កាលពីថ្ងៃសុក្រ គណៈកម្មាធិការជាតិរៀបចំការបោះឆ្នោត (គ.ជ.ប.) បានលើកឡើងថា គណបក្សនយោបាយនឹងត្រូវហាមឃាត់មិនឲ្យបង្កើតទីតាំងធ្វើយុទ្ធនាការឃោសនាអចិន្ត្រៃយ៍នៅក្នុងរាជធានីឡើយ អំឡុងការបោះឆ្នោតក្រុមប្រឹក្សារាជធានី ខេត្ត-ក្រុង ស្រុក-ខណ្ឌ នាខែក្រោយ។
សេចក្ដីប្រកាសនេះត្រូវបានធ្វើឡើងបន្ទាប់ពីគណបក្សសង្គ្រោះជាតិបានដាក់សំណើទៅសាលារាជធានីកាលពីថ្ងៃសុក្រ ដើម្បីស្នើសុំការអនុញ្ញាតបង្កើតទីតាំងនៅទីលានប្រជាធិបតេយ្យឬនៅសួនមុខវត្តបទុមសម្រាប់ការឃោសនារយៈពេលពីរសប្ដាហ៍ ដែលនឹងចាប់ផ្ដើមចាប់ពីថ្ងៃទី២ ខែឧសភាទៅ។
លោក ទេព នីថា អគ្គលេខាធិការគ.ជ.ប.បានថ្លែងថា “យើងនឹងមិនអនុញ្ញាតឲ្យគណបក្សនយោបាយប្រើប្រាស់ទីតាំងសាធារណៈជាអចិន្ត្រៃយ៍សម្រាប់យុទ្ធនាការឃោសនាបោះឆ្នោតឡើយ។ ប្រសិនបើពួកគេមិនធ្វើតាម យើងនឹងរឹបអូសសម្ភាររបស់ពួកគេ”។
លោក ទេព នីថា បានពន្យល់ថា អំឡុងយុទ្ធនាការឃោសនាបោះឆ្នោតលើកមុនៗគណបក្សនយោបាយនីមួយៗបានគ្រប់គ្រងតំបន់មួយចំនួនក្នុងរាជធានីភ្នំពេញ ដោយធ្វើឲ្យគណបក្សផ្សេងៗទៀតមិនអាចចូលទៅកាន់តំបន់ទាំងនោះបាន។
អំឡុងយុទ្ធនាការឃោសនាបោះឆ្នោតសម្រាប់ការបោះឆ្នោតជាតិកាលពីខែកក្កដា ឆ្នាំមុន គណបក្សសង្គ្រោះជាតិបានបោះទីតាំងរបស់ខ្លួននៅទីលានប្រជាធិបតេយ្យ រីឯគណបក្សប្រជាជនកម្ពុជាបានបោះទីតាំងនៅសួនមុខវត្តបទុម។
លោក ទេព នីថា បានមានប្រសាសន៍ កាលពីថ្ងៃសុក្រថា “គណបក្សនយោបាយអាចធ្វើយុទ្ធនាការឃោសនាបោះឆ្នោតជាអចិន្ត្រៃយ៍នៅការិយាល័យរបស់ខ្លួនបាន”។
លោកស្រី មូរ សុខហួរ ប្រធានទទួលបន្ទុកកិច្ចការសាធារណៈរបស់គណបក្សសង្គ្រោះជាតិបានលើកឡើងថា បម្រាមនេះ គឺជាមធ្យោបាយមួយដើម្បីគាបសង្កត់គណបក្សសង្គ្រោះជាតិមុនការបោះឆ្នោតដែលគណបក្សប្រជាជនកម្ពុជានឹងមិនធ្វើយុទ្ធនាការឃោសនាខ្លាំងក្លានោះ។
លោកស្រី មូរ សុខហួរ បានមានប្រសាសន៍ថា “វាគឺជាការបោះឆ្នោតមិនផ្ទាល់។ ប្រជាពលរដ្ឋមិនបោះឆ្នោតទេ គឺក្រុមប្រឹក្សារាជធានី ខេត្ត-ក្រុង ស្រុក-ខណ្ឌ ជាអ្នកបោះឆ្នោត ហើយសម្រាប់គណបក្សប្រជាជនកម្ពុជាវិញគិតថា វាជារឿងប្រសើរព្រោះថា ក្រុមប្រឹក្សារបស់ខ្លួននឹងបោះឆ្នោតឲ្យគណបក្សខ្លួន”។
លោកស្រីបានមានប្រសាសន៍បន្ថែមថា “តែទោះជាយ៉ាងណា វាគឺជាការបោះឆ្នោត ហើយច្បាប់បោះឆ្នោតចែងថា គណបក្សនីមួយៗត្រូវបានអនុញ្ញាតឲ្យធ្វើយុទ្ធនាការឃោសនា។ តើគណបក្សនយោបាយអាចធ្វើយុទ្ធនាការឃោសនារបស់ខ្លួនដោយគ្មានទីតាំងឃោសនាដោយរបៀបណា?”។
លោក ឡុង ឌីម៉ង់ អ្នកនាំពាក្យសាលារាជធានីបានលើកឡើងថា ទោះបីជាលោក បា៉ សុជាតិវង្ស អភិបាលរាជធានីភ្នំពេញនៅមិនទាន់បានអានលិខិតរបស់គណបក្សសង្គ្រោះជាតិក៏ដោយ ក៏សាលារាជធានីនឹងតម្កល់សេចក្ដីសម្រេចរបស់គ.ជ.ប.ដែរ។
លោក ឡុង ឌីម៉ង់ បានមានប្រសាសន៍ថា “យើងដឹងថា ការបោះឆ្នោតនេះមិនមានការចូលរួមពីសំណាក់ប្រជាពលរដ្ឋឡើយ េហតុដូច្នេះសាលារាជធានីនឹងបន្តធ្វើតាមការណែនាំរបស់គ.ជ.ប.”។
លោក សុក សំអឿន មេធាវីដ៏លេចធ្លោមួយរូប និងជាប្រធានក្រុមអ្នកច្បាប់ការពារសិទ្ធិកម្ពុជាបានលើកឡើងកាលពីថ្ងៃសុក្រថា គ.ជ.ប. គ្មានសិទ្ធិចេញបម្រាមឡើយ។
លោក សុក សំអឿន បានមានប្រសាសន៍ថា “បើយោងតាមច្បាប់ [គ.ជ.ប.] អាចហាមឃាត់ការធ្វើយុទ្ធនាការឃោសនាណាមួយបាន ប្រសិនបើមានភ័ស្ដុតាងថា ការធ្វើយុទ្ធនាការឃោសនារបស់គណបក្សទាំងពីរប៉ះទង្គិចគ្នា។ តែទោះជាយ៉ាងណា ប្រសិនបើគ្មានភ័ស្ដុតាងឡើយ គ.ជ.ប. មិនអាចបញ្ឈប់គណបក្សនីមួយៗមិនឲ្យធ្វើយុទ្ធនាការឃោសនាបាននោះទេ គឺគ.ជ.ប. ត្រូវតែរកទីតាំងដែលមិនអាចកើតមានជម្លោះសម្រាប់គណបក្សទាំងពីរធ្វើការឃោសនា”៕ ស៊ុយឈាង