សាលាក្តីខ្មែរក្រហមបានប្រកាសកាលពីម្សិលមិញថា ទឹកប្រាក់ប្រមាណ៧៧០.០០០ ដុល្លារក្នុងមូលនិធិត្រូវបានផ្តល់ឲ្យសម្រាប់ចំណាយលើគម្រោងសំណងទាក់ទងនឹងរឿងក្តីរបស់សាលាក្តីខ្មែរក្រហមប្រឆាំងនឹងមេដឹកនាំជាន់ខ្ពស់ក្នុងរបបខ្មែរក្រហម។
យោងតាមសេចក្តីប្រកាសមួយពីសាលាក្តីខ្មែរក្រហម បានឲ្យដឹងថា គម្រោង១០ក្នុងចំណោមគម្រោងចំនួន១៣ ដែលស្នើឡើងដោយមេធាវីរបស់ជនរងគ្រោះ ដែលរាប់ទាំងរូបចម្លាក់ ទិវារំឭកខួបអនុស្សាវរីយ៍ជាតិ ពិធីតាំងពិព័រណ៍និងសៀវភៅអមដោយរូបភាព ទទួលបានការគាំទ្រផ្នែកហិរញ្ញវត្ថុ។
សេចក្តីប្រកាសនេះបានឲ្យដឹងបន្ថែមទៀតថា ប្រសិនបើអង្គជំនុំជម្រះនេះរកឃើញថា នួន ជា បងធំទី២ និង ខៀវ សំផន អតីតប្រមុខរដ្ឋមានពិរុទ្ធភាពក្នុងដំណាក់កាលទី១នៃការជំនុំជម្រះរបស់ខ្លួនពីបទឧក្រិដ្ឋកម្មប្រឆាំងមនុស្សជាតិ វា “ ប្រហែលផ្តល់សំណងប្រកបដោយសីលធម៌និងសមូហភាពដល់ភាគីរដ្ឋប្បវេណីក្នុងការវិនិច្ឆ័យរបស់ខ្លួន” ដែលជាលក្ខខណ្ឌមួយបញ្ជាក់ថាមូលនិធិនេះអាចត្រូវបានផ្តល់ឲ្យ។
កន្លងមក វិធានរបស់សាលាក្តីនេះបានចែងថា ជនជាប់ចោទត្រូវតែបង់សំណងចេញពីហោប៉ៅរបស់ខ្លួន ប៉ុន្តែដោយសារចុងចោទនៅក្នុងតុលាការនេះក្រ ចៅក្រមបានបោះឆ្នោតក្នុងឆ្នាំ២០១០ ដើម្បីអាចឲ្យគម្រោងជួសជុលសំណងនេះទទួលបានមូលនិធិពីប្រទេសផ្តល់ជំនួយផ្សេងៗ។
សេចក្តីសម្រេចរបស់ពួកគេធ្វើឡើងបន្ទាប់់ពីសាលក្រមក្នុងរឿងក្តីរបស់ កាំង ហ្គិចអុីវ ហៅ ឌុច ប្រធានគុក ស-២១ ដែលធ្វើឲ្យភាគីរដ្ឋប្បវេណីមានការខកចិត្ត នៅពេលសំណើស្ទើរតែទាំងអស់សុំឲ្យមានការជួសជុលត្រូវបានបដិសេធដោយសារខ្វះមូលនិធិ។
គម្រោងពីរក្នុងចំណោមគម្រោងទាំងនោះ គឺគម្រោងទិវារំឭកខួបអនុស្សាវរីយ៍ជាតិនិងការផ្សព្វផ្សាយតាមប្រព័ន្ធអុីនធឺណិតអំពីឈ្មោះភាគីរដ្ឋប្បវេណីនៅដំណាក់កាលដំបូងនៃសំណុំរឿង០០២ ដែលមិនត្រូវការមូលនិធិ។ អង្គការ Public Memorials Initiative ដែលសង្ឃឹមថា នឹងបង្កើតពិធីរំឭកជាសាធារណៈប្រហែលជាប្រាំមួយសម្រាប់ជនរងគ្រោះដោយសាររបបខ្មែរក្រហម មិនទទួលបានការផ្តល់មូលនិធិទេ។
រដ្ឋាភិបាលអូស្ត្រាលីនឹងផ្តល់មូលនិធិសម្រាប់កម្មវិធីព្យាបាលរោគមួយគ្រប់គ្រងដោយអង្គការសុខភាពសរសៃប្រសាទ មានឈ្មោះថា អង្គការ Transcultural Psychosocial Organization ខណៈដែលទីភ្នាក់ងារព័ត៌មានស្វីស នឹងបង្កើតមណ្ឌលសិក្សាសហគមន៍មួយនៅក្នុងខេត្តបាត់ដំបង។
ក៏ប៉ុន្តែភាគច្រើននៃមូលនិធិបានមកពីប្រទេសអាល្លឺម៉ង់ តាមរយៈទីភ្នាក់ងារអភិវឌ្ឍន៍អាល្លឺម៉ង់ GIZ ក្រសួងសហប្រតិបត្តិការនិងអភិវឌ្ឍន៍សេដ្ឋកិច្ចសហព័ន្ធអាល្លឺម៉ង់ និងវិទ្យាស្ថានទំនាក់ទំនងបរទេសអាល្លឺម៉ង់បានផ្តល់មូលនិធិសម្រាប់គម្រោងចំនួនប្រាំពីរ។
លោក ឡុង បញ្ញាវុធ មន្ត្រីផ្នែកកម្មវិធីអង្គការគំនិតផ្តួចផ្តើមយុត្តិធម៌កម្ពុជា ដែលពិនិត្យតាមដានតុលាការនេះ បានលើកឡើងថា លោកចង់ឃើញប្រទេសផ្តល់ជំនួយកាន់តែច្រើនទៀតបង្កើនជំនួយបែបនេះទៀត។
លោកបានបន្ថែមថា អង្គជំនុំជម្រះរបស់សាលាក្តីនេះគួរតែមានភាពបត់បែនក្នុងការអនុម័តគម្រោងទាំងនេះ ដោយគំនិតថា ម្ចាស់ ជំនួយមួយចំនួនប្រហែលជាមិនចង់សន្យាផ្តល់ការគាំទ្រទេលុះត្រាតែគម្រោងទាំងនេះត្រូវបានដំណើរការដោយតុលាការនេះ៕ប៊ុននី