28 C
Phnom Penh

អ្នក​ប្រមូល​សំរាម​​​​វ័យ​ក្មេង​ម្នាក់​ត្រូវ​អ្នក​បើក​បរ​ជន​ជាតិ​ចិន​ដែល​ស្រវឹង​បុក​ពេល​កំពុង​ប្រមូល​សំរាម​​​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​នគរបាល​បាន​ឲ្យ​ដឹង​ថា អ្នក​ប្រមូល​សំរាម​ម្នាក់​បាន​រង​របួស​ធ្ងន់​កាល​ពី​​ពេល​ទៀប​ភ្លឺ​ឈាន​ចូល​​​ព្រឹក​​​​​ថ្ងៃ​អាទិត្យ​ នៅ​​ពេល​អ្នក​បើក​បរ​ជន​ជាតិ​ចិន​ដែល​ស្រវឹង​ស្រា​​​​ម្នាក់​បាន​បាត់​បង់​ការ​គ្រប់​គ្រង​​រថយន្ត​ទំនើប​របស់​ខ្លួន​នៅ​ក្នុង​ខណ្ឌ​ដូន​ពេញ​ ហើយ​បាន​​​ជ្រុល​​​​​​​​​​ទៅ​​បុក​​រថយន្ត​ដឹក​សំរាម​​​មួយ​គ្រឿងពី​ក្រោយ​​​រួច​ក៏​បុក​អ្នក​ប្រមូល​សំរាម​រូប​នេះ​តែ​ម្តង​។​

បង​ប្រុស​​ជន​រង​គ្រោះឈ្មោះ យិន​ រ៉ន​ អាយុ​​​​​​​​២៧​ឆ្នាំ​បាន​ឲ្យ​ដឹង​ថា ជន​រង​គ្រោះ​​ យិន​ រាជ​ អាយុ​១៩​ឆ្នាំ​កំពុង​​ដាក់​សំរាម​ចូល​ក្នុង​រថយន្ត​ដឹក​សំរាម​ដែល​កំពុង​ចត​នៅ​តាម​បណ្តោយ​ផ្លូវ​លេខ​១១០​ ចន្លោះ​ផ្លូវ​លេខ​១៩ និង​១៥​នៅ​ម៉ោង​ប្រហែល​៣​និង​៤៥​នាទី​ទៀប​​ភ្លឺ នៅ​ពេល​នោះ​រថយន្ត​ម៉ាក​ ឡង់​គ្រី​ស័រ​​​ បាន​ជ្រុល​ចង្កូត​សំដៅ​ទៅ​ជន​រង​គ្រោះ​រូប​នេះ​​ រួច​បុក​ជន​រង​គ្រោះ​ផ្ទប់​នឹង​​ផ្នែក​ខាង​ក្រោយ​នៃ​រថយន្ត​ដឹក​សំរាម​។

លោក​ រ៉ន​ បាន​និយាយ​នៅ​មន្ទីរ​ពេទ្យ​កាល់​ម៉ែត​ ដែល​ប្អូន​ប្រុស​របស់​គាត់​កំពុង​សន្លប់​​និង​ស្ថិត​ក្នុង​ស្ថានភាព​ធ្ងន់​ធ្ងរ​ថា “លោក​គ្រូ​ពេទ្យ​​​បាន​ប្រាប់​ខ្ញុំ​ថា ប្អូន​ប្រុស​របស់​ខ្ញុំ​បាក់​ឆ្អឹង​ភ្លៅ​ ជង្គង់​ និង​ឆ្អឹង​ត្រគាក​ ហើយ​ខូច​ក្រលៀន​ និង​តម្រង​នោម​ ព្រម​ទាំង​បាត់​បង់​ឈាម​ជា​ច្រើន​ផង​ដែរ​ ព្រោះ​សរសៃ​ឈាម​​ជើង​ទាំង​​​​​​​ពីរ​របស់​គាត់​បាន​ដាច់​។ យើង​មាន​សង្ឃឹម​​​​​​​តិច​ណាស់​ ប៉ុន្តែ​លោកគ្រូ​ពេទ្យ​បាន​ប្រាប់​ថា ប្រសិន​បើ​គាត់​អាច​រស់​រាន​មាន​ជីវិត​ គាត់​អាច​នឹង​​​​ពិការ​”។

លោក សេង​ ចាន់​ថន​ អនុ​ប្រធាន​ផ្នែក​បទ​​ល្មើស​ចរាចរណ៍​នៃ​ការិយាល័យ​នគរបាល​ចរា​​ចរណ៍​រាជ​ធានី​​ដែល​បាន​ទៅ​ដល់​កន្លែង​កើត​ហេតុមិន​យូរ​ប៉ុន្មាន​ បន្ទាប់​ពី​គ្រោះ​ថ្នាក់​នោះ​ បានកើត​ឡើង​បានឲ្យ​ដឹង​ថា អ្នក​បើក​បរ​រថយន្ត​​រូប​នេះ​ឈ្មោះ​ ធាន់ ថូ​ (Tuan To) ជា​ជន​​ជាតិ​ចិន​មាន​អាយុ​៣១​ឆ្នាំ​ និង​ជា​វិស្វករ​​​​សំណង់​។ លោក​ ចាន់​ថន​ បាន​ឲ្យ​ដឹង​បន្ត​ថា គាត់​មិន​ស្គាល់​ឈ្មោះ​ថៅ​កែ​របស់​លោក​ ធាន់​ ថូ​ ទេ​។

លោក​ ចាន់​ ថន​ បាន​មាន​ប្រសាសន៍​ថា “ជន​សង្ស័យ​​ស្រវឹង​ស្រា​ ហើយ​បុក​ជន​រង​គ្រោះ​ពី​ក្រោយ​ ខណៈ​ជន​គ្រោះ​ប្រមូល​សំរាម​នៅ​ពី​ក្រោយ​រថយន្ត​ដឹក​សំរាម​របស់​ក្រុមហ៊ុន​ សុីនទ្រី​ ដោយ​ធ្វើ​ឲ្យ​ជន​រង​គ្រោះ​​រង​របួស​ធ្ងន់​”។

លោក​ ចេវ ហាក់​ នាយ​ការិយាល័យចរា​ចរណ៍ផ្លូវ​គោក​រាជ​ធានី​បាន​ឲ្យ​ដឹង​ថា លោក​បាន​ចាប់​ខ្លួន​អ្នក​បើក​បរ​ជនជាតិ​ចិន​រូប​នោះ​នៅ​កន្លែង​កើត​ហេតុ​ ហើយ​​បាន​បញ្ជូន​ជន​សង្ស័យ​ទៅ​សាលា​ដំបូង​រាជ​ធានី​ ដើម្បី​សាក​សួរ​ កាល​ពី​ម្សិល​មិញ។

លោក​ស្រី​ ឡូរ៉ង់​ ដង់​រ៉ូ​ (Laurence Dangreaux)  អាយុ​៣៩​ឆ្នាំ​ ជា​គ្រូ​បង្រៀន​មក​ពី​ប្រទេស​បារាំង​ដែល​រស់​នៅ​ម្តុំ​កាច់​ជ្រុង​ផ្លូវ​លេខ​១៩​បាន​ឈ​រ​នៅ​ខាង​ក្រៅ​យ៉ផ្ទះ​របស់លោក​ស្រី​នៅ​ពេល​ហេតុ​ការ​ណ៍​​​គ្រោះ​ថ្នាក់​ចរាចរណ៍​បាន​កើត​ឡើង​ ហើយ​បាន​ទូរស័ព្ទ​ហៅ​រថ​​​យន្ត​​​​សង្គ្រោះ​បន្ទាន់​ភ្លាម​ៗ​មុន​ពេល​ជួយ​ជន​រង​គ្រោះ​ជា​មួយ​អ្នក​ជិត​ខាង​។

លោក​ស្រី​បាន​មាន​ប្រសាសន៍​ថា “គាត់​បាន​ជាប់​នៅ​ចន្លោះ​រថយន្ត​ទាំង​ពីរ​ ហើយ​បាន​គ្រវី​ដៃ​ ហើយ​​យើង​បាន​ស្រែក​អ្នក​បើក​បរ​រថយន្ត​ថយ​ក្រោយ​។ ទី​បំផុត​អ្នក​បើក​បរ​រថយន្ត​បាន​ថយ​ក្រោយ​បន្តិច​ ប៉ុន្តែ​បន្ទាប់​មក​រថយន្ត​នោះ​បាន​ជ្រុល​ទៅ​បុក​ជន​រង​គ្រោះ​ម្តង​ទៀត​ មុន​ពេល​ថយ​ក្រោយ​មក​វិញ​”។

លោក​ស្រី​ ដង់​រ៉ូ​ បាន​បន្ថែម​ថា បន្ទាប់ពី​អ្នក​បើក​បរ​ជន​ជាតិ​ចិន​រូប​នោះ​បាន​ដេក​ងោក​​​​នៅ​ក្នុង​រថយន្ត​រហូត​ដល់​ពេល​នគរបាល​មក​ដល់​។​រថយន្ត​បង្ក​ហេតុ​មួយ​គ្រឿង​នេះ​ មាន​ពាក់​ស្លាក​លេខ​កង​យោធពល​ខេមរ​ភូមិន្ទ​​ដែល​មាន​លេខ​ ២៩​៩២៩។ នគរបាល​បាន​បដិសេធ​មិន​បញ្ជាក់​ថា​ តើ​រថយន្ត​របស់​ជន​សង្ស័យ​ ធាន់​ ថូ នេះ​មាន​ពាក់​ស្លាក​លេខ​កង​យោធពល​ខេមរ​ភូមិន្ទ​​ឬ​ក៏​នោះ​ទេ​។

លោក​ ងួន​ ស៊ីផេង​ អ្នក​គ្រប់​គ្រង​ផ្នែក​ប្រតិ​បត្តិ​ការនៅ​ក្រុមហ៊ុន​ស៊ីនទ្រី​ បាន​ឲ្យ​ដឹង​ថា ក្រុមហ៊ុន​នឹង​រ៉ាប់​រង​ថ្លៃ​ព្យាបាល​សម្រាប់​ជន​រង​គ្រោះ​ ប៉ុន្តែ​មូលនិធិ​បេឡារបប​សន្តិសុខ​សង្គម​នឹង​ចេញ​ថ្លៃ​ព្យាបាល​នេះ​ឲ្យ​វិញ​តាម​ក្រោយ​។ លោក​បាន​មាន​ប្រសាសន៍​ថា​ “​កម្មករ​ក្រុមហ៊ុ​ន​ ស៊ីនទ្រី​ ក៏​បាន​ប្រមូល​លុយ​គ្នា​ជួយ​ជន​រង​គ្រោះ​ផង​ដែរ​”៕ស៊ុយឈាង

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស