យោងតាមសេចក្ដីថ្លែងការណ៍មួយបង្ហោះតាមគេហទំព័ររបស់អគ្គស្នងការនគរបាលជាតិកាលពីម្សិលមិញ បានឲ្យដឹងថា មេដឹកនាំពីរនាក់នៃក្រុមអនាមិកកម្ពុជា ដែលជាសាខារបស់ក្រុមហ៊ែកឃើពិភពលោក ត្រូវបានចាប់ខ្លួននៅខែនេះតាមការចោទប្រកាន់ពីបទជ្រៀតចូលគេហទំព័ររបស់រដ្ឋាភិបាលនិងលួចទិន្នន័យសម្ងាត់ ក្រោយពីអាជ្ញាធរកម្ពុជានិងការិយាល័យសហព័ន្ធស៊ើបអង្កេត FBI របស់សហរដ្ឋអាេមរិកបានធ្វើប្រតិបត្តិការស៊ើបអង្កេតរយៈពេលប្រាំបីខែ។
សេចក្ដីថ្លែងការណ៍ដដែលបញ្ជាក់ថា យុវជនឈ្មោះ ប៊ុន ឃីងមង្គលបញ្ញា អាយុ២១ឆ្នាំ ដែលនៅតាមអីុនធើណិតប្រើឈ្មោះ Sex Machine និង Black Cyber និងយុវជនឈ្មោះ ជូ សុងហេង អាយុ២១ឆ្នាំ ដែលប្រើរហស្សនាម Zoro ត្រូវបានចាប់ខ្លួនកាលពីថ្ងៃទី៧ ខែមេសាពីបទជ្រៀតចូលគេហទំព័ររបស់រដ្ឋាភិបាលសរុបចំនួន៣០ រួមទាំងគេហទំព័រគណៈកម្មាធិការជាតិរៀបចំការបោះឆ្នោត (គ.ជ.ប.) ក្រសួងការបរទេស ក្រសួងការពារជាតិ អង្គភាពប្រឆាំងអំពើពុករលួយ និងសាលារាជធានីភ្នំពេញ ព្រមទាំងគេហទំព័រមួយចំនួនទៀតរបស់វិស័យឯកជនផងដែរ។
សេចក្ដីថ្លែងការណ៍នេះលើកឡើងទៀតថា យុវជន ប៊ុន ឃីងមង្គលបញ្ញា បានសារភាពថា ខ្លួនបានជ្រៀតចូលគេហទំព័រទាំងនេះមែន ចំណែកឯយុវជន ជូន សុងហេង និយាយថា រូបគេគ្រាន់តែជាកូនសិស្សរបស់ ប៊ុន ឃីងមង្គលបញ្ញា ប៉ុណ្ណោះ។
សេចក្ដីថ្លែងការណ៍នេះនិយាយពី ជូ សុងហេង ថា “រូបគេគ្រាន់តែចង់សិក្សាពីវាប៉ុណ្ណោះ។ នោះគឺជាហេតុផលដែលរូបគេសម្រេចចិត្តចូលរួមជាមួយក្រុមហ៊ែកឃើនេះ”។
បុរសវ័យក្មេងទាំងពីរនាក់នេះ គឺជានិស្សិតឆ្នាំទី៣ សិក្សានៅវិទ្យាស្ថានស៊ីតិច (SETEC Institute) ជាសាកលវិទ្យាល័យមួយមានមូលដ្ឋាននៅក្នុងរាជធានីភ្នំពេញ ដែលផ្ដល់ការបណ្ដុះបណ្ដាលថ្នាក់បរិញ្ញាបត្រផ្នែកព័ត៌មានវិទ្យា។
យុវជនទាំងពីរត្រូវបានចាប់ខ្លួនតាមមាត្រា៤២៧ មាត្រា៤២៨ និងមាត្រា៤២៩ នៃក្រមព្រហ្មទណ្ឌរបស់កម្ពុជា ពាក់ព័ន្ធនឹងព័ត៌មានវិទ្យា។ ពួកគេបានធ្វើសកម្មភាពវាយប្រហារ ធ្វើឲ្យរអាក់រអួលមិនដំណើរការគេហទំព័រ ជ្រៀតចូលបណ្ដាញព័ត៌មានវិទ្យាដោយខុសច្បាប់ លួចទិន្នន័យសម្ងាត់ពីប្រព័ន្ធព័ត៌មាន និងការកែទិន្នន័យ។
បទល្មើសនីមួយៗត្រូវពិន័យជាប្រាក់ពី៥០០ដុល្លារទៅ១.០០០ដុល្លារ អមជាមួយនឹងទោសជាប់ពន្ធនាគារចន្លោះពីមួយឆ្នាំទៅពីរឆ្នាំ។ តែទោះជាយ៉ាងណា បច្ចុប្បន្នប្រទេសកម្ពុជាគ្មានច្បាប់ប្រឆាំងបទល្មើសតាមអីុនធើណិតទេ។
ការវាយប្រហារមួយឈ្មោះ Distributed Denial of Service (DDos) បានវាយប្រហារលើគេហទំព័ររបស់រដ្ឋាភិបាល។ គេហទំព័រទាំងនោះត្រូវបានបិទពីប្រព័ន្ធអីុនធើណិត ហើយទិន្នន័យបានលួចចេញពីវា។
សេចក្ដីថ្លែងការណ៍នេះផ្ដល់ព័ត៌មានលម្អិតតិចតួចប៉ុណ្ណោះស្ដីពីការស៊ើបអង្កេតនេះ ប៉ុន្តែលើកឡើងថា អគ្គស្នងការនគរបាលជាតិកំពុងបន្តសហការណ៍ជាមួយ FBI “ដើម្បីតាមចាប់ខ្លួនហ៊ែកឃើបន្ថែមទៀត”។ លោក ឌីម ចៅសេង មេធាវីតំណាងឲ្យយុវជនទាំងពីរបានមានប្រសាសន៍កាលពីម្សិលមិញថា សាលាដំបូងរាជធានីភ្នំពេញបានសាកសួរកូនក្ដីរបស់លោក រួចបញ្ជូនខ្លួនពួកគេទៅពន្ធនាគារព្រៃស។
លោកមានប្រសាសន៍ថា “ជនសង្ស័យកំពុងស្ថិតក្រោមការស៊ើបអង្កេតរបស់តុលាការនៅឡើយ ដូច្នេះគេក៏ឃុំខ្លួនពួកគេសម្រាប់ជំនុំជម្រះ”។
ការចាប់ខ្លួននេះធ្វើឡើងពីរបីថ្ងៃមុនច្បាប់ចម្លងនៃសេចក្ដីព្រាងច្បាប់ស្ដីពីបទល្មើសតាមអីុនធើណិតរបស់កម្ពុជាត្រូវបានចុះផ្សាយតាមអីុនធើណិត។ ច្បាប់នេះដាក់ទោសធ្ងន់ជាងក្រមព្រហ្មទណ្ឌរបស់កម្ពុជាសម្រាប់បទល្មើសស្រដៀងគ្នាពាក់ព័ន្ធនឹងព័ត៌មានវិទ្យា។
លោក ម៉ាក រ៉ាស (Mark Rasch) អតីតប្រធានអង្គភាពបទល្មើសកុំព្យូទ័រនៃក្រសួងយុត្តិធម៌របស់សហរដ្ឋអាេមរិកបានមានប្រសាសន៍ថា យុវជនទាំងពីរបានមានប្រសាសន៍អំពីយុវជនទាំងពីរថា “ដោយសារតែ [កម្ពុជា] គ្មានច្បាប់ស្ដីពីបទល្មើសតាមអីុនធើណិត គេមិនអាចចោទប្រកាន់ពួកគេទាំងពីរពីបទល្មើសធ្ងន់ធ្ងរជាងនេះបានទេ”។
លោកបានមានប្រសាសន៍ទៀតថា ទោះបីជាវាអាចទៅរួច ដែលថា រដ្ឋាភិបាលកម្ពុជាបានស្នើសុំឲ្យ FBI ជួយតាមវែកមុខហ៊ែកឃើទាំងនេះក្ដី ក៏មានសេនារីយោមួយច្បាស់ជាងនេះបង្ហាញថា FBI បានរកឃើញព័ត៌មានស្ដីពីក្រុមអនាមិកកម្ពុជា នៅក្នុងការស៊ើបអង្កេតរបស់ខ្លួនលើក្រុមនេះ រួចក៏ផ្ដល់ព័ត៌មាននេះដល់អាជ្ញាធរកម្ពុជា។
ឧត្តមសេនីយ៍ឯក ឆាយ ស៊ីណារិទ្ធ ប្រធាននាយកដ្ឋានសន្ដិសុខផ្ទៃក្នុងនៃក្រសួងមហាផ្ទៃបានមានប្រសាសន៍ថា អាជ្ញាធរបានចាប់ខ្លួនយុវជនទាំងពីរជាផ្នែកនៃការស៊ើបអង្កេតរួមគ្នា ដោយអគ្គស្នងការនគរបាលជាតិនិង FBI។
លោកមានប្រសាសន៍ថា “នៅពេលអគ្គស្នងការនគរបាលជាតិកំពុងសហការជាមួយ FBI ដើម្បីធ្វើការស៊ើបអង្កេតលើ [ការជ្រៀតចូលទិន្នន័យ] យើងក៏បានរកឃើញជនសង្ស័យពីរនាក់ជ្រៀតចូលទិន្នន័យរបស់គ.ជ.ប. និងស្ថាប័នរដ្ឋផ្សេងៗទៀត”។
លោក ស៊ាន ម៉ាកគិនតូស (Sean McIntosh) អ្នកនាំពាក្យស្ថានទូតអាមេរិកប្រចាំកម្ពុជាបានបដិសេធមិនឆ្លើយបំភ្លឺទេនៅពេលត្រូវគេសាកសួរអំពីការជួយរបស់ FBI នៅក្នុងករណីនេះ។ លោកមានប្រសាសន៍ថា “យើងមិនធ្វើអត្ថាធិប្បាយលើការស៊ើបអង្កេតដែលកំពុងបន្ដដំណើរការនោះទេ”។
កាលពីខែកក្កដា ឆ្នាំ២០១៣ សមាជិកបីនាក់នៃក្រុមអនាមិកកម្ពុជាទទួលបានការកោតសរសើរចំពោះការជ្រៀតចូលគេហទំព័រចំនួនពីររបស់គ.ជ.ប.។ នៅក្នុងការវាយប្រហារលើគេហទំព័របញ្ជីឈ្មោះបោះឆ្នោតរបស់គ.ជ.ប. ហ៊ែកឃើទាំងនេះបានបង្ហោះរូបរបាំងមុខ Guy Fawkes ដែលជាឈុតចុងក្រោយនៃខ្សែភាពយន្តរឿង “The Great Dictator” ដែលជាខ្សែភាពយន្តប្រឆាំងពួកហ្វាស៊ីសរបស់ ឆាលី ឆាបលីន (Charlie Chaplin) ផលិតក្នុងឆ្នាំ១៩៤០ និងលិខិតមួយច្បាប់របស់ព្រះមហាក្សត្រនរោត្តម សីហមុនី ផ្ញើទៅប្រជាពលរដ្ឋកម្ពុជា។
រយៈពេលប៉ុន្មានខែក្រោយមកក្រុមនេះបានអះអាងទទួលខុសត្រូវចំពោះការវាយប្រហាររាប់សិបដងបន្ថែមទៀត ដោយភាគច្រើនវាយប្រហារលើគេហទំព័ររបស់រដ្ឋាភិបាលរួមមានអង្គភាពព័ត៌មាន និងប្រតិកម្មរហ័សនៅទីស្ដីការគណៈរដ្ឋមន្ត្រី ក្រុមប្រឹក្សាកំណែទម្រង់ច្បាប់និងប្រព័ន្ធតុលាការ និង ទូរទស្សន៍ជាតិកម្ពុជា ជាដើម។
កាលពីខែកញ្ញា ឆ្នាំ ២០១៣ ក្រុមអនាមិកពិភពលោកនេះបានបង្ហោះខ្សែវីដេអូមួយតាមប្រព័ន្ធអីុនធើណិត ដោយដាក់ចំណងជើងថា “Operation Freedom” ប្រតិបត្តិការដើម្បីសេរីភាពដោយនិយាយថា ខ្លួនសុំ “ប្រកាសសង្គ្រាម” ជាមួយគណបក្សប្រជាជនកម្ពុជាកំពុងកាន់អំណាច ជាការឆ្លើយតបទៅនឹងការប៉ះទង្គិចជាមួយបាតុករដែលបានធ្វើឲ្យមនុស្សម្នាក់បាត់បង់ជីវិត។
នៅក្នុងការសាកសួរទល់មុខគ្នាកាលពីឆ្នាំមុនជាមួយបុរសម្នាក់ដែលដាក់ឈ្មោះខ្លួនឯងថា Black Cyber យុវជនរូបនេះនិយាយថា ការជ្រៀតចូលគេហទំព័ររបស់រដ្ឋាភិបាលកម្ពុជាជារឿងងាយស្រួល។
រូបគេនិយាយថា “យើងបានជ្រៀតចូលគេហទំព័ររបស់គ.ជ.ប. ក្រសួងការបរទេស ហើយពេលនេះខ្ញុំបានជ្រៀតចូលគេហំព័ររបស់អង្គភាពប្រឆាំងអំពើពុករលួយ។ លេខកូដសម្ងាត់របស់ពួកគេងាយស្រួលណាស់ គឺ១២៣៤៥”៕ សុខុម