26.3 C
Phnom Penh

មជ្ឈមណ្ឌល​សិទ្ធិ​មនុស្ស​កម្ពុជា​ជំរុញ​ឲ្យ​មាន​កិច្ច​ពិគ្រោះ​យោបល់​អំពី​ច្បាប់​កែ​ទម្រង់​ប្រព័ន្ធ​យុត្តិធម៌​

ដោយ ឌឹ ខេមបូឌា ដេលី

បទវិភាគ

មជ្ឈមណ្ឌល​សិទ្ធិ​មនុស្ស​កម្ពុជា​ បាន​ចេញ​សេចក្តី​ថ្លែង​ការណ៍​មួយ​កាល​ពី​ម្សិល​មិញ​ ដើម្បី​​រិះ​គន​់​សេចក្តី​អនុម័ត​របស់​ទី​ស្តី​ការ​គណៈ​រដ្ឋ​មន្ត្រី​លើ​ច្បាប់ចំនួន​​បី​ដែល​គេ​រង់​ចាំ​ជា​យូរ​មក​​ហើយ​​​ ពោល​គឺ​ច្បាប់​កែ​ទម្រង់​ប្រព័ន្ធ​យុត្តិធម៌​ ដោយ​បាន​លើក​ឡើង​ថា សេចក្តី​អនុ​ម័ត​ច្បាប់​​ទាំង​នេះ​​មាន​ការ​ខ្វះខាត​​កិច្ច​ពិគ្រោះ​យោ​បល់​​​ជា​សាធារណៈ​​សម​​​ស្រប​។

កាល​ពី​ថ្ងៃ​សុក្រ​សប្តាហ៍​មុន​ លោក​នាយក​រដ្ឋ​មន្ត្រី​ ហ៊ុន​ សែន​ បាន​ធ្វើ​ជា​អធិបតី​ក្នុង​កិច្ច​ប្រជុំ​មួយ​នៅ​ទី​ស្តី​ការ​គណៈ​រដ្ឋ​មន្ត្រី​ ដែល​មាន​​គោល​បំណង​អនុម័ត​ច្បាប់​​បី​ស្តី​ពី​ការ​ប្រព្រឹត្ត​ទៅ​របស់​តុលា​ការ​ ស្ថាប័ន​ត្រួត​ពិនិត្យ​ប្រព័ន្ធ​យុត្តិធម៌​ និង​តួនាទី​របស់​ចៅ​ក្រម​ និង​ព្រះ​រាជ​អាជ្ញា​ទាំង​ឡាយ​។

លោក ​ផៃ​ ស៊ីផាន​ អ្នក​នាំ​ពាក្យ​ទី​ស្តី​ការ​គណៈ​​​រដ្ឋមន្ត្រី​​បាន​ឲ្យ​ដឹង​កាល​ពី​ថ្ងៃ​សុក្រ​​ថា ច្បាប់​ទាំង​បី​នេះ​នឹង​ត្រូវ​បាន​បង្ហាញ​ដល់​រដ្ឋ​សភា​​សម្រាប់​អនុម័ត​​នៅ​​ថ្ងៃ​នេះ ឬ​ថ្ងៃ​ស្អែក​។

សេចក្តី​ថ្លែង​ការណ៍​របស់​មជ្ឈមណ្ឌល​សិទ្ធិ​​មនុស្ស​​កម្ពុជា​បាន​លើក​ឡើងថា​ មិនគួរ​មាន​ការ​អនុម័ត​បែប​នេះ​ទេ​ លុះ​ត្រា​តែ​មាន​ការ​យល់​ព្រម​ពី​គណ​បក្ស​សង្គ្រោះ​ជាតិ​ថា បញ្ចប់​ការ​ធ្វើ​ពហិការ​របស់​ខ្លួន​ចំពោះ​អាសនៈ​សភា​ទាំង​៥៥​ ហើយ​ច្បាប់​ទាំង​នេះ​គួរ​តែ​ត្រូវ​បាន​ពិភាក្សា​ជា​សាធារណៈ​ក្នុង​ពេល​ឆាប់​ៗ​នេះ​។

សេចក្តី​ថ្លែង​ការណ៍​នោះ​មាន​ខ្លឹម​សារ​ថា “វា​ជា​រឿង​ចាំ​បាច់​ដែល​រដ្ឋ​សភា​ផ្សព្វផ្សាយ​សេចក្តី​ព្រាង​ច្បាប់​ទាំង​នេះ​ជា​សាធារណៈ​ដើម្បី​​អនុញ្ញាត​ឲ្យ​ភាគី​ពាក់​ព័ន្ធ​រួម​ទាំង​សង្គម​ស៊ីវិល​ អ្នក​ជំនាញ​ផ្នែក​ច្បាប់​ និង​សាធារណ​ជន​ទូទៅ​ផ្តល់​ប្រតិកម្ម​តប​ និង​យោបល់​”។

កាល​ពី​ម្សិល​មិញ លោក​ ផៃ​ ស៊ី​ផាន​ បាន​រិះគន់​សេចក្តី​អះ​អាង​របស់​មជ្ឈមណ្ឌល​សិទ្ធិ​មនុស្ស​កម្ពុជា​ ដែល​ថា ​រដ្ឋាភិបាល​​កំពុងតែ​ជំរុញ​ច្បាប​់​ទាំង​បី​នេះ​​ដោយ​មាន​កិច្ច​ពិគ្រោះ​យោ​ប​ល់​តិច​តួច​នៅ​ខាង​ក្រៅ​គណ​បក្ស​ប្រជា​ជន​កម្ពុជា​។

លោក​បាន​មាន​ប្រសាសន៍​សំដៅ​ទៅ​លើ​មជ្ឈមណ្ឌល​សិទ្ធិ​មនុស្ស​កម្ពុជា បង្កើត​ឡើង​ដោយ​លោក​ កឹម សុខា​ ដែល​បច្ចុប្បន្ន​នេះ​គឺ​ជាអនុ​​ប្រធាន​គណបក្ស​សង្គ្រោះ​ជាតិ ដូច្នេះ​ថា “ហេតុ​អ្វី​បាន​ជា​អង្គការ​សិទ្ធិ​មនុស្ស​នេះ​ថ្កោល​ទោស​រដ្ឋាភិបាល​?” លោក​បាន​មាន​ប្រសាសន៍​បន្ថែម​ទៀត​ថា  “គេ​គ្រាន់​តែ​ជា​អង្គការ​ក្រៅ​រដ្ឋាភិបាល​តូច​មួយ​ប៉ុណ្ណោះ​។ រដ្ឋាភិបាល​គឺ​ជា​រដ្ឋាភិបាល​ស្របច្បាប់​”។

លោក​ ស៊ី​ផាន​ បាន​មាន​ប្រសាសន៍​បន្ថែម​ទៀត​ថា “យើង​ធ្វើ​អ្វី​ៗទៅ​តាម​ច្បាប់​​ ហើយ​យើង​បាន​​ពិភាក្សា​អំពី​ច្បាប់​ថ្មី​ទាំង​បី​នេះ​ជា​មួយ​ក្រុម​អ្នក​ច្បាប់​អន្តរជាតិ​”។ ក៏​ប៉ុន្តែ ​លោកបាន​បដិសេធ​មិន​ប្រាប់​ឈ្មោះ​ក្រុម​អ្នក​ច្បាប់​ទាំង​នោះ​ទេ​។ លោក​ស្រី​​ មូរ សុខហួរ​ ជា​តំណាង​រាស្ត្រ​ជាប់​ឆ្នោត​មក​ពី​គណ​បក្ស​ប្រឆាំង បាន​លើក​ឡើង​ថា វេទិកា​សាធារណៈ​ស្តី​ពី​សេចក្តី​​ព្រាង​ច្បាប់​ទាំង​បី​នេះ​ គួរ​តែ​ត្រូវ​បាន​រៀប​ចំ​ឡើង​មុន​ពេល​ច្បាប់​ទាំង​នេះ​ត្រូវ​បាន​បញ្ជូន​ទៅ​រដ្ឋសភា​។

លោក​ស្រី​ សុខ​ហួរ​ បាន​មាន​ប្រសាសន​៍​ថា “ការ​ពិភាក្សា​ជាមួយអ្នក​ជំនាញ​​ខាង​ក្រៅ​មិន​មែន​ជា​រឿង​ខុស​ឆ្គង​ទេ​”។ លោក​ស្រី​បាន​ថ្លែងបន្ត​ទៀត​ថា“ក៏ប៉ុន្តែ​អ្នកជំនាញ​​​ក្នុង​ស្រុក​ ដូច​ជា​មជ្ឈ​មណ្ឌល​សិទ្ធិ​មនុស្ស​កម្ពុជា​ និង​អង្គការ​សិទ្ធិ​មនុស្ស​ផ្សេង​ៗ​ទៀត​ ក៏​ជា​អ្នក​ជំនាញ​ទទួល​ជោគ​ជ័យ​ និង​មាន​គំនិត ​និង​​អនុ​សាសន៍​សម្រាប់​រដ្ឋាភិបាល​ដែរ”៕សុធា​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស