29 C
Phnom Penh

តុលាការ​តម្កល់​សាល​ក្រមផ្ទន្ទាទោសយាយ​ក្រពើ​ដែលត្រូវ​បាន​ចោទ​ប្រកាន់​ពី​បទរំលោភ​​យក​ដី​រដ្ឋ​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ សាលា​ឧទ្ធរណ៍​បាន​តម្កល់​​​សាល​ក្រម​ផ្តន្ទា​ទោស​កាល​ឆ្នាំ​២០១២​​​ជាប់​ទាក់ទិន​នឹង​ការ​រំលោភ​​យក​ដី​រដ្ឋ​ ប៉ុន្តែ​បាន​កាត់​​បន្ថយ​ទោសរបស់​​អ្នក​​ជំនួញ​​ ឈិន​ សុគន្ធារី​ ដែល​ត្រូវ​បាន​ចោទ​ប្រកាន់​ពី​បទ​​​ចាក់​បំពេញ​ផ្នែក​ខ្លះ​នៃ​បឹង​មួយ​នៅ​ក្នុង​រាជ​ធានី​ដោយ​ខុស​ច្បាប់​​។​

អ្នក​ស្រី​ សុគន្ធារី​ ដែល​គេ​ហៅ​ក្រៅ​ថា យាយ​ក្រពើ​ដោយ​សារ​តែ​អ្នក​ស្រី​មាន​កសិ​ដ្ឋាន​​ចិញ្ចឹម​ក្រពើ​នោះ​ ត្រូវ​បាន​ផ្តន្ទា​ទោស​ដោយ​កំបាំ​ង​មុខ​កាល​ពី​ឆ្នាំ២០១២​ឲ្យ​ជាប់​ពន្ធ​នាគារ​រយៈពេល​បួន​ឆ្នាំ​និង​ប្រាំ​មួយ​ខែ​ ហើយ​ត្រូវ​តុលា​ការ​បង្គាប់​ឲ្យ​បង់​ប្រាក់​ពិន័យ​ចំនួន​៣០​លាន​រៀល​ និង​ប្រាក់​សំណង​ចំនួន​៦០​លាន​រៀល​។

អ្នក​ស្រី​តែង​តែ​បដិសេធ​ការ​ចោទ​ប្រកាន់ពី​បទ​រំលោភ​​យក​ដី​រដ្ឋ​ ដោយ​អះ​អាង​ថា លោក​ ​​ែ​កប ជុតិមា​ អតីត​អភិបាល​រាជ​ធានី​ភ្នំ​ពេញ​ បាន​លួច​ដី​របស់​គាត់​ ក្នុង​គោល​​បំណង​​យក​ទៅ​លក​់​ឲ្យ​លោក​ លី​ យ៉ុង​ផាត់​ មហា​សេដ្ឋី​​ស្ករ​ស​។

កាល​ពី​ម្សិលមិញ​ ចៅ​ក្រម​ ងួន​ អឹម​ បាន​តម្កល់​សាលក្រមផ្តន្ទាទោស​​អ្នក​ស្រី​ សុគន្ធារី​ ដែល​សព្វ​ថ្ងៃ​កំពុង​គេច​ខ្លួន​ ប៉ុន្តែ​​បាន​បន្ធូរ​បន្ថយ​ស្ថាន​ទម្ងន់​ទោស​របស់​អ្នក​ស្រី​។​ លោក​បាន​មាន​ប្រសាសន៍​ថា “សាលា​ឧទ្ធរណ៍​បាន​សម្រេច​តម្កល់​សេចក្តី​សម្រេច​របស់​សាលា​ដំបូង​រាជ​ធានី​ភ្នំពេញ​ ប៉ុន្តែ​បាន​ផ្តន្ទាទោស​អ្នក​ស្រី សុគន្ធារី​ ឲ្យ​ជាប់​ពន្ធនាគារ​រយៈ​ពេល​​ពីរឆ្នាំ​”។

លោក​ ងួម​ អឹម​ ក៏​បាន​កាត់​បន្ថយ​ប្រាក់​ពិន័យ​មកត្រឹម​​​១៥​លាន​រៀល​ផង​ដែរ​។ ចៅ​ក្រម​​​​​បាន​លើក​ឡើងថា ខ្លួន​បាន​កែ​ប្រែ​ស្ថាន​ទម្ងន់​ទោស​នេះ​ ដោយ​ផ្អែក​លើ​ព័ត៌មាន​ដែល​​ផ្តល់​ឲ្យ​​អំឡុង​ និង​ចាប់​តាំង​ពី​ពេល​ បើក​​សវ​នា​​ការ​ជំនុំ​ជម្រះ​ក្តី​នៅ​សាលា​ឧទ្ធរណ៍​ កាល​​​​ពី​ខែមុន​ ប៉ុន្តែ​ចៅ​ក្រម​មិន​បាន​រៀប​រាប់​អ្វី​ច្រើន​​​​នោះ​ឡើយ​។​

លោក​ យឹម​ សារី​ មេធាវី​របស់​លោក​ កែប​ ជុតិមា​ បាន​ឲ្យដឹង​ថា លោក​ពេញ​ចិត្ត​នឹង​​សាល​​​ក្រម​ និង​ការ​កែ​ប្រែ​ស្ថាន​ទម្ងន់​ទោស​ថ្មីនេះ​ ប៉ុន្តែ​លោក​បាន​បដិសេធ​​មិន​ធ្វើ​អត្ថា​ធិប្បាយ​បន្ថែម​ទេ​។

​តែ​ទោះ​ជា​យ៉ាង​ណា​ លោក​ សុក សំអឿន​​មេធាវី​របស់​អ្នក​ស្រី​ សុគន្ធារី​ បាន​លើក​ឡើង​ថា​ សេចក្តី​សម្រេច​របស់​សាលា​ឧទ្ធរណ៍​មិន​ទាន់​​មាន​យុត្តិ​ធម៌​នៅ​ឡើយ​ ដោយ​លោក​និយាយ​​​​​ថា អ្នក​ស្រី​ សុគន្ធារី​ មាន​សិទ្ធិ​កាន់​កាប់​​ស្រប​ច្បាប់​លើ​ដី​ដែលមាន​​វិវាទ​ ហើយ​អ្នក​ស្រី​​​បាន​រង់​ចាំ​​ប័ណ្ណកម្មសិទ្ធិ​ដីធ្លី​ តាំង​ពី​ឆ្នាំ​២០១១​​​​មក​ម៉្លេះ បន្ទាប់​ពី​បាន​ដាក់​ពាក្យ​ស្នើ​សុំ​ទៅ​សាលារាជធានី​​រួច​។

លោក​ សុក សំអឿន​ បាន​មាន​ប្រសាសន៍​ថា “អ្នក​​​ស្រី​ ឈិន​ សុគន្ធារី​ មាន​ឯក​សារ​ផ្លូវ​ការ​ ដែល​បញ្ជាក់​ថា អ្នក​ស្រី​បាន​ទិញ​ដី​ពី​អ្នក​ភូមិ​នៅក្នុង​តំបន់​នោះ​ ដោយ​មាន​អាជ្ញាធរ​មូល​ដ្ឋាន​ជា​អ្នក​ទទួល​ស្គាល់​ និង ដឹង​ឮ​ហើយ​​​​អ្នក​ស្រី​បាន​បង់​ពន្ធ​លើ​​ដីនេះ​មក​រហូត​។ ប៉ុន្តែ​អ្នក​ស្រី​មិន​មាន​ប័ណ្ណ​កម្ម​សិទ្ធិ ដី​ធ្លី​ទេ​។​ អ្នក​ស្រី​បាន​ដាក់​ពាក្យ​ស្នើ​សុំ​ ប៉ុន្តែ​សាលា​រាជ​ធានី​ភ្នំពេញ​មិន​បាន​ចេញ​ប័ណ្ណ​កម្ម​សិទ្ធិ​ដី​ធ្លី​នេះ​ឲ្យ​គាត់​ឡើយ​”។ លោក​ សំ​អឿន​ បាន​លើក​ឡើង​ថា គាត់​មិន​បាន​ដឹង​ថា​ តើ​អ្នក​ស្រី​ សុគន្ធារី​ នឹង​ប្តឹង​ទាស់​​ ឬក៍​អត់​នោះ​ទេ៕​ ស៊ុយឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស