ក្រុមមន្ត្រីបាននិយាយថា កាលពីយប់ថ្ងៃច័ន្ទ នគរបាលខេត្តកំពង់ស្ពឺបានឃាត់កុងតឺន័របីគ្រឿងបើកបរតាមផ្លូវជាតិលេខ៤ឆ្ពោះទៅកំពង់ផែស្វយ័តក្រុងព្រះសីហនុដោយរឹបអូសបានឈើប្រណីតខុសច្បាប់ជាង១០០ដុំ។
លោក ញ៉ែម សៅ នាយនគរបាលសេដ្ឋកិច្្ចខេត្តបានមានប្រសាសន៍ថា មន្ត្រីរបស់លោកនិងនគរបាលមកពីក្រុងច្បារមនបានឃាត់រថយន្តកុងតឺន័រទាំងនេះបន្ទាប់ពីការស៊ើបអង្កេតរួមគ្នាដោយមានការចូលរួមពីមន្ទីររុក្ខាប្រមាញ់ខេត្ត និងព្រះរាជអាជ្ញារងអមសាលាដំបូងខេត្ត។
លោក ញ៉ែម សៅ បានមានប្រសាសន៍ថា “នេះគឺជាករណីរបស់មន្ត្រីរុក្ខាប្រមាញ់ និងលោកព្រះរាជអាជ្ញារង ទី ម៉ានីន។ មន្ត្រីរបស់ ខ្ញុំគ្រាន់តែសហការក្នុងករណីនេះតែប៉ុណ្ណោះ ដូច្នេះហើយខ្ញុំមិនត្រូវបានអនុញ្ញាតឲ្យធ្វើអត្ថាធិប្បាយបន្ថែមឡើយ”។
លោក អ៊ូច ហ៊ាង អធិការនគរបាលក្រុងច្បារមនបានអះអាងថា នគរបាលរឹបអូសបានឈើខុសច្បាប់ពីកុងតឺន័របីគ្រឿងមែន ប៉ុន្តែលោកក៏បានបដិសេធមិនធ្វើអត្ថាធិប្បាយ បន្ថែមដែរ។
ក្រុមមន្ត្រីរុក្ខាប្រមាញ់ខេត្តកំពង់ស្ពឺមិនអាចទាក់ទងបានទេ ប៉ុន្តែបើតាមមន្ត្រីនគរបាលខេត្តម្នាក់ដែលសុំមិនបញ្ចេញឈ្មោះដោយសារភាពរសើបនៃករណីនេះបានឲ្យដឹងថា មានការចាប់ខ្លួនមនុស្សពីរនាក់ ហើយឥឡូវនេះជនសង្ស័យទាំងនេះកំពុងត្រូវឃុំ ខ្លួននៅការិយាល័យរដ្ឋបាលព្រៃឈើខេត្ត។
លោកបានមានប្រសាសន៍ថា ប្រតិបត្តិការនេះធ្វើឡើងតាមបញ្ជារបស់លោក ឆេង គឹមស៊ុន ប្រធានរដ្ឋបាលព្រៃឈើ។ គេមិនអាចទាក់ទងលោក ឆេង គឹមស៊ុន បានទេ៕សារុន