លោក កឹម សុខា អនុប្រធានគណបក្សសង្គ្រោះជាតិបានលើកឡើងអំឡុងកិច្ចសម្ភាសជាមួយស្ថានីយវិទ្យុមួយនៅក្នុងសប្ដាហ៍នេះថា លោកនឹងជួបជាមួយសមាជិកព្រឹទ្ធសភានៅក្នុងក្រសួងការពារជាតិរបស់សហរដ្ឋអាេមរិក អំឡុងពេលទៅបំពេញទស្សនកិច្ចរយៈពេល២០ថ្ងៃរបស់លោកនៅទីនោះ ដើម្បីស្នើសុំការគាំទ្រសម្រាប់រដ្ឋាភិបាលដែលដឹកនាំដោយគណបក្សសង្គ្រោះជាតិនាពេលអនាគត។
នៅក្នុងកិច្ចសម្ភាសជាមួយវិទ្យុសំឡេងសហរដ្ឋអាេមរិក (VOA) ដែលត្រូវបានបង្ហោះនៅលើទំព័រហ្វេសប៊ុករបស់លោកកាលពីថ្ងៃព្រហស្បតិ៍ លោក កឹម សុខា បានលើកឡើងថា ការគាំទ្រពីសំណាក់យោធាអាេមរិកប្រហែលជាមានសារៈសំខាន់នៅក្នុងការធានាឲ្យបានថា គណបក្សប្រជាជនកម្ពុជាកំពុងកាន់អំណាចយល់ព្រមប្រគល់អំណាច ប្រសិនបើគណបក្សសង្ក្រោះជាតិឈ្នះការបោះឆ្នោតនាពេលអនាគតនោះ។
លោក កឹម សុខា បានមានប្រសាសន៍ថា “យើងដឹងថា គណបក្សសង្គ្រោះជាតិនឹងឈ្នះការបោះឆ្នោត។ ហេតុដូច្នេះយើងបានជម្រាបប្រាប់ពួកគេរួចហើយ ជាពិសេសយើងនឹងជម្រាបប្រាប់ក្រសួងការពារជាតិអាេមរិក គឺមន្ទីរបញ្ចកោណ”។
លោកបានមានប្រសាសន៍បន្តទៀតថា “ក្រៅពីជួបជាមួយសហគមន៍ខ្មែរនៅក្នុងរដ្ឋចំនួន១៤ ខ្ញុំបានជួបជាមួយមន្ត្រីជាច្រើនហើយខ្ញុំនឹងជួបពិភាក្សាជាមួយសមាជិកព្រឹទ្ធសភា សមាជិកសភាបន្ថែមទៀត លើសពីនេះទៅទៀតខ្ញុំនឹងជួបពិភាក្សាជាមួយឧត្តមសេនីយ៍ទទួលបន្ទុកកិច្ចការតំបន់អាស៊ីប្រចាំនៅមន្ទីរបញ្ចកោណ”។
លោក កឹម សុខា បានឲ្យដឹងថា គណបក្សសង្គ្រោះជាតិកំពុងព្រួយបារម្ភខ្លាចក្រែងមានរឿងច្រំដែលដូចការបោះឆ្នោតកាលពីឆ្នាំ១៩៩៣ ដែលរៀបចំឡើងដោយអង្គការសហប្រជាជាតិ នៅពេលគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានចាញ់ឆ្នោត ប៉ុន្តែទីបញ្ចប់បានឡើងកាន់អំណាចដោយបង្កើតរដ្ឋាភិបាលចម្រុះជាមួយគណបក្សហ្វុ៊នស៊ិនបិុច។
លោក កឹម សុខា បានមានប្រសាសន៍ថា “ហេតុដូច្នេះយើងស្នើឲ្យ [សហរដ្ឋអាមេរិក] ជួយដើម្បីធានាឲ្យបានថា ការផ្ទេរអំណាចនឹងប្រព្រឹត្តទៅដោយសន្ដិវិធីរវាងអ្នកចាញ់និងអ្នកឈ្នះ”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានលើកឡើងថា លោក កឹមសុខា ពិតជាយល់ខុសហើយ ប្រសិនបើលោកជឿជាក់ថា ក្រសួងការពារជាតិសហរដ្ឋអាេមរិកប្រហែលជាអន្តរាគមន៍នៅក្នុងកិច្ចការបោះឆ្នោតរបស់ប្រទេសកម្ពុជា។
លោក ផៃ ស៊ីផាន បានមានប្រសាសន៍ថា “សហរដ្ឋអាេមរិក គឺគ្រាន់តែជាប្រទេសមួយ ហើយប្រទេសកម្ពុជា គឺជារដ្ឋឯករាជ្យមានអធិបតេយ្យភាព ហេតុដូច្នេះលោក កឹម សុខា ច្រឡំធំហើយ”។
លោកបានមានប្រសាសន៍បន្ថែមថា “នៅពេលណាមានការផ្ទេរអំណាច កម្ពុជានឹងមិនអនុញ្ញាតឲ្យមានការជ្រៀតជ្រែកពីប្រទេសផ្សេងឡើង។ ប្រសិនបើគាត់ [កឹម សុខា] បាននិយាយអ៊ីចឹងមែន វាបង្ហាញថា គាត់គឺជាអាយ៉ងរបស់អាេមរិក”។
លោក ផៃ ស៊ីផាន បានបន្ថែមថា លោកនាយករដ្ឋមន្ត្រី ហ៊ុន សែន ប្ដេជ្ញារក្សាសន្ដិភាពនៅក្នុងប្រទេស។ លោកបានមានប្រសាសន៍ “សម្ដេច ហ៊ុន សែន ពិតជាមានភាពក្លាហានក្នុងការទទួលយកឆន្ទៈរបស់ប្រជាពលរដ្ឋតាមរយៈសំឡេងភាគច្រើន។ សម្ដេចបានមានប្រសាសន៍ម្ដងហើយម្ដងទៀតថា ការផ្ទេរអំណាចនឹងត្រូវប្រព្រឹត្តទៅដោយសន្ដិវិធី”៕ ស៊ុយឈាង