29 C
Phnom Penh

រដ្ឋាភិបាល​រៀបចំ​សេចក្តី​ព្រាង​កិច្ច​ព្រម​ព្រៀង​​ជួស​ជុល​រថ​ក្រោះ​​ជាមួយ​ក្រុមហ៊ុន​ម៉ាឡេ​ស៊ី​

ដោយ ឌឹ ខេមបូឌា ដេលី

បទវិភាគ

យោង​តាមទី​ភ្នាក់​ងារ​ព័ត៌មាន​រដ្ឋ​ បឺណាម៉ា​ (Bernama)​​ បាន​ឲ្យ​ដឹង​ថា រដ្ឋាភិបាល​ជិត​ចុះ​ហត្ថលេខា​លើ​កិច្ច​សន្យា​រយៈពេល​ច្រើន​ឆ្នាំ​ដែល​មាន​តម្លៃ​យ៉ាង​តិច​៥០​លាន​ដុល្លារ​ជាមួយ​​ក្រុមហ៊ុន​ម៉ៅ​ការ​​ផ្នែក​ការ​ពារ​ជាតិ​មួយ​នៅ​ប្រទេស​​ម៉ាឡេ​ស៊ី​ ដើម្បី​ឲ្យ​ក្រុមហ៊ុន​នេះ​រុះ​រើ​​និង​ថែ​ទាំ​រថ​ក្រោះ ​T-55 ជា​ច្រើន​គ្រឿង​របស់​ប្រទេស​​កម្ពុជា​។ 

លោក​ អាំរីល សាំស៊ូឌីន (Amril Samsudin) ប្រធាន​នាយក​ប្រតិបត្តិ​ក្រុមហ៊ុន​ ឌីអប៊ី ហាយខំ​ ឌីហ្វិន តិចណូឡូជី (DRB Hicom Defense Technologies) បាន​ប្រាប់​ទី​ភ្នាក់​ងារ​ព័ត៌មាន​ បឺណាម៉ា ថា កិច្ច​ព្រម​ព្រៀង​រយៈពេល​ប្រាំ​ឆ្នាំ​ក្នុង​ចំនួន​ទឹក​ប្រាក់​ចន្លោះ​ពី​៥០​លាន​ដុល្លារ​ទៅ​៦០​លាន​​ដុល្លារ​នេះ​កំពុង​ត្រូវ​បាន​រៀប​ចំ​។ លោក​ សាំ​ស៊ូ​ឌីន​ ​ឲ្យ​ដឹង​​បែប​នេះ​នៅ​ក្រៅ​កម្មវិធី​បង្ហាញ​ផ្នែក​ការ​ពារ​ និង​សន្តិសុខ​ជាតិ​ក្នុង​ទី​ក្រុង​គូឡា​ឡាំពួរ ​កាល​ពី​ថ្ងៃ​ព្រហស្បតិ៌​សប្តាហ៍​មុន​។

លោក​ត្រូវ​បាន​ដក​ស្រង់​សម្តី​ដែល​លើក​ឡើង​ថា “យើង​កំពុង​​រៀប​ចំ​បញ្ចប់​កិច្ច​ព្រម​ព្រៀង​ជា​មួយ​រដ្ឋា​ភិបាល​​​កម្ពុជា​ សម្រាប់​ការ​ងារ​ថែទាំ​ ជួសជុល​​ និង​រុះ​រើ​​រថក្រោះ​ T-55។ គម្រោង​នៅក្នុង​​ប្រទេស​កម្ពុជា​នេះ​មាន​ភាព​អំណោយ​ផល​ខ្លាំង​ទាំង​ទំហំ​​រថក្រោះ​ សម្រាប់​​សេវាកម្ម​ជួសជុល​ ថែទាំ​ និង​រុះ​រើ​នេះ​”។

លោក​ឧត្តម​សេនីយ៍ ណឹម​ សុវត្ថិ​ ដែល​បាន​​ចូល​រួម​ជា​គណៈ​ប្រតិភូ​របស់​ប្រទេស​កម្ពុជា​នៅ​ក្នុង​កម្មវិធី​បង្ហាញ​ផ្នែក​ការ​ពារ​និង​សន្តិសុខ​នោះ​ បាន​លើក​ឡើង​ថា​ លោក​មិន​បាន​ដឹង​​អំពី​កិច្ច​ព្រម​ព្រៀង​នេះ​ទេ​ ហើយ​បាន​បង្វែរ​សំណួរ​ទៅ​លោក​ឧត្តម​សេនីយ៍​ នាង​ ផាត​ ដែល​​​​បាន​ចួល​រួម​ក្នុង​កម្មវិធី​នោះ​ផងដែរ​។ ក៏​ប៉ុន្តែ​ លោក​ឧត្តម​សេនីយ៍​ នាង​ ផាត​ បាន​បដិសេធ​មិន​​ធ្វើ​សេចក្តី​អត្ថាធិប្បាយ​។

លោក​ឧត្តម​សេនីយ៍​ទោ ពៅ​ ស៊ីថា មេ​បញ្ជាការ​កង​រថក្រោះ​នៃ​ក្រសួង​ការ​ពារ​ជាតិ​ បាន​លើក​ឡើង​ថា​ លោក​ក៏​មិន​ដឹង​អំពី​កិច្ច​ព្រម​ព្រៀង​នេះ​ដែរ​ ហើយ​បាន​បដិសេធ​មិន​ប្រាប់​ឲ្យ​ដឹង​ថា តើ​ប្រទេស​កម្ពុជា​មាន​រថក្រោះ​​ ​T-55 ប៉ុន្មាន​គ្រឿង​ដែរ៕​សុធា

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស