កម្មករជាង២.០០០នាក់នៅរោងចក្រចំនួនបីក្នុងក្រុងបាវិត ខេត្តស្វាយរៀង បានធ្វើកូដកម្មកាលពីថ្ងៃសៅរ៍ ដោយអះអាងថា ថៅកែរបស់ពួកគេមិនបើកប្រាក់សម្រាប់ថ្ងៃឈប់សម្រាកឲ្យពួកគេ។
កូដករឈ្មោះ ហេង ដាវី បាននិយាយថា កម្មករប្រហែល៥០០នាក់នៅរោងចក្រយូលី ដែលផលិតសម្លៀកបំពាក់ទារកបានធ្វើកូដកម្មកាលពីថ្ងៃសៅរ៍ ពីព្រោះអ្នកគ្រប់គ្រងរោងចក្រមិនព្រមបើកប្រាក់ឈ្នួលសម្រាប់ថ្ងៃព្រហស្បតិ៍ឲ្យពួកគេ បន្ទាប់ពីកម្មករបានឈប់សម្រាកនៅថ្ងៃនោះ ដោយគ្មានការអនុញ្ញាត។
នាងបាននិយាយថា “យើងបានសុំឲ្យពួកគេអនុញ្ញាតឲ្យយើងត្រឡប់មកធ្វើការវិញនៅថ្ងៃទី១៨ ខែមេសា ក្រោយថ្ងៃចូលឆ្នាំខ្មែរ ប៉ុន្តែពួកគេបដិសេធសំណើរបស់យើង ហើយពួកគេបានទាមទារឲ្យយើងត្រឡប់មកធ្វើការវិញនៅថ្ងៃទី១៧ ខែមេសា។ យើងនឹងបន្តធ្វើកូដកម្មរហូតដល់ពួកគេឈប់កាត់ប្រាក់ខែរបស់យើង។
កម្មករប្រហែល២.០០០នាក់នៅរោងចក្រផលិតកង់ចំនួនពីរក្នុងក្រុងបាវិតក៏បានធ្វើកូដកម្មដែរកាលពីថ្ងៃសៅរ៍ ពីព្រោះថៅកែរបស់ពួកគេមិនបើកប្រាក់សម្រាប់ថ្ងៃដែលពួកគេឈប់សម្រាកដូចរោងចក្រមួយទៀតនៅក្បែរនោះ ដែលបានបើកប្រាក់ឲ្យកម្មករម្នាក់៥០ដុល្លារជាប្រាក់រង្វាន់សម្រាប់ការមិនចូលរួមធ្វើកូដកម្មរយៈពេលពីរបីខែមកនេះទេ។
មុំ សម្ផស្ស ជាកម្មករនៅរោងចក្របេសវ៉េ អុីនដាស្ទ្រៀល បាននិយាយថា យើងបានធ្វើកូដកម្មកាលពីម្សិលមិញ ពីព្រោះយើងចង់ឲ្យរោងចក្រនេះបើកប្រាក់ឲ្យយើងចំនួន៥០ដុល្លារ ដែលពួកគេបានសន្យាបន្ទាប់ពីយើងចូលធ្វើការដូចធម្មតា”។
ទោះជាយ៉ាងណា កម្មករផ្សេងទៀតនៅរោចក្រនេះបាននិយាយថា ថៅកែរបស់ពួកគេមិនដែលសន្យាផ្ដល់ប្រាក់បន្ថែម៥០ដុល្លារនោះទេ ប៉ុន្តែនៅតែមានអារម្មណ៍មិនសប្បាយចិត្តចំពោះការមិនទទួលបានប្រាក់ដូចគ្នានេះ។
សុខ ខេមរា កម្មករនៅរោងចក្រស្មាតតិច ជារោងចក្រផលិតកង់មួយទៀត ដែលបានធ្វើកូដកម្មកាលពីម្សិលមិញ បាននិយាយថា ពួកគេក៏កំពុងទាមទារឲ្យរោងចក្រទទួលយកកម្មករ៤៥នាក់ ដែលត្រូវបានបណ្ដេញចេញចំពោះការដឹកនាំធ្វើកូដកម្មកាលពីមុននោះចូលធ្វើការវិញ ព្រមទាំងទាមទារប្រាក់ឧបត្ថម្ភ៥០ដុល្លារ។
ខេមរា បាននិយាយថា “រោងចក្របំពានច្បាប់ការងារ ពីព្រោះពួកគេបណ្ដេញតំណាងកម្មករដោយគ្មានមូលហេតុច្បាស់លាស់។ យើងមិនអាចទទួលយករឿងនេះបានទេ ហើយយើងនឹងបន្តធ្វើកូដកម្មរហូតដល់យើងទទួលបានដំណោះស្រាយសមស្របពីរោងចក្រ”។ គេមិនអាចទាក់ទងតំណាងរោងចក្រទាំងនេះបានទេ។
ទោះជាយ៉ាងណា លោក កែវ សុខន អធិការរងនគរបាលក្រុងបាវិត បានបញ្ជាក់ថា កូដកម្មនេះបានកើតឡើងមែន ហើយមានប្រសាសន៍ថា កម្មករមិនព្រមចរចាជាមួយម្ចាស់រោងចក្រទេ។លោកបានមានប្រសាសន៍ថា “នៅរោងចក្រទាំងបីនេះមិនទាន់មានដំណោះស្រាយទេ ពីព្រោះកម្មករមិនព្រមចូលចរចាទេនៅពេលរោងចក្រទាមទារឲ្យតំណាងរបស់ពួកគេចូលមកចរចា”។
សឿន សុទ្ធ ដែលបានចូលរួមកូដកម្មនៅរោងចក្រស្មាតតិច បាននិយាយថា កម្មករចង់ឲ្យសហការីរបស់ពួកគេដែលត្រូវបានបណ្ដេញចេញនោះធ្វើជាតំណាងពួកគេ ប៉ុន្តែរោងចក្រមិនព្រម។
កូដកម្មនៅក្រុងបាវិតនេះកើតមានឡើងចំពេលមានការធ្វើកូដកម្មស្នាក់នៅផ្ទះដាច់ដោយឡែកមួយទៀត ដែលរៀបចំឡើងដោយសហជីពមួយក្រុមចំនួនប្រាំបីនៅក្នុងឧស្សាហកម្មកាត់ដេរ។
សហជីពបានជំរុញកម្មករកាត់ដេរប្រហែល៦០០.០០០នាក់នៅក្នុងប្រទេសកុំឲ្យចូលធ្វើការចន្លោះពីថ្ងៃទី១៧ ខែមេសា ដល់ថ្ងៃទី២២ ខែមេសា ដើម្បីដាក់សម្ពាធរដ្ឋាភិបាល និងរោងចក្រឲ្យដំឡើងប្រាក់ខែគោលនៅក្នុងវិស័យនេះពី១០០ដុល្លារដល់១៦០ដុល្លារ។ ពួកគេក៏ទាមទារឲ្យដោះលែងមន្ត្រីសហជីព និងកម្មករចំនួន២១នាក់ ដែលត្រូវបានចាប់ខ្លួននៅពេលធ្វើកូដកម្មកាលពីលើកមុនក្នុងខែមករា ហើយពេលនេះកំពុងប្រឈមការផ្ដន្ទាទោសពីបទញុះញង់ឲ្យមានអំពើហិង្សា និងការបំផ្លិចបំផ្លាញទ្រព្យសម្បត្តិ។
រោងចក្រជាច្រើនបានចរចាឲ្យកម្មករឈប់សម្រាកមួយថ្ងៃ ឬពីរថ្ងៃទៀតក្រោយថ្ងៃចូលឆ្នាំខ្មែរ។ ប៉ុន្តែរោងចក្រមួយចំនួនបានទាមទារឲ្យពួកគេត្រឡប់មកធ្វើការវិញនៅថ្ងៃទី១៧ ហើយសហជីពមួយដែលនៅពីក្រោយការធ្វើកូដកម្មនេះបានលើកឡើងថា កម្មករភាគច្រើនទំនងជាវិលត្រឡប់មកធ្វើការវិញមុនកាលកំណត់។
លោក ជា មុនី ប្រធានសហជីពសេរីកម្មករ មានប្រសាសន៍ថា “នៅថ្ងៃទី២១ ខែមេសា កម្មករ៨០ភាគរយនឹងធ្វើការដូចធម្មតា បន្ទាប់ពីពួកគេបានឈប់សម្រាកពីរបីថ្ងៃបន្ថែមទៀត។ ពួកគេត្រូវត្រឡប់មកធ្វើការវិញ ព្រោះពួកគេបានឈប់សម្រាកច្រើនថ្ងៃរួចហើយ ហើយពួកគេត្រូវការលុយ”។
ថ្វីបើកម្មករភាគច្រើនមិនស្នាក់នៅផ្ទះរហូតដល់ថ្ងៃពុធ ដូចដែលសហជីពបានជំរុញឲ្យពួកគេធ្វើនោះក៏ដោយ ក៏លោក ជា មុនី បានអះអាងថា កូដកម្មស្នាក់នៅផ្ទះនេះមិនមែនជាការបរាជ័យទេ។
លោកបានមានប្រសាសន៍ថា ទោះបីជារោងចក្រឲ្យកម្មករឈប់សម្រាកមួយថ្ងៃឬពីរថ្ងៃក្រោយថ្ងៃចូលឆ្នាំក៏ដោយ ក៏វានឹងកាត់បន្ថយផលិតកម្មរបស់រោងចក្រដែរ ហើយពួកគេមិនអាចបំពេញតាមការបញ្ជាទិញដូចការគ្រោងទុកដែរ”។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្ពុជា ក៏បាននិយាយដែរថា កម្មករភាគច្រើននឹងត្រឡប់ចូលធ្វើការវិញ ដោយលោកសង្ឃឹមថា កម្មករប្រហែល៦០ភាគរយនឹងត្រឡប់ទៅធ្វើការវិញនៅថ្ងៃស្អែក ហើយ៤០ភាគរយនឹងនៅធ្វើកូដកម្មរហូតដល់ថ្ងៃពុធ។
លោកបាននិយាយថា “នេះមិនមែនជាការបរាជ័យទេ ពីព្រោះរោងចក្រមួយចំនួនអនុញ្ញាតឲ្យពួកគេឈប់សម្រាកមួយថ្ងៃនៅថ្ងៃទី១២ ហើយយើងបានមើលឃើញមានការចូលរួមជាច្រើន។ រោងចក្រ៨០ភាគរយបានបិទទ្វារ [ក្រោយថ្ងៃចូលឆ្នាំ] ដូច្នេះនេះគឺជាជោគជ័យដ៏ធំមួយ”។
សមាគមរោងចក្រកាត់ដេរនៅកម្ពុជានិយាយថា រោងចក្រមួយចំនួនបានឲ្យកម្មករឈប់សម្រាកបន្ថែមទៀត ហើយរោងចក្រមួយចំនួននឹងឲ្យកម្មករធ្វើការនៅថ្ងៃអាទិត្យពីរឬបីថ្ងៃវិញ ដើម្បីសងចំពោះការពន្យារពេលថ្ងៃឈប់សម្រាកនេះ៕គឹមហឿន