28 C
Phnom Penh

អ្នក​​​កាសែត​​​​​​ម្នាក់​​​ដាក់ពាក្យ​​​បណ្តឹង​​​ចំពោះ​​​​​​ការយាយីអំឡុង​​​ពេល​​​យក​​​ព័ត៌មាន​​​ពាក់ព័ន្ធការ​​​កាប់ឈើ​​​ខុស​​​ច្បាប់​​​

ដោយ ឌឹ ខេមបូឌា ដេលី

បទវិភាគ

ក្លឹប​អ្នក​កា​សែត​កម្ពុជា​​បាន​ចេញ​សេចក្ដី​ថ្លែង​ការណ៍មួយ​កាលពីថ្ងៃសុក្រ សម្ដែង​នូវ​ការ​ព្រួយ​បារម្ភ​អំពី​ករណី​អ្នក​យក​​ព័ត៌មាន​បីនាក់កាលពីពេល​​​ថ្មីៗនេះ​​​ដែលប្រឈម​នឹង​កា​រ​យាយី ខណ​ៈ​ពេល​ព្យាយាម​​​​យក​​​ព័ត៌មាន​​​ពាក់​ព័ន្ធ​នឹង​ការ​កាប់​ឈើ​ខុស​ច្បាប់​ក្នុង​ខេត្ត​ព្រះវិហារ ពោធិ៍សាត់ និង​ខេត្ត​កំពង់​ចាម។

លោក សន មង្គល អ្នក​យក​ព័ត៌មាន​កាសែត​​​កម្ពុជា​ថ្មី​​​នៅ​​​​ខេត្ត​ព្រះ​វិហារ តាម​ចោទ​ថា ​ត្រូវ​​​បាន​កង​រាជ​អាវុធ​ហត្ថ​វាយ​ដំ​កាលពីថ្ងៃ​ទី​១២ ខែមេសា បន្ទាប់ពី​​​​បាន​​​ព្យាយាម​​ថត​រូប​​រថយន្ត​ដែល​សង្ស័យ​ថា ដឹកឈើ​ប្រណីត​ខុស​ច្បាប់​។

លោក ហ៊ិន សាម៉ុន អ្នក​យក​ព័ត៌មាន​ប្រចាំ​​ទូរទស្សន៍​ប៉ុស្តិ៍​លេខ​៩​ត្រូវ​បាន​នគរ​បាល​ឃាត់​​​ខ្លួន​រយៈ​ពេល​ខ្លី​ក្នុង​ខេត្ត​ពោធិ៍សាត់ កាលពី​ថ្ងៃ​​ទី​១១ ខែ​មេសា បន្ទាប់​ពី​ត្រូវ​បាន​ចោទ​ថា បាន​​ព្យាយាម​គំរាម​ទារ​ប្រាក់​បន្ទាប់​ពី​លោក​បាន​ថត​រូប​រថយន្ត​មួយគ្រឿង​​​ដឹកឈើ​ប្រណីត​។

យោង​តាម​សេចក្ដី​ថ្លែង​ការណ៍​របស់​ក្លឹប​អ្នក​កាសែត​កម្ពុជាឲ្យ​ដឹង​ថា នៅ​ក្នុង​ខេត្ត​កំពង់ចាម កាលពីថ្ងៃ​ទី​១០ ខែ​មេសា លោក សែម បូណា ដែល​និយាយ​​ថា លោក​ជា​អ្នក​យក​ព័ត៌មានឲ្យ​កាសែត​ឆន្ទៈខ្មែរ ដែល​គេ​មិន​សូវ​ស្គាល់​​ ត្រូវ​បាន​ជន​ដៃ​ដល់​មិន​ស្គាល់​​​ឈ្មោះ​​​​ពីរ​នាក់​វាយ​ដំ ខណៈ​ពេល​លោក​កំពុង​​​​​​យក​ព័ត៌មាន​​​​អំពី​​​ការ​កាប់​ឈើ​ខុស​ច្បាប់​។

សេចក្ដីថ្លែង​ការណ៍​ដដែល​នេះបាន​​បន្ត​ថា “ក្លឹ​បអ្នក​កាសែត​កម្ពុជាសង្កេតឃើញ​ថា ​សន្តិ​សុខ​របស់​អ្នក​កាសែត​ ដែល​ធ្វើការ​ក្នុង​វិស័យ​នេះ​ត្រូវ​បាន​គំរាម​កំហែង​”។

សេចក្ដី​ថ្លែ​ងការណ៍​នេះ​​បន្ថែម​ទៀត​ថា ក្លឹប​អ្នក​កាសែត​កម្ពុជា​ “សូមថ្កោល​ទោស​​​ចំពោះ​​​​​​​ទង្វើ​នេះ​ ហើយ​សូម​អំពា​វ​នាវ​ដល់​​​​ស្ថាប័ន​​​​ច្បាប់​​ពាក់​ព័ន្ធ​​​ទាំង​​​អស់​​​​ចាត់​វិធានការ​​​​ចំពោះ​​​ជន​ដៃដល់ ​​​និង​​​​ស្វែង​រក​យុត្តិធម៌​ជូន​អ្នក​កាសែត​”។

អ្នក​គំរាម​ទារ​ប្រាក់​ដែល​ក្លែងខ្លួន​​​​ជា​អ្នក​កាសែត​បាន​បង្កើត​​​​​ការ​​​ងារ​​​ផ្ទាល់​​​ខ្លួន​​​ដោយ​ការ​​​​យក​​​ព័​​​ត៌មាន​​​​អំពីការ​កាប់​ឈើ​ខុស​ច្បាប់​ និង​គំរាម​ក្រុម​ហ៊ុន​មួយ​ចំនួន​ឲ្យ​បង់​ប្រាក់ជា​ថ្នូរ​នឹង​ការ​មិន​ចុះ​ផ្សាយ​ព័ត៌មាន​។

លោក មង្គល អ្នក​យក​ព័ត៌មានឲ្យ​កាសែត​កម្ពុជា​ថ្មី គឺ​ជា​អ្នក​កាសែត​តែ​ម្នាក់​គត់​នៅ​ក្នុង​​ចំណោម​អ្នក​កាសែត​បីនាក់​ដែល​បាន​ដាក់​ពាក្យ​បណ្ដឹង​ផ្លូវ​ការ​ទៅ​តុលាការ​។

លោក ស៊ី ណាន់ ក្រឡាបញ្ជី​សាលា​ដំបូង​ខេត្ត​ព្រះវិហារ បាន​បញ្ជាក់​ថា ពាក្យ​បណ្ដឹង​របស់​លោក មង្គល បាន​មក​ដល់​តុលាការ​ហើយ ហើយ​លោក​បាន​លើក​ឡើង​ថា ភាគី​ពាក់​ព័ន្ធ​នឹង​ត្រូវ​កោះ​ហៅ​មក​សាក​សួរ​នៅ​សប្ដាហ៍​នេះ​។

លោក មង្គល បាន​អះអាង​ថា លោក ឡាយ សុភាព មេបញ្ជាការ​រង​កង​រាជ​អាវុធ​ហត្ថ​ខេត្ត​​និង​លោក គង់ ធារិទ្ធ ជា​ជំនួយ​ការ​របស់​លោក​បាន​វាយ​ដំរូប​លោក បន្ទាប់ពី​លោក​បាន​ទាម​ទារ​ថត​រូបខាង​ក្នុង​រថយន្ត​ ដែល​ត្រូវ​បាន​ឃាត់​​​នៅ​ប៉ុស្តិ៍​ត្រួត​ពិនិត្យ​​របស់​នគរ​បាល​។

ពាក្យ​បណ្ដឹង​របស់​លោក មង្គល បាន​ចោទ​​​មន្ត្រី​កង​រាជ​អាវុធ​ហត្ថ​ទាំង​ពីរនាក់​ថា បាន​ដាល់​រូប​​​គាត់​ចំមុខ​ ហើយ​បន្ទាប់​មក​ធាក់​គាត់​ចំ​ទ្រូង​ និង​ពោះ​បន្ទាប់​ពីគាត់​ដួល​។

លោក មង្គល បាននិយាយ​កាលពីម្សិល​មិញ​ថា “ខ្ញុំ​បាន​បញ្ជូន​ពាក្យ​បណ្ដឹង​របស់​ខ្ញុំ​ទៅ​តុលាការ​ហើយ ហើយ​បាន​ទាម​ទារ​សំណង​១០.០០០​ដុល្លារ និង​​​​ស្នើ​ឲ្យ​តុលាការ​ផ្ដន្ទា​ទោស​ពួកគេ​តាម​ច្បាប់​”។

កង​រាជ​អាវុធ​ហត្ថ​បាន​បដិសេធ​ការ​អះ​អាង​នេះ ដោយ​លើក​ឡើង​ថា ពួកគេ​គ្រាន​ត់​ការ​ពារ​ខ្លួន​ប៉ុណ្ណោះ បន្ទាប់​ពី​លោក មង្គល បាន​វាយ​ពួក​គេ​​​​ពេល​​​មាន​​​​​​​ការ​​​ជំទាស់​​​មិន​​​ឲ្យ​​​​​គាត់​​​ថត​រូប​រថយន្តនោះ​​​​​​។

លោក កង សៅគុណ មេបញ្ជា​ការ​កង​រាជ​អាវុធ​ហត្ថ​ខេត្ត​​បាន​ថ្លែង​ថា “ ​​​កង​​​រាជ​​​អាវុធ​​​ហត្ថ​​​​មិន​​​បាន​​​​វាយ​គាត់​ទេ ហើយ​មន្ត្រី​​​​​​​របស់​ខ្ញុំ​នឹង​ត្រូវ​ដាក់​ទោស​​​​ប្រសិន​បើ​ខ្ញុំ​រក​ឃើញ​ថា ពួកគេ​រំលោភ​ច្បាប់​មែន​នោះ​៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស