31 C
Phnom Penh

សន្តិសុខ​ខណ្ឌ​វាយ​អ្នក​គាំទ្រ​បក្ស​ប្រឆាំង​និង​អ្នក​ឈរ​​មើល​​នៅ​​ទី​លាន​ប្រជា​ធិបតេយ្យ​

ដោយ ឌឹ ខេមបូឌា ដេលី

បទវិភាគ

សន្តិសុខ​ខណ្ឌ​មួយ​ក្រុម​បាន​វាយ​អ្នក​គាំទ្រ​គណបក្ស​សង្គ្រោះជាតិ​មួយ​ក្រុម​តូច​ និង​អ្នក​ឈរ​មើល​នៅជិត​ទីលាន​ប្រជាធិបតេយ្យ​​ក្នុង​ទីក្រុង​ភ្នំពេញ​កាល​ពីម្សិលមិញ បន្ទាប់​ពី​បាន​​បណ្តេញ​លោក​ស្រី​ មូរ សុខ​ហួរ ប្រធាន​ផ្នែក​កិច្ច​ការ​សាធារណៈ​របស់​គណបក្ស​សង្គ្រោះ​ជាតិ​ទាំង​បង្ខំ​ចេញ​ពីទីលា​​ន​ប្រជាធិបតេយ្យ​ជា​ថ្មី​ម្តង​ទៀត​។

សន្តិសុខខណ្ឌដូនពេញត្រៀម​​​យក​​​ជង្គង់អុក​​​ផ្ទៃមុខ​​​បុរស​​​ម្នាក់​​​កាល​​​ពីម្សិលមិញ​​​ នៅតាម​​​ផ្លូវ​​​ជិត​​​ទីលាន​​​ប្រជាធិបតេយ្យ​​​។​​​ សន្តិសុខ​​​វាយ​​​អ្នកគាំទ្រ​​​គណបក្ស​​​ប្រឆាំង​​​ និង​​​អ្នក​​​ឈរ​​​មើល​​​នៅពេល​​​គណបក្ស​​​ប្រឆាំង​​​ព្យាយាម​​​ជួប​​​ជុំគ្នា​​​នៅ​​​ទីនោះ​​​។ Ishikawa Masayori
សន្តិសុខខណ្ឌដូនពេញត្រៀម​​​យក​​​ជង្គង់អុក​​​ផ្ទៃមុខ​​​បុរស​​​ម្នាក់​​​កាល​​​ពីម្សិលមិញ​​​ នៅតាម​​​ផ្លូវ​​​ជិត​​​ទីលាន​​​ប្រជាធិបតេយ្យ​​​។​​​ សន្តិសុខ​​​វាយ​​​អ្នកគាំទ្រ​​​គណបក្ស​​​ប្រឆាំង​​​ និង​​​អ្នក​​​ឈរ​​​មើល​​​នៅពេល​​​គណបក្ស​​​ប្រឆាំង​​​ព្យាយាម​​​ជួប​​​ជុំគ្នា​​​នៅ​​​ទីនោះ​​​។ Ishikawa Masayori

មនុស្ស​ប្រហែល​១០​នាក់​បាន​រង​របួស​ស្រាល​ និង​យ៉ាង​ហោច​ណាស់​បួន​នាក់​ទៀត​បាន​រង​របួស​បែក​ក្បាល​ បន្ទាប់ពី​លោក​ សុខ ពេញវុធ អភិបាល​រង​ខណ្ឌដូន​ពេញ​​បាន​ស្រែក​បញ្ជា​ដោយ​ផ្ទាល់​​ឲ្យ​សន្តិសុខ​ខណ្ឌ​​ដែល​កាន់​ដំបង​វាយ​អ្នក​ថត​រូប​លោកស្រី មូរ សុខ​ហួរ​ ដែល​គ្មាន​ពាក់​​​ប័ណ្ណ​​សារព័ត៌មាន​​។

លោក​ សុខ ពេញ​វុធ រួម​ជាមួយ​លោក គឹម វុត្ថា ប្រធាន​សន្តិសុខ​ខណ្ឌ​ដូន​ពេញ​បាន​ចង្អុល​ទៅ​អ្នក​ថត​រូប​ជាលក្ខណៈ​ផ្ទាល់ខ្លួន​ និង​មនុស្ស​កាន់​ទូរស័ព្ទ​ស្មាត​ហ្វូន​ថត​រូប​​ ហើយ​បាន​ស្រែក​ថា “វាយពួក​​វាទៅ​! វាយ​ពួក​វាទៅ!”អំឡុង​ពេល​មានការ​ប្រវាយ​ប្រតប់គ្នា​។

សន្តិសុខ​ដែល​ពាក់​មួក​សុវត្ថិភាពពណ៌ខ្មៅ​គ្រប​មុខ​ជិត​បាន​វាយ​ប្រជាជន​នឹង​ដំបង​ និង​បាន​ទាត់​អ្នក​ដួល​ក្រោយ​ពី​រង​ការ​វាយ​ដំ​ហើយ​សន្តិសុខ​ម្នាក់​បាន​ចាប់​ទាញ​ក្បាល​បុរស​ម្នាក់​​អុក​នឹង​​ជង្គង់ចំ​ផ្ទៃ​មុខ​។

កាល​ពីម្សិលមិញ គឺជា​ការ​​​ប៉ុន​ប៉ង​លើក​ទី​៦​របស់​លោកស្រី មូរ​ សុខ​ហួរ ដើម្បី​ចូល​ទៅ​កាន់​​​កន្លែង​ដែល​គេ​រៀបចំ​សម្រាប់​ការ​តវ៉ា​នេះ​ចាប់​តាំង​​ពី​រដ្ឋាភិបាល​បាន​ធ្វើ​ការ​បង្ក្រាប​ដែល​​បណ្តាល​ឲ្យមាន​មនុស្ស​ស្លាប់លើ​ការ​តវ៉ា​​​ និង​បាន​​ហាម​ឃាត់​មិន​ឲ្យ​ជួប​ជុំ​គ្នា​ជា​សាធារណៈ​​​មក​។

លោកស្រី​ មូរ សុខ​ហួរ មិន​បាន​រង​របួស​ទេ​​ ទោះ​បីជា​​មាន​ការ​ប្រវាយ​ប្រតប់​ជាមួយ​សន្តិ​សុខ​ បន្ទាប់​ពីលោកស្រី​បាន​​បញ្ចេញ​មតិ​ដោយ​ជោគជ័យ​នៅលើ​ទីលាន​នេះ​​។ ​ប៉ុន្តែ លោក​ លឹម គឹមយ៉ា តំណាង​រាស្ត្រ​ជាប់​ឆ្នោត​គណ​បក្ស​សង្គ្រោះជាតិ​នៅ​មណ្ឌល​កំពង់​ធំ​ត្រូវ​​​បាន​សន្តិសុខ​ម្នាក់​វាយ​ចំមុខ​។

លោក​ លឹម គឹមយ៉ា បាន​មាន​ប្រសាសន៍​ថា “ពួក​គេ​វាយ​យើង​ពីព្រោះពួកគេ​យល់​ច្រឡំថា ពួក​គេមាន​អភ័យ​ឯកសិទ្ធិ​ ប៉ុន្តែ ស្ថាន​ភាព​នេះ​នឹង​ផ្លាស់ប្តូរ​ពីគណបក្ស​ប្រជាជន​កម្ពុជា​ទៅ​គណបក្សសង្គ្រោះជាតិ​។ នៅ​ពេល ​គណបក្សសង្គ្រោះជាតិ​មាន​អំណាច​ ខ្ញុំនឹង​ឲ្យ​តុលាការ​សើុប​អង្កេត​ពួក​គេ​”។

លោក ស្រី សម័យ​ អាយុ​២៨​ឆ្នាំ​ជាអ្នក​ឈរ​មើល​បាន​និយាយ​ថា គាត់​បាន​មក​គាំទ្រ​យុទ្ធ​នាការ​របស់​លោកស្រី មូរ​ សុខ​ហួរ ហើយ​ត្រូវ​បាន​គេ​វាយ​ឲ្យ​រង​របួស​ចំមុខ​។ លោក សម័យ បាន​និយាយ​បន្ទាប់​ពី​អំពើ​ហិង្សា​នោះថា “ខ្ញុំ​មក​ទី​នេះ​ដើម្បី​ចង់​បាន​​សេរីភាព​ក្នុងការ​បញ្ចេញ​មតិ​ ​ហើយ​ខ្ញុំ​​មិន​បាន​​ធ្វើ​​អ្វី​ខុស​ឡើយ​។ សូម្បី​តែ​កាមេរ៉ា​ក៏ខ្ញុំ​មិនមាន​ដែរ​”។

នៅពេលទាក់​ទង​ក្រោយ​ព្រឹត្តិការណ៍​នេះ លោក​ ឡុង ឌីម៉ង់ អ្នកនាំពាក្យសាលា​រាជ​ធានីភ្នំពេញ​បាន​បន្ទោស​លោកស្រី មូរ សុខ​ហួរ​ ចំពោះការ​ផ្ទុះ​ហិង្សា​​ពី​​សន្តិសុខ​។

លោក ឡុង ឌីម៉ង់ បានមាន​ប្រសាសន៍ថា “លោកស្រី មូរ សុខ​ហួរ​ ត្រូវ​ទទួល​ខុសត្រូវ​ ពីព្រោះ​វា​ជា​កន្លែង​ដែល​យើង​បាន​ហា​ម​ឃាត់​”។ លោក​ ឡុង​ ឌីម៉ង់ បាន​បន្ថែមទៀត​​​ថា “ខ្ញុំ​គិត​ថា កង​កម្លាំង​សន្តិសុខ​របស់​យើង​មិន​ប្រើ​ហិង្សា​ទេ​ប្រសិន​បើ​មិនមាន​ការ​ញុះ ញុង់​ពី​អ្នក​​នយោបាយ។ លោកស្រី​កំពុង​បង្ក​ចលា​ចល​ និង​ធ្វើ​ឲ្យ​​ប្រជាជន​ស្អប់​ខ្ពើម​គ្នា​”។ លោក​បានមាន​ប្រសាសន៍ថា លោក​មិន​ដឹង​ថា លោក​ សុខ ពេញវុធ អភិបាល​រង​ខណ្ឌ​ ដូន​ពេញ​បាន​ទៅបញ្ជា​សន្តិសុខ​​​​ឲ្យ​វាយ​អ្នក​តវ៉ា​នៅ​ទីលាន​នេះ​ដោយ​ផ្ទាល់​ទេ​។

លោក​ វុត្ថា ប្រធាន​សន្តិសុខ​បាន​បដិសេធ​មិនធ្វើ​អត្ថាធិប្បាយ​។

អំពើ​ហិង្សា​កាល​ពីម្សិលមិញ​នេះ​ គឺ​ជា​លើក​ទី​១ហើយ​ ដែល​អាជ្ញាធរ​បាន​វាយ​សមាជិក​ និង​អ្នក​គាំទ្រ​គណបក្ស​សង្គ្រោះ​ជាតិ​​ដោយ​ផ្ទាល់​ចាប់​តាំង​ពី​រដ្ឋាភិបាល​បាន​ប្រើ​​សន្តិសុខ​​ស្លៀក​ពាក់​សីុវិល និង​សន្តិ​សុខ​ខណ្ឌ​ដូន​ពេញ​ប្រដាប់​ដោយ​ពូថៅ​ ដំបង​ ​​កាល​ពីខែ​មករា​ឲ្យទៅ​បង្ក្រាប​​​​ការតវ៉ា​ប្រឆាំង​រដ្ឋា​​​ភិ​បាល​រយៈ​ពេល​ពីរ​សប្តាហ៍​។

លោកស្រី មូរ សុខ​ហួរ​ បានមាន​ប្រសាសន៍ ថា អំពើ​ហិង្សា​ភ្លាមៗ​នេះ គឺដូច​គ្នា​នឹង​​ការ​បង្ក្រាប​ កាល​ពីខែ​មករា​​។ លោកស្រី​បានមាន​ប្រសាសន៍​ថា “អភិ​បាល​​រង​ខណ្ឌ​ដដែល​​នេះ​មាន​វត្តមាន​ និង​កូន​ចៅ​របស់​គាត់​ដដែល​មាន​វត្ត​មាន​ និង​​តែង​តែ​ឈរ​បញ្ជា​នៅ​ទី​នោះ​​។ ​វាមាន​លក្ខណៈ​ប្រព័ន្ធ​។ ពួក​គេឈរ​បញ្ជា​នៅទីនោះ​”។

លោកស្រី មូរ សុខហួរ​ មាន​ប្រសាសន៍​ថា លោក​ស្រី​នឹង​ត្រឡប់មក​កាន់​ទី​លាន​នេះ​វិញ​នៅថ្ងៃទី​៣០​ខែ​មេសា ក្រោយ​ពី​បានធ្វើ​ដំណើរ​ទៅ​មណ្ឌល​បោះឆ្នោត​​របស់​លោក​ស្រី​នៅ​​ខេត្ត​បាត់​ដំបង​។ លោកស្រី​បានច្រាន​ចោល​ការ​អះអាង​របស់​អ្នកនាំពាក្យសាលា​រាជធានី​ដែល​ថា លោកស្រី​ញុះញង់​ឲ្យមានអំពើ​ហិង្សា​ដោយ​ការ​ព្យាយាម​ចូល​ទីលាន​ប្រជាធិបតេយ្យ​។ លោកស្រី មូរ សុខហួរ មាន​ប្រសាសន៍​ថា “អ្នក​នាំ​ពាក្យ​រូប​នេះ​កំពុង​គាំទ្រ​រដ្ឋាភិបាល​ដែល​មិនស្រប​ច្បាប់​ និង​កំពុង​ព្យាយាម​រក្សា​អំណាច​របស់​ខ្លួន​ដោយ​ការ​ធ្វើ​ឲ្យ​ប្រជាជន​ភ័យ​ខ្លាច​”៕​​គឹម​ហឿន

(រាយការណ៍​បន្ថែម​ដោយ​ Alex Willemyns)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស