30 C
Phnom Penh

មន្ត្រី​នគរបាល​៖ ការ​អះ​អាងថា មន្ត្រី​នគរ​បាល​កិប​កេង​ប្រាក់សម្រាប់​បើក​ឲ្យ​មន្ត្រីគឺ ​គ្មាន​មូលដ្ឋាន

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ ស្នងការ​​​ដ្ឋាន​​​គរ​បាល​ខេត្ត​កណ្តាល​បាន​និយាយ​ការពារ​មន្ត្រី​នគរ​បាល​​ស្រុក​ម្នាក់​​​​ដែលត្រូវ​​​បាន​​​ចោទថា​​​បាន​​​ប្រព្រឹត្ត​អំពើ​ពុក​រលួយ​​បន្ទាប់ពី​​បានបើក​​​ការ​​​ស៊ើប​អង្កេត​ការ​អះ​អាង​នេះ​​​​ដោយ​​ខ្លួន​ឯង​។

យោង​​តាម​សេចក្តី​​​​​​រាយ​​​ការ​ណ៍​​​ព័ត៌មាន​​​លើ​​​​គេហ​ទំព័រ​ព័ត៌មាន​ក្នុង​​ស្រុក​ CEN កាលពី​ថ្ងៃទី​៧ខែ​មេសាបាន​ឲ្យ​ដឹង​ថា លោក មាស សឿន អធិការ​រង​នគរបាល​ស្រុក​​ស្វាយ​ជ្រុំ​បាន​កិប​កេង​ប្រាក់​ដែល​ទុក​សម្រាប់​បើក​ឲ្យ​មន្ត្រី​នគរបាល​ស្រុក​ប្រហែល​១០០នាក់​ពីរ​លើក​ផ្សេង​គ្នា។

សេចក្តី​​​រាយ​​​ការណ៍​នេះមាន​​​ការ​​​អះអាង​​​​ថា មន្ត្រី​​នគរបាល​ជា​​​ដើម​​​ចោទ​​​​​​​​​​បាន​ជំរុញ​ឲ្យ​លោក កឹង កន ស្នង​ការ​នគរបាល​ខេត្ត​​ស៊ើប​អង្កេតករណី​​លោក  មាស​  សឿន ព្រោះ​គាត់​ បានកាត់ប្រាក់​១០​ដុល្លារ​ពី​ប្រាក់​ខែ​របស់ មន្ត្រី​​​នគរបាល​ម្នាក់​ៗ​​បន្ទាប់​ពី​ពួកគាត់ត្រូវ​បាន​ដំឡើង​តួនាទីនិង​​​​ទទួលបាន​ការ​​​​ដំឡើង​ប្រាក់​ខែ​កាលពី​ខែ​កុម្ភៈ ហើយ​បាន​​​កាត់ប្រាក់​២​​​ដុល្លារ​ទៀត​ពី​មន្ត្រី​នគរបាល​ម្នាក់​ៗនៅ​ពេល​មួយ​ដែល​​​​​មិន​​​ត្រូវ​​​បាន​​​បញ្ជាក់​​​​។

លិខិត​​​​​មួយ​​​ដែល​ចុះ​ផ្សាយ​នៅ​លើ​គេហ​ទំព័រ​នគរបាល​ជាតិកាលពី​ម្សិល​មិញ និង​​​ដែល​​​ចុះ​ហ​ត្ថលេខា​ដោយ​លោកវរ​សេនី​យ៍​ឯក ខៀវ សុខុម ស្នង​ការ​រង​នគរបាល​ខេត្ត​មាន​​ខ្លឹម​សារ​ថា “ករណីនេះ​គឺ​ជា​ការ​ចោទ​ប្រកាន់​ដោយ​គ្មាន​មូលដ្ឋាន”។

លិខិត​នេះ​​​​​មាន​​​ខ្លឹមសារ​​​បន្ត​​​ថា “ក្រោយ​ពី​អត្ថបទ​នេះ​​​ត្រូវ​​​បាន​​​បង្ហោះតាម​​​អុីន​​​ធើ​​​ណិត​​​នគរបាល​ជំនាញ​ថ្នាក់​ខេត្ត​…​ បាន​សហការ​ជាមួយ​នគ​របាល​ជំនាញ​ថ្នាក់​ស្រុក​​ដើម្បី​​​ធ្វើ​ការ​ស៊ើប​អង្កេត​ ហើយពុំ​​​​បាន​​​រក​​​ឃើញ​​​បញ្ហា​អ្វីឡើយ។ ករណី​កា​ត់​ប្រាក់​៨.០០០រៀល​ [ពីប្រាក់ខែ​របស់​មន្ត្រី​នគរបាល​] នេះ​​​គឺមិន​មាន​ដូច​​​ការ​អះអាង​​​ទេ​​​”។

លិខិតនេះ​​​មាន​​​ការ​​​បន្ថែម​​​​​ថា មន្ត្រី​នគរ​​​បាល​​ស្រុក​ស្វាយ​ជ្រុំ​ម្នាក់​ៗ​ស្ម័គ្រ​ចិត្ត​​​បរិច្ចាគ​ប្រាក់​ចំនួន​៣.៥០០​រៀល​​​​​ដល់​សមា​គម​មិ​ត្ត​ប៉ូលិស​ក្នុង​មួយ​ខែ​ៗ និង​​​ថា​​​មាន​តែ​មន្ត្រី​នគរ​​​បាល​៦២រូប​ប៉ុណ្ណោះ មិនមែន​១០០រូប​​​​​​​​​ទេ​​​ដែល​​​ទទួលបាន​នូវ​​​ការ​ដំឡើង​តួនាទី​ ដោយ​​​​​​បញ្ជាក់​​​​ថា “​ការ​កាត់​ប្រាក់​៤០.០០០រៀល​ពីការ​ដំឡើង​តួនាទី​នេះ​​​គឺ​​​មិន​មាន​ទេ”។

លិខិត​​នេះ​​​មាន​​​ការ​​​អះអាង​​​បន្ត​​​​​​ថា លោក មាស​ សឿន ក៏មិន​ជាប់​ពាក់ព័ន្ធក្នុង​​​ការ​បើក​ប្រាក់​ខែ​ដែរ”។ គេ​មិន​​​ច្បាស់​ថា តើ​​​មាន​​​​​​​ការ​​​ដាក់​​​ពាក្យ​​​បណ្តឹង​​​​ទៅ​អង្គភាព​ប្រឆាំង​អំពើ​ពុក​រលួយ​​ឬ​អត់​​​ទេ​​​។​​​​មន្ត្រី​នៅអង្គភាព​​​នេះ​​​មិន​អាច​ទាក់​ទង​សុំ​​​ការ​​​អត្ថាធិប្បាយ​​​បានឡើយ​​​។

ប៉ុន្តែ​​​ កាលពី​ខែ​មុន អង្គ​ភាព​​ប្រឆាំង​អំពើ​ពុក​រលួយ​​បាន​ចាប់​ខ្លួន​អតីត​​អធិការ​នគរបាល​​ស្រុក​បន្ទាយ​មាស​ពីរ​នាក់​​​ក្នុងខេត្ត​កំពត​​ពី​បទ​កិ​ប​កេង​ប្រាក់​​ជាង​​៦៤.៣៦០ ដុល្លារ​ចាប់​​​តាំង​ពី​ឆ្នាំ​២០០៨​មក។មន្ត្រី​នគរ​បាល​ទាំង​ពី​រ​រូប​នេះ​កំពុង​​ស្ថិតក្រោម​​​​ការ​ឃំុខ្លួន​​​រង់​​​ចាំ​​​ការ​​​កាត់​​​ក្តី​​​ និង​​​​ត្រូវ​​​​​​​​​ចោទ​ប្រកាន់ពី​បទ​ប្រព្រឹត្ត​អំពើ​ពុក​រលួយចំនួន​​​ប្រាំពីរ​ករណី​។

លោក អំ សំអាត អ្នក​គ្រប់​គ្រង​បច្ចេក ទេស​នៅ​អង្គការ​សិទ្ធិមនុស្ស​លីកាដូ បាន​លើក​​​ឡើង​​​ថា អង្គភាព​ប្រឆាំង​អំពើ​ពុក​រលួយ​ គួរ​យក​​​ចិត្ត​​​ទុកដាក់​​​ចំពោះ​​​ការ​អះ​អាង​ថ្មី​ៗទាំង​នេះ​​​​ហើយ​ធ្វើការ​ស៊ើប​អង្កេត​ដោយ​ខ្លួន​ឯង។ លោក​មាន​ប្រសាសន៍ថា “ចំពោះ​ ករណី​ដែល​នគរបាល​ជាប់​ពាក់ព័ន្ធ​ក្នុង​ការ​​កិប​កេង​ប្រាក់​ គួរ​តែ​មាន​ស្ថាប័ន​ឯក​រាជ្យ​​​ឬ​យ៉ាង​ហោចណាស់​​​​​មាន​​​អង្គ​ភាពប្រឆាំង​អំពើ​ពុក​រលួយ​ធ្វើ​ការ​ស៊ើប​អង្កេត​ ហើយធ្វើ​ឲ្យ​ប្រាកដ ​ថា មាន​ត​ម្លា​ភាព​​​​ក្នុង​​​​លទ្ធផល​​​​នៃ​​​ការ​​​សុើប​​​អង្កេត​​​របស់​ខ្លួន”៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស