh

លោក ហ៊ុន សែន បកស្រាយខុស​អំពីកិច្ចចរចាជាមួយ​លោក សម រង្ស៊ី

ដោយ ឌឹ ខេមបូឌា ដេលី

បទវិភាគ

លោក កឹម សុខា អនុប្រធាន​គណ​​បក្ស​សង្គ្រោះ​​ជាតិ​​​បាន​ប្រើ​កិច្ច​សម្ភាសន៍​តា​ម​​រយៈ​​វិទ្យុ​មួយ​កាល​ពីយប់ថ្ងៃ​​ពុធ​ ដើម្បី​បញ្ជាក់​​ពី​គោលជំហរ​របស់​លោកលើកិច្ច​​ចរចា​កាល​​ពី​សប្តាហ៍មុន​​រវាង​លោក​នាយក​រដ្ឋមន្ត្រី​ហ៊ុន សែន និង​លោក​ ​សម រង្ស៊ី ប្រធាន​គណ​បក្ស​​សង្គ្រោះ​​ជាតិ​ ដែលមានគោល​បំណងបញ្ចប់​ភាព​ជាប់​​គាំង​ក្រោយពេលបោះឆ្នោត​ ។ គួរ​បញ្ជាក់ថា ​ក្នុងកិច្ច​ចរចា​នោះ​កាល​បរិច្ឆេទ​មួយ​​សម្រាប់ការ​​​បោះ​ឆ្នោតថ្មី​​​ទំនង​​​​​ជា​ចំណុច​​​តែ​មួយគត់​ដែល​នាំ​ឲ្យ​មិនត្រូវ​រ៉ូវគ្នា​​។

​​ក្រោយ​ការ​​​​​ចរចានេះ លោក ​សម រង្ស៊ី​ បា​ន​មាន​ប្រសាសន៍កាល​​ពីថ្ងៃ​​ទី​៩ ខែ​មេសា​​​ថា លោកមានផែនការ​មិន​ទាន់​ច្បាស់​ការ​មួយ​សម្រាប់​ជំនួប​រវាង​លោក​ និង​លោក​ ហ៊ុន សែន​ ​នៅចំពោះ​មុខ​​ព្រះ​មហា​ក្សត្រ​នរោត្តម សីហ​មុនី ​កាល​​ពី​​ថ្ងៃ​​ទី​១១ ខែ​មេសា​  ដើម្បីចុះ​ហត្ថលេខា​លើ​កិច្ច​ព្រម​ព្រៀង​មួយ​នៅ​ក្នុង​គោល​បំណង​បញ្ចប់​ការធ្វើ​ពហិកា​​​រ​របស់គណបក្ស​​សង្គ្រោះ​​​ជាតិ​​មិនចូល​សភា ប្រសិន​បើ​មាន​ការ​ព្រមព្រៀង​គ្នា​មួយ​លើ កាល​​បរិច្ឆេទ​​បោះឆ្នោតថ្មី។

នៅ​ថ្ងៃ​បន្ទាប់​ លោក ហ៊ុន សែន ​បាន​​​អះ​អាងថា​ ​ជាការពិត លោក ​សម រង្ស៊ី ​បាន​យល់​ព្រម​កំណត់ពេល​​បោះឆ្នោត​​​ពីខែ​ កក្កដា ឆ្នាំ​២០១៨ មក​ខែ​​កុម្ភៈ ឆ្នាំ២០១៨ វិញ ​ប៉ុន្តែ​លោកបាន​និយាយថា លោក​ខ្លាចថា លោក ​កឹម​សុខា ​ជំទាស់​ដាច់​​អហង្ការ​​ចំពោះ​កិច្ច​ព្រម​ព្រៀង​នេះ។

នៅក្នុងសន្និសីទកាសែត​​​មួយ​ លោក​សម រង្ស៊ី ​​បាន​បដិសេធ​ការ​​អះអាង​​របស់​លោក ហ៊ុន សែន ​​និងបា​ន​​​ពោល​សង្កត់​​​ធ្ងន់អំពី​ការឯកភាព​​របស់​លោកផ្ទាល់​​​ជាមួយ​លោក កឹម សុខា។

នៅក្នុង​កិច្ច​សម្ភាសន៍មួយ​​​ជាមួយ​​វិទ្យុ​អាស៊ី​សេរី​កាល​​ពីយប់​ថ្ងៃ​ពុធ នៅ​ក្នុងរដ្ឋធានី​វ៉ាស៊ីនតោន ​ជាកិច្ច​​បញ្ចប់​ដំណើរ​​ទស្សនកិច្ច​រយៈពេល​​២០​ថ្ងៃ​​របស់លោក លោក កឹម សុខា ​​បាន​លើក​ឡើង​ ​ថា ​ការ​​សន្ទនា​តាម​​ទូរស័ព្ទ​​រវាង​លោក សម រង្ស៊ី ​និងលោក ​ហ៊ុន សែន កាល​ពីសប្តាហ៍មុន ​​ជាលទ្ធផល​​​នៃការ​​​ចរចា​រយៈ​ពេល​​​ជាច្រើន​សប្តាហ៍​រវាង​​គ​ណ​​បក្ស​​ប្រជា​ជនកម្ពុជា និង​គណ​បក្ស​សង្គ្រោះ​​ជាតិ។

លោក កឹម សុខា មាន​​ប្រសាសន៍ថា លោក​ ហ៊ុន សែន ហាក់ដូចជាបាន​យល់ស្រប​ទៅ​នឹង​ចំណុច​​ទាម​​ទារ​​​ក្នុងការ​សន្ទនាតាមទូរស័ព្ទ​​ជា​មួយ​លោក ​សម រង្ស៊ី​។ ​ទោះជាយ៉ាងណា សេច​ក្តីព្រាងកិច្ច​ព្រម​ព្រៀង​មួយធ្វើ​ឡើង​ក្នុង​ពេល​ក្រោយ មកទៀតមិន​​បានឆ្លុះ​បញ្ចាំង​ឲ្យ​ឃើញ​ខ្លឹម​សារ​​នៃការ​សន្ទនា​តាម​​ទូ​ស័ព្ទ​​ទេ។

លោកបាន​​មានប្រសាសន៍ថា “បន្ទាប់​ពី​យើង​​មានការ​​​ពិភាក្សា​​គ្នា​ យើងបាន​​ឃើញ​ថា​អ្វី​​ដែល​​​គ​ណបក្ស​ប្រជា​ជន​កម្ពុជា​​ចង់​​​បាន​ក្នុង​សេចក្តី​​ព្រាង​​កិច្ចព្រម​​ព្រៀង​នយោបាយ​នឹង​​​ជាការ​​បាត់​​បង់​​មួយ​សម្រាប់​ផលប្រ​​យោជន៍​ជាតិ​និង​ផល​ប្រយោជន៍​របស់ប្រជាពលរដ្ឋ​។ ប្រជាជន​ចង់​ឲ្យមានការ​បោះឆ្នោត​នៅ​ពេល​​ឆាប់ៗនេះ ​មិន​មែនក្នុង​ឆ្នាំ​២០១៨ទេ”។​

លោកបានមានប្រសាសន៍ថា “ជំហរ​របស់​​​គណបក្សសង្គ្រោះជាតិ​គឺ​ថា ការ​បោះ​ឆ្នោត​…​ឡើ​ង​វិញ​គួរ​តែ​ធ្វើ​ឡើង​នៅ​ដើម​ឆ្នាំ​២០១៦​ ដើម្បី​ប្រើ​ពាក់​កណ្ដាល​អាណត្តិ​សម្រាប់​ការ​ចុះឈ្មោះ​ និង​បញ្ជី​ឈ្មោះអ្នក​បោះ​ឆ្នោត​។ ដូច្នេះ លោកប្រធាន​ សម រង្ស៊ី មិន​បាន​ព្រម​ព្រៀង​ជាមួយ​លោក ហ៊ុន សែន លើការ​បោះ​ ​ឆ្នោត​ក្នុង​ឆ្នាំ​២០១៨​ទេ​”។

នៅ​ក្នុងសន្និសីទ​កាសែតនៅ​​ថ្ងៃ​បន្ទាប់ពី​ការ​សន្ទនា​តាមទូរស័ព្ទនោះ​ លោក សម រង្ស៊ី ដែលនៅ​ពេល​នេះ​កំពុង​ស្ថិត​នៅ​តំបន់អឺរ៉ុប ក៏បាន​ពោល​សង្កត់​ធ្ងន់ថា លោក​មិន​បាន​ព្រម​ព្រៀង​ជាមួយ​លោក​នាយក​រដ្ឋមន្ត្រី​អំពីការ​បោះ​ឆ្នោត​ខែ​កុម្ភៈ ឆ្នាំ​២០១៨​ទេ។

ក៏ប៉ុន្តែ​ លោក សម រង្ស៊ី ក៏បាន​លើក​ឡើង​ដែរ​ថា កិច្ច​ព្រម​ព្រៀង​អំពី​កាលបរិច្ឆេទ​មួយ​ជាមួយ​លោក​ ហ៊ុន សែន អាច​កើត​មាន​ឡើង​ ហើយ​ ​លោក​បាន​បញ្ជាក់​ថា ការ​បោះ​ឆ្នោត​មួយ​​ក្នុង​ខែ​កក្កដា ឆ្នាំ​២០១៧ អាច​ទទួល​យក​បាន​។

លោក កឹម សុខា បាន​លើក​ឡើង​ថា ការ​បំភាន់កាលពីសប្ដាហ៍មុន​គឺ​ជា​លទ្ធផល​នៃ​យុទ្ធ​នាការ​នៃការ​​​ប៉ុនប៉ងរបស់​លោក ហ៊ុន សែន ក្នុង​ការ​បំបែកបំបាក់គណបក្ស​ប្រឆាំង។

អនុ​ប្រធានគណបក្ស​ប្រឆាំងរូប​នេះ​បាន​មានប្រសាសន៍​បន្ថែមទៀត​​ថា “ទាំង​លោក សម រង្ស៊ី និង​ខ្ញុំ​មិនអាច​សម្រេច​​អ្វីមួយ​តែ​ឯ​ង​ទេ​ យើង​ទាំង​ពីរ​នាក់​ធ្វើ​សេចក្ដីសម្រេច​រួម​គ្នា​ជារៀង​រហូត​”។ លោក​មាន​ប្រសាសន៍​ថា “អ្នក​ខ្លះ​អាច​យល់​ច្រឡំ​ ពីព្រោះ​គណ​បក្ស ​ប្រជា​ជន​​ប្រើ​ល្បិច​ ប្រើល្បិច​ដដែល​ៗ​ ក្នុង​បំណង​​បំបែក បំបាក់​យើង​”។

ពួកគេ​ចង់​បំបែក បំបាក់ពួក​យើង​ ដូច្នេះ​ពួកគេ​បាន​ប្រើ​អ្វី​ដែល​ត្រូវ​បាន​ជជែក​បក​ស្រាយ​តាមវិធី​ផ្សេង​គ្នា​ ដើម្បី​ធ្វើ​ឲ្យ​ប្រជា​ពល​រដ្ឋ​មាន​ការ​ភាន់ច្រឡំ​ថា យើង​មាន​ទស្សន​ផ្សេង​ៗ​គ្នា”។

កាលពីថ្ងៃ​ទី​១០ ខែ​មេសា លោក ហ៊ុន សែន បាន​គំរាម​បញ្ចេញ​សំឡេង​ថត​​ការ​សន្ទនា​អស់​រយៈ​ពេល​​៤៤​នាទី​ពេញ​រវាង​លោក និង​​លោក​ សម រង្ស៊ី ប្រសិន​បើ​គណ​បក្ស​សង្គ្រោះ​ជាតិ​ បដិសេធខ្លឹម​សារ​នៃ​កិច្ច​​សន្ទនា​​នោះ។

លោកស្រី មូរ សុខហួរ ប្រធាន​ទទួល​បន្ទុក​កិច្ច​ការ​សាធារណៈ​របស់​គណបក្ស​សង្គ្រោះ​ជាតិ​ បាន​មាន​ប្រសាសន៍​កាលពីម្សិលមិញ​ថា សេចក្តី​អះអាង​របស់​លោក សម រង្ស៊ី ថា​ កិច្ច​ព្រម​ព្រៀង​នេះ​បាន​បំពេញ​៨០​ភាគ​រយ​ជា​មួយ​​នាយក​រដ្ឋមន្ត្រី​ ហ៊ុន សែន ស្របគ្នា​​ជា​មួយ​ប្រសាសន៍​​របស់​លោក កឹម សុខា។

លោកស្រី​បានមានប្រសាសន៍​ថា “បើ​ទោះ​ជា​យើង​ជិត​ត្រូវ​រ៉ូវ​គ្នា​ក៏ដោយ ក៏២០​ភាគ​រយ​នៅ​តែ​ច្រើន​ដែរ​។ គំនិត​អាក្រក់​ស្ថិត​នៅ​​ក្នុង​សេចក្ដី​លម្អិត​ ហើយ​សំណួរ​ដ៏សំខាន់​​គឺ​ថា តើ​ពួក​គេ​នឹង​បង្ហាញ​​សេចក្ដី​លម្អិត​​នេះ​ ឬ​យ៉ា​ង​ណា​។ នោះនឹងជា​ឧបស័គ្គ​ដ៏ធំ​ដែល​យើង​ត្រូវ​ឆ្លងកាត់​ ហើយ​នោះ​​ជា​ទី​​ដែល​​យើងស្ថិត​​នៅ​​ឆ្ងាយ​​នៅឡើយ​”៕ប៊ុននី

(រាយការណ៍​​បន្ថែម​ដោយ​ Alex Willemyns) 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស