38 C
Phnom Penh

កម្មករ​រាប់រយនាក់​តវ៉ា​ដើម្បី​គាំទ្រ​មេដឹកនាំ​សហជីព ហើយ​តុលាការ​សាកសួរ​ស្ត្រី​សហគមន៍បុរីកីឡា

ដោយ ឌឹ ខេមបូឌា ដេលី

បទវិភាគ

កម្មករ​ប្រហែល​៣០០នាក់បាន​ធ្វើ​ការ​តវ៉ា​កាលពី​ម្សិលមិញនៅ​ខាង​មុខ​សាលា ដំបូង​រាជ​ធានី​ភ្នំពេញដើម្បីគាំទ្រ​លោក អា​ត់​ ធន់​ មេដឹកនាំសហជីព ​ខណៈ​ដែល​​កម្មករ​​មួយ​ក្រុម​តូច​ដែល​​ជា​គូ​​ប្រឆាំង​មក​ពី​សហជីព​តែ​មួយ​​នេះ​បាន​ប្រមូលផ្តុំគ្នា​ត​វ៉ា​ប្រឆាំង​នឹង​ប្រធាន​របស់ខ្លួន​ដែល​រង​ការ​រិះគន់នេះ។

តុលាការ​គ្រោង​សាកសួរ​លោក អាត់​ ធន់ ជុំវិញ​ការ​ចោទ​ប្រកាន់​ថា លោក និង​ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា​ (ស៊ីខៅឌូ) ពីរ​រូបទៀត​បាន​កិប​កេង​​ប្រាក់​ចំនួន​​៩២.៩២៩​ដុល្លារ​ពី​សមាជិក​សហជីព ប៉ុន្តែ​បាន​ពន្យារ ពេល​កិច្ច​ប្រជុំ​បន្ទាប់ពី​លោក អាត់ ធន់ បាន​សន្យា​អំពាវ​នាវ​ឲ្យ​កម្មករ​ជាង​១.០០០នាក់​​ធ្វើ​បាតុកម្ម​នៅ​ខាងក្រៅ​តុលាការ​។

លោក អាត់ ធន់ បានមាន​ប្រសា​សន៍ថា  “​តុលាការ​បាន​កោះ​ហៅ​យើង​​[មក​សាក​សួរ​] ប៉ុន្តែគេ​បាន​ជូន​ដំណឹង​ថា ការ​សាកសួរ​នេះ​ត្រូវ​បាន​ពន្យារពេល​ដោយ​គ្មាន​ផ្តល់​មូល​ហេតុ ហើយ​គ្មានកា​រ​​បញ្ជាក់​កាលបរិច្ឆេទ​នៅពេល​ក្រោយ​ឡើយ”។

លោក អា​ត់​ ធន់ ព្រមជាមួយ​លោក គង់ អាទិត្យ ជា​អនុប្រធាន និង​លោក ឯក ភក្តី ជា​អគ្គលេខាធិការ​​បាន​បដិសេធ​ការ​ចោទ​ប្រកាន់ ដែលថា ពួកគេ​បាន​កិប​កេង​ប្រាក់​ពី​កម្មករ​បន្ទាប់ពី​ឈានដល់​ដំណោះ​ស្រាយ​ជាមួយ​រោង​ចក្រកាត់ដេរ E កាល​ពី​ឆ្នាំ​២០០៨។

ទោះជា​យ៉ាង​ណា លោក អ៊ុំ វិសាល និង​លោក រឿង​​ ចាន់ថន សមាជិក​ស្ថាបនិក​ស៊ីខៅឌូ ដែល​បាន​សហការ​ជាមួយ​កម្មករ​ដើម្បី​ដាក់ពាក្យ​បណ្ត​ឹង​ប្តឹង​មេដឹក​នាំ​សហ​ជីព​ទាំង​បីនាក់​នេះ​​មាន​ប្រសាសន៍ថា ពួកគេ​ចង់​ប្តឹង​ទៅ​តុលាការ​ទាម​ទារ​ឲ្យ​មេ​ដឹក​នាំ​សហ​​​ជីព​ទាំង​នេះ​ចុះ​ចេញ​ពី​តំណែង​។

ពាក្យ​បណ្តឹង​ដែលបាន​ប្តឹង​កាលពី​ថ្ងៃទី១ ខែ​មេសា​​ស្នើឲ្យ​​តុលាការ​តែង​តាំង​​លោក វិសាល និង​លោក ចាន់ថន​ ជា​មេ​ដឹក​នាំសហ​ជីព​រហូត​ដល់​មាន​កា​របោះ​ឆ្នោត។

ពាក្យ​បណ្តឹង​នោះ​មាន​ខ្លឹមសារថា “ដោយ​ សារ​មេដឹកនាំ​ស៊ីខៅឌូ​បច្ចុប្បន្ន…​ជាប់​ពាក់ព័ន្ធ​នឹង​ការ​កិប​កេង​ប្រាក់​កម្មករ​…​យើង​ធ្វើរឿង​នេះ​ដើម្បី​បញ្ចៀស​​អ​សណ្តាប់​ធ្នាប់​ណាមួយ​ និង​ដើម្បី​ស្តារ​ជំនឿ​ទុក​ចិត្ត​ក្នុង​ចំណោម​កម្មករ​”។

លោក សាំង​ យុត មន្ត្រី​ផ្នែក​ច្បាប់​របស់​ស៊ីខៅឌូបាន​មាន​ប្រសាសន៍ថា លោក​បារម្ភ​ថា​ លោក វិសាល និង​លោក ចាន់ថន កំពុង​ធ្វើ​ការ​ជាមួយ​រដ្ឋាភិបាល​ក្នុង​ការ​ប្រឹង​ប្រែង​ដើម្បី​ធ្វើឲ្យ​ស៊ីខៅឌូ ដែល​ជា​សហជីព​ឯក​រាជ្យ​ ដ៏ធំ​បំផុត​ក្នុង​ប្រទេស​កម្ពុជា​ចុះខ្សោយ​។​សហ​ជីព​នេះ​​បាន​ធ្វើកូដកម្ម​ទាម​ទារ​ដំឡើង​ប្រាក់​ខែ​គោល​ក្នុង​រយៈពេល​ប៉ុន្មាន​ខែ​ថ្មី​ៗនេះ។

លោក​បាន​មាន​ប្រសាសន៍ថា “រដ្ឋា​ភិបាល​ ឬ​តុលាការ​មាន​បំណង​ព្យួរ​ បិទ ឬ​រម្លាយ​ស៊ីខៅឌូ។ យើង​​មិន​អាច​ទទួល​យក​រឿង​នេះបានទេ ហើយ​យើង​ត​វ៉ា​ដើម្បី​ការ​ពារ​​ស៊ីខៅឌូ ហើយ​នឹងនៅតែ​​​ត​ស៊ូ​ដើម្បី​បង្កើន​ប្រាក់​ចំណូល​ដល់​កម្មករ”។

នៅក្នុង​រឿង​ក្តី​ដាច់​ដោយ​ឡែក​មួយ​ទៀត​​ សាលា​ដំបូង​រាជ​ធានី​ភ្នំពេញ​បាន​សាក​សួរ​ស្ត្រីប្រាំពីរនាក់​មក​ពី​សហ​គមន៍​បុរីកីឡា​កាល​ពី​ម្សិលមិញ​បន្ទាប់ពី​ពួកគេ​បាន​ដាក់​ពាក្យ​បណ្តឹង​ប្តឹង​អាជ្ញាធរ​មូលដ្ឋាន​ដែល​បាន​ប្រើ​អំពើ​ហិង្សា​លើ​អ្នក​តវ៉ា​កាល​ពី​ខែមុន។ ស្ត្រីមួយ​ចំនួនក្នុង​ចំណោម​ស្ត្រី​ទាំង​ប្រាំពីរ​នាក់​បាន​និយាយថា​ តុលាការ​បាន​ស្នើ​សុំ​ភ័ស្តុ តាង​បន្ថែម។

ហាស់ សុខចន្តា អាយុ​៣៥ឆ្នាំ​អតីត​​អ្នក​ភូមិ​បុរីកីឡា​បាន​និយាយថា “តុលាការ​បាន​សួរ​ខ្ញុំ​ថា តើ​ខ្ញុំ​ចង់​រក្សា​ទុក​ពាក្យ​បណ្តឹង​ដដែល ឬ​ចង់​ដាក់ពាក្យ​បណ្តឹង​បន្ថែម”។ “ខ្ញុំបាន​ឆ្លើយ​ថា ខ្ញុំ​ចង់​រក្សា​ទុកពាក្យ​បណ្តឹង​របស់ខ្ញុំ​។ តីលាការ​បាន​អនុញ្ញាត​​ឲ្យ​ខ្ញុំ​ផ្តិត​មេដៃលើ​ឯកសារ​ថ្មី ហើយ​ស្នើ​ឲ្យ​ខ្ញុំ​​រក​ភ័ស្តុ តាង​ដែល​អាជ្ញាធរ​បាន​ប្រើ​អំពើ​ហិង្សា​នៅ​ពេល​ខ្ញុំ​មក​​តុលាការ​លើក​​ក្រោយ”៕សារុន                 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស