27.6 C
Phnom Penh

ក្រុម​អ្នក​ភូមិ​​​​ធ្វើ​​​ការ​​​តវ៉ា​​​ទាមទារ​​​​ឲ្យបញ្ឈប់​​​ការងារ​​​របស់​​​នាយ​រង​​​ប៉ុស្តិ៍​​ដែល​​​ប្រើ​​​កាំភ្លើង​​​បញ្ចប់​​​ជម្លោះ​​​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​​​​ អ្នក​ភូមិ​ជា​ច្រើន​នាក់​បាន​ប្រមូល​ផ្តុំគ្នា​​​​តវ៉ា​​​នៅ​ខាងក្រៅ​​សាលាឃុំ​​សំឡី​ក្នុ​ង​ខេត្ត​ស្វាយ​រៀង​ទាម​ទារ​ឲ្យ​បញ្ឈប់​​​ការងារ​​​របស់​​​​នាយ​រង​ប៉ុស្តិ៍ដែល​​​​ប្រើ​​​​កាំភ្លើង​អាកា-៤៧​របស់ខ្លួន​​​​បាញ់​បំបែក​ការ​​​ប្រវាយ​​​ប្រតប់​​​គ្នា​​​មួយ​ពាក់​ព័ន្ធ​នឹង​​​កូនប្រុស​របស់ខ្លួន​​​​កាលពី​ថ្ងៃ​ពុធ។

យោ​ង​តាម​លោក ហែម សាមុត​ អធិ​ការ​នគរបាល​ស្រុក​កំពង់​រោទិ៍​បាន​ឲ្យ​ដឹង​ថា មាស សុភ័ណ អាយុ​២៨ឆ្នាំ និង​ មាស សុផាន អាយុ​២៥ឆ្នាំ​​ជាកូន​របស់លោក ម៉ាសា ធួន នាយរង​​​​ប៉ុស្តិ៍ឃុំ​សំឡី​បាន​​​ស្រវឹង​ស្រា ហើយ​បាន​បិទ​​​ផ្លូវ​ដោយ​គ្មាន​មូល​ហេតុ​​នៅ​​​​ខាង​​​ក្រៅ​ពិធី​​​​ជប់​​​លៀង​​​អបអរ​​​ថ្ងៃ​​​បុណ្យ​ចូលឆ្នាំ​ខ្មែរ​មួយ​នៅក្នុង​ភូមិ​​សំឡី​ខាងជើង​។

ពេល​នោះ​ក៏​​​មាន​​​​ការ​​​​​​ប្រវាយ​​​ប្រតប់​​​រវាង​​អ្នក​បើក​បរ​យាន​យន្ត​​​​ប្រហែល​១០​នាក់​និង​បង​​ប្អូន​បង្កើត​ទាំង​ពីរ​នាក់​​​​ដែល​ត្រូវ​បាន​វាយ​ដំបែក​ឈាម​​​និង​​​បាន​ទូរស័ព្ទ ហៅ​​​ឪពុក​របស់​ខ្លួន​​​ឲ្យ​មក​ជួយ​​​នេះ​​​។

លោក សាមុ​ត ​​​​​បន្ត​​​ថា ពេល​​​នោះ ​​​លោក ធួន ដែល​​​យក​​​កាំភ្លើង​​​​មក​​​ជា​​​មួយផង​​​​​​ ​បាន​មក​ដល់​​​​កន្លែង​​​កើត​​​ហេតុ​​​ រួច​​​​​​ក៏​​​​​​​សួរ​​​រក​​​មូលហេតុ​​​ដែល​​​គេ​​​​វាយ​ដំ​​​កូន​ប្រុស​របស់ខ្លួន​​​។

ភ្លាម​​​នោះ​​​ អ្នក​ភូមិ​មួយ​ក្រុម​​​​មាន​​​គ្នា​​​ជាង​២០នាក់​បាន​ឡោម​​ព័ទ្ធ​គា​ត់​និង​​​​បាន​ព្យាយាម​ដណ្តើម​យក​កាំភ្លើង​​អាកា-៤៧​​​ពី​​​ដៃ​​​គាត់​​​។​​​​​​ គឺ​​​ពេល​​​នោះ​​​ហើយ​​​ដែល​​​​លោក​ ​ធួន ​បាញ់​ឡើង​លើ​​​ដើម្បី​​​បំបែក​​​​​​ក្រុម​​​អ្នកចោម​​​​​​រោម​​​ខ្លួន​​​​។​​​ពុំ​​​​​​​មានអ្នក​​​ណា​ម្នាក់​រង​របួស​​​​ដោយ​​​​​​សារ​​​គ្រាប់​​​កាំ​​​ភ្លើង​​​នេះ​​​​​​ទេ។

​លោក សាមុត បាន​អះអាង​​​ថា បើ​ទោះបី​​​​ជា​​​​​​​លោក ធួន​និង​កូន​ប្រុស​របស់ខ្លួន​​​​​​​​​ទំនង​​​ជា​​​​​​អ្នក​​​ខុស​​​មែន​​​ក៏​​​ដោយ​​​ ក៏​​​​​​​លោក​​​​​គ្មាន​​​​សិទ្ធិ​ដាក់​ទោស​នាយ​រងប៉ុស្តិ៍​នេះ​​​​ដោយ​​​ផ្ទាល់​​​ដែរ​​​។​​​ លោកបាន​​​អះអាង​​​​ថា “ខ្ញុំ​បាន​បញ្ជូន​​​របាយ​​​ការណ៍​ទៅស្នងការ​​​ដ្ឋាន​​​​នគរបាល​ខេត្ត​ឲ្យ​សម្រេច​ពី​​រឿង​​នេះ​​​ហើយ​​​”។

លោក ចាន់ ទិន នាយប៉ុស្តិ៍ឃុំសំឡី បាន​​ជំរុញ​ឲ្យ​ក្រុម​អ្នក​ភូមិ​​ដាក់​ពាក្យ​បណ្តឹង​មក​​ការិយាល័យ​របស់លោក​ជា​ជាង​ធ្វើការ​តវ៉ា​។ លោក​បាន​មាន​ប្រសាសន៍ថា “ក្រុម​អ្នក​ភូមិ​ទាំង​នេះ​បាន​មក​ការិយាល័យ​របស់​ខ្ញុំ​នៅ​ម៉ោង​ប្រហែល​៥ល្ងាច​ថ្ងៃពុធ ហើយ​ទាម​ទារ ​ឲ្យ​បញ្ឈប់​​​​លោក ម៉ាសា ធួន ពី​​​ការងារ​​​ ព្រោះ​កូន​ប្រុស​របស់គា​ត់​​បាន​​​ប្រើ​អំពើ​ហិង្សា​ច្រើន​លើក​​ច្រើន​សា​មក​ហើយ​នៅ​ក្នុង​ភូមិ។ ខ្ញុំ​បាន​ប្រាប់​ពួកគាត​់​ឲ្យ​ដាក់​ពាក្យ​បណ្តឹង​…​ហើយ​ខ្ញុំ​នឹង​ដោះស្រាយ​បញ្ហា​នោះ”។

ក្រុម​អ្នក​ភូមិ​បាន​​​ឲ្យ​ដឹង​ថា ពួកគាត់​​​​ជាង​២០០នាក់​មកពី​ភូមិ​សំឡី​ខាង​ជើង​​បាន​ផ្តិត​មេដៃ​លើ​ញត្តិមួយ​​​​ទាមទារ​​​ឲ្យ​ដក​លោក ធួន ចេញ ពី​​តួនាទី​​​​ដោយ​សារ​កូន​ប្រុស​របស់គា​ត់​ដែល​​​ចូលចិត្តបង្ក​បញ្ហា​​។

អ្នក​ត​វ៉ា​ម្នាក់​ឈ្មោះ ​គង់ បេសពិសិដ្ឋ​ បាន​និយាយថា “យើង​​មិន​​ត្រូវ​ការ​លោក ធួន ទេ។ គា​ត់​គ្រប់​គ្រង​កូន​ខ្លួន​ឯង​​​មិន​​​ទាំង​​​​បាន​ផង ​​​ធ្វើ​​​ម៉េច​​​អាច​គ្រប់​គ្រង​ឃុំ​​​​នេះ​​​បាន​​?”។

លោក សាមុត​ អធិការ​នគរបាល​ស្រុក​បាន​​​ឲ្យ​​​ដឹង​​​ថា​​​ បងប្អូន​ត្រកូល​​​​មាស​​​នេះ ​​​ម្នាក់​​ត្រូវ​បាន​វាយ​ចំ​ថ្ងាស​​​ ត្រូវ​ដេរ​១៣​ថ្នេរត្រង់​​​​របួស​ក្បាល​ពី​រ​​​កន្លែង​ផ្សេង​គ្នា​​​ ម្នាក់​​​ទៀត​​​ជា​​ប្អូន​បាន​​​រយះចង្កា ត្រូវ​ដេរ​ប្រាំ​ថ្នេរ។ បុរស​ជា​ឪពុក​​បាន​និយាយ​ការ​ពារ​ទង្វើ​របស់ខ្លួន​​​កាលពី​ម្សិល​មិញ។

លោក ម៉ាសា ធួន បាន​​​និយាយ​​​ថា ​​​“ខ្ញុំ​បាន​ព្យាយាម​ជួយ​កូន​ប្រុស​របស់ខ្ញុំ​​​​ព្រោះ​​​​ពួកគេ​​​​​​វាយ​កូន​ប្រុសរបស់​​​​​​​ខ្ញុំ​។​​​វា​​​អយុត្តិធម៌ណាស់ ពីព្រោះ​មនុស្ស​​​​ជា​​​ច្រើន​​​បាន​​​​ព្រួត​គ្នា​វាយ​កូន​ប្រុស​របស់​ខ្ញុំ”៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស