យោងតាមសេចក្តីរាយការណ៍របស់ទីភ្នាក់ងារព័ត៌មានវៀតណាមមួយបានឲ្យដឹងថា ក្រុមហ៊ុនកសិឧស្សាហកម្មរបស់វៀតណាមមួយដែលគ្រប់គ្រងចម្ការកៅស៊ូដ៏ចម្រូងចម្រាសក្នុងប្រទេសកម្ពុជា មានគម្រោងចាប់ផ្តើមដាំពោតនៅទីនោះនៅដំណាច់ឆ្នាំនេះ។
ទីភ្នាក់ងារព័ត៌មានរដ្ឋ Thanh Nien បានរាយការណ៍កាលពីម្សិលមិញថា លោក ង្វៀន វាន់ស៊ូ (Nguyen Van Su) នាយកប្រតិបត្តិក្រុមហ៊ុន ហួងអាញ់ យ៉ាឡៃ (Hoang Anh Gia Lai) បានឲ្យដឹងថា ក្រុមហ៊ុននឹងចាប់ផ្តើមដាំពោតទាំងនៅក្នុងប្រទេសកម្ពុជា និងប្រទេសឡាវក្នុងឆ្នាំនេះ ដើម្បីរកប្រាក់ចំណូលមួយចំនួន និងដើម្បីសម្រាប់ប្រើប្រាស់ក្នុងប្រតិបត្តិការចម្ការកៅស៊ូរបស់ខ្លួន ដែលនឹងត្រូវចំណាយពេលជាច្រើនឆ្នាំទើបអាចចាប់ផ្តើមប្រមូលផលបាន។
លោក សយ សូណា ប្រធានមន្ទីរកសិកម្មខេត្តរតនគិរីបានឲ្យដឹងថា ក្រុមហ៊ុន ហួងអាញ់ យ៉ាឡៃ កំពុងសាកល្បងដាំពោតនៅលើដីទំហំ១០០ហិកតាក្នុងស្រុកកូនមុំ។
ទីភ្នាក់ងារព័ត៌មានរដ្ឋ Thanh Nien ក៏បានរាយការណ៍ដែរថា ក្រុមហ៊ុន ហួងអាញ់ យ៉ាឡៃ នឹងចុះឈ្មោះបុត្រសម្ព័ន្ធផ្នែកកសិកម្មរបស់ខ្លួននៅក្នុងផ្សារមូលបត្រសិង្ហបុរីឆ្នាំក្រោយ ដើម្បីបង្កើនដើមទុនសម្រាប់ពង្រីកផែនការអាជីវកម្មរបស់ខ្លួន ហើយក្រុមហ៊ុននេះក៏កំពុងរៀបចំផែនការលក់ជ័រកៅស៊ូរបស់ខ្លួនទៅឲ្យក្រុមហ៊ុនផលិតកង់រថយន្ត Michelin និងក្រុមហ៊ុន Bridgestone ផងដែរ។
ចម្ការកៅស៊ូរបស់ក្រុមហ៊ុន ហួងអាញ់ យ៉ាឡៃ នៅក្នុងប្រទេសកម្ពុជា ត្រូវបានចោទប្រកាន់ថា បានលួចយកដីពីប្រជាពលរដ្ឋរាប់រយគ្រួសារនៅក្នុងខេត្តរតនគិរី និងកំពុងកាប់ឈើសហគមន៍របស់ពួកគាត់ដោយខុសច្បាប់។
តែទោះបីជា ក្រុមហ៊ុន ហួងអាញ់ យ៉ាឡៃ បានបដិសេធការចោទប្រកាន់ទាំងនេះក៏ដោយ សាជីវកម្មហិរញ្ញវត្ថុអន្តរជាតិ (International Finance Corporation) ដែលជួយផ្តល់មូលនិធិឲ្យក្រុមហ៊ុន ហួងអាញ់ យ៉ាឡៃ បានទទួលយកពាក្យបណ្តឹងមួយពីអ្នកភូមិជាច្រើនគ្រួសារ ហើយឥឡូវនេះកំពុងតែធ្វើការវាយតម្លៃការអះអាងរបស់ពួកគេដែរ៕ស៊ុយឈាង