នគរបាលបានឲ្យដឹងកាលពីម្សិលមិញថាបុរសម្នាក់ត្រូវបានគេកាប់ស្លាប់នឹងពូថៅកាលពីថ្ងៃពុធ បន្ទាប់ពីគាត់បានតទល់ជាមួយបុរសមួយក្រុមមានគ្នាបីនាក់ ដែលបានវាយដំកូនស្រីអាយុ១២ឆ្នាំរបស់គាត់នៅកន្លែងរាំកម្សាន្តមួយក្នុងពិធីអបអរបុណ្យចូលឆ្នាំខ្មែរ។
លោក ឈិត សេង អធិការរងនគរបាលស្រុក បានឲ្យដឹងថា ជនរងគ្រោះឈ្មោះ វ៉ន សាវ៉េត អាយុ៣៨ឆ្នាំ បានដើរសំដៅទៅបុរស ទាំងនោះ និងបានសួរនាំពួកគេ ដែលបានវាយកូនស្រីរបស់គាត់អំឡុងពិធីជប់លៀងនៅក្នុងស្រុកសំពៅលូន ខេត្តបាត់ដំបង។
លោក ឈិត សេង បានឲ្យដឹងបន្ថែមទៀតថា បន្ទាប់មកទៀត បុរសម្នាក់ក្នុងចំណោមបុរសទាំងនោះខឹងនឹងការសួរនាំរបស់ជនរងគ្រោះឈ្មោះ វ៉ន សាវ៉េតហើយក៏បានទាញពូថៅកាប់ជនរងគ្រោះស្លាប់តែម្តង។
លោកបានមានប្រសាសន៍បន្ថែមទៀតថា “សាវ៉េត ត្រូវបានគេកាប់បីពូថៅចំក្បាលនិងខ្លួន ហើយបានស្លាប់នៅមន្ទីរពេទ្យ”។
លោក ឈិត សេង បានឲ្យដឹងបន្ថែមទៀតថា ជនសង្ស័យម្នាក់ឈ្មោះ សឿង សុរ៉ាប់ អាយុ១៨ឆ្នាំ ត្រូវបានចាប់ខ្លួនភ្លាម បន្ទាប់ពីហេតុការណ៍នេះកើតឡើង ចំណែកជនដៃដល់ផ្សេងទៀតកំពុងរត់គេចខ្លួន។
លោកបានបន្តថា នគរបាលបានសាកសួរ ជនដៃដល់ឈ្មោះសុរ៉ាប់ ដែលបានឲ្យដឹងថា ជនដៃដល់ពីរនាក់ទៀតមានឈ្មោះ ហ៊ុយមីន អាយុ២២ឆ្នាំ និងឈ្មោះ ញ៉ា អាយុ២៦ឆ្នាំ ដែលបានកាប់ វ៉ន សាវ៉េត។
លោក ឈិត សេង មានប្រសាសន៍ថា “នគរបាលនឹងបញ្ជូនឈ្មោះ សុរ៉ាប់ ទៅតុលាការ និងតាមចាប់ខ្លួនជនសង្ស័យពីរនាក់ទៀត”។ លោកបានបន្ថែមថា សាកសពជនរងគ្រោះឈ្មោះ វ៉ន សាវ៉េត ត្រូវបានបញ្ជូនទៅឲ្យក្រុមគ្រួសារសពកាលពីម្សិលមិញដើម្បីធ្វើបុណ្យតាមប្រពៃណី៕ ប៊ុននី