27 C
Phnom Penh

កម្ពុជា​មាន​ផែនការ​​យុទ្ធសាស្ត្រ​ជាមួយ​ភាគី​​បេឡា​រុស​ដើម្បី​ជំរុញ​វិស័យ​ពាណិជ្ជកម្ម​និង​វិនិយោគ

ដោយ ឌឹ ខេមបូឌា ដេលី

បទវិភាគ

លោកនាយករដ្ឋមន្ត្រី​ ហ៊ុន សែន និង​ភាគី​បេឡារុស​របស់​លោក​គឺ​លោក​ មុីកហាល់ មី យ៉ាស់នី​កូវីច (Kikhail Myasnikovich) បាន​ឯក​ភាព​គ្នា​ជំរុញ​វិស័យ​ពាណិជ្ជ​កម្ម​ និង​វិនិ​យោគ​ទ្វេ​ភាគី​ រវាង​ប្រទេស​ទាំង​ពីរ​ អំឡុង​​​ជំនួប​មួយ​​​រវាង​គណៈប្រតិភូ​ជាន់​ខ្ពស់​នៅ​ប្រទេស​ទាំង​ពីរ​កាលពី​ម្សិលមិញ នៅ​ទីក្រុង​មីន។

គណៈប្រតិភូ​នៃ​ប្រទេស​ទាំង​ពីរ​បាន​ជួប​ប្រជុំ​គ្នា​ មួយ​ថ្ងៃ​បន្ទាប់​ពី​ក្រុម​ប្រតិភូ​របស់​លោក ហ៊ុន សែន ដែល​រួម​មាន​មន្ត្រី​ជាន់​ខ្ពស់​​ជា​ច្រើន​រូប​ក៏​ដូចជា លោក សុខ អាន ឧបនាយករដ្ឋ​មន្ត្រី​ទទួល​បន្ទុក​ទីស្តី​ការ​គណៈ​រដ្ឋមន្ត្រី​ និង​លោក ស៊ុន ចាន់​ថុល រដ្ឋមន្ត្រី​ក្រសួង​ពាណិជ្ជ​កម្ម បាន​​ចុះ​ហត្ថលេខា​លើ​ផែនការ​ពាណិជ្ជកម្ម​សំខាន់ៗ​​ជា​ច្រើន​ អំឡុង​ដំណើរ​ទស្សនកិច្ច​នៅ​​ប្រទេស​អាស៊ែបៃហ្សង់ (Azerbaijan)។

លោក មីយ៉ាស់​នីកូវីច បាន​លើក​ឡើង​ថា កិច្ច​ព្រម​ព្រៀង​ទាំង​១០​ដែល​ភាគី​បេឡារុស​ និង​កម្ពុជា​បាន​ចុះ​ហត្ថលេខា​ជាមួយ​គ្នា​នឹង​នាំ​ ឲ្យ​មាន​សកម្មភាព​វិនិយោគ និង​ការ​បង្កើត​ថ្មី​មាន​កាន់​តែ​ច្រើន​រវាង​ប្រទេស​ទាំង​ពីរ។

លោក​បាន​មាន​ប្រសាសន៍​ថា “ ប្រសិន​បើ​យើង​ព្រម​ព្រៀង​គ្នា​លើ​ការ​អនុវត្ត​គម្រោង​យុទ្ធសាស្រ្ត​ទ្រង់​ទ្រាយ​ធំ​ យើង​នឹង​ត្រៀម​ខ្លួន​រួច​រាល់​សម្រាប់​ពិចារណា​អំពី​ការ​ផ្ទេរ​បច្ចេក​វិទ្យា​មក​ប្រទេស​របស់​អ្នក​” នេះ​បើ​យោង​តាម​​ប្រព័ន្ធ​ផ្សព្វ​ផ្សាយ​រដ្ឋ​បេឡារុស​។ លោក​បាន​​​លើក​ឡើង​​ថា កិច្ច​ព្រម​ព្រៀង​ទាំង​នេះ​នឹង “ជួយ​ពង្រឹង​មូល​ដ្ឋាន​ច្បាប់ និង​កិច្ច​សន្យា​នៃ​កិច្ច​សហ​ប្រតិបត្តិការ​ទ្វេ​ភាគី​គួរ​ឲ្យ​កត់​សម្គាល់”។

យោង​តាម​តួលេខ​រដ្ឋាភិបាល​បេឡារុស​​បាន​ឲ្យ​ដឹង​ថា តម្លៃ​ពាណិជ្ជកម្ម​ជាមួយ​ប្រទេស​កម្ពុជា​មាន​សរុប​ចំនួន​៦,៣លាន​ដុល្លារ​ ក្នុង​ឆ្នាំ​២០១៣ ពោល​គឺ​កើន​ឡើង​២០០ភាគ​រយ​បើ​ធៀប​នឹង​ឆ្នាំ​២០១២។ ក្នុង​រយៈពេល​ពីរ​ខែ​ដំបូង​នៃ​ឆ្នាំ​នេះ ទំហំ​ពាណិជ្ជកម្ម​ទ្វេ​ភាគី​បាន​កើន​ឡើង​ដល់​១,៤លាន​ដុល្លារ​ ពោល​គឺ​កើន​ឡើង​៣០​ភាគ​រយ​បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន​។

ទំនិញ​នាំ​ចេញ​ពី​ប្រទេស​បេឡារុស​មក​ប្រទេស​កម្ពុជាមាន​ដូចជា ជីរទឹក​ក្បុង និង​ត្រាក់​ទ័រ​ នេះ​បើយោង​តាម​ប្រព័ន្ធ​ផ្សព្វផ្សាយ​រដ្ឋ​បេឡាុរុស​ ដែល​បាន​រាយការណ៍​បន្ថែម​ទៀត​ថា ត្រាក់​ទ័រ​ផលិត​នៅ​ប្រទេស​បេឡារុស​បាន​ចូល​រួម​ចំណែក​ជាង​ពាក់​កណ្តាល​នៃ​ចំនួន​ត្រាក់​ទ័រ​សរុប​ដែល​ត្រូវ​បាន​ប្រើប្រាស់​នៅ​ប្រទេស​កម្ពុជា​។

សេចក្តី​ថ្លែងការណ៍​រួម​មួយ​ចុះ​ហត្ថលេខា​ដោយ​លោក ហ៊ុន សែន និង​លោក មីយ៉ាស់នី​កូវីច បាន​ឲ្យ​ដឹង​ថា វិស័យ​ពាណិជ្ជកម្ម​ទ្វេ​ភាគី​នឹង​ត្រូវ​បានជំរុញ​នៅ​ក្នុង​ប្រទេស​ទាំង​ពីរ​។

សេចក្តី​ថ្លែង​ការណ៍​នេះ​មាន​ខ្លឹម​សារ​ថា “ភាគី​កម្ពុជា​នឹង​ផ្តល់​លក្ខខណ្ឌ​អំណោយ​ផល​សម្រាប់​ផ្សព្វផ្សាយ​គ្រឿង​ចក្រ​សម្រាប់​​វិស័យ​កសិកម្ម​ រថយន្តដឹក​សំរាម​ រថយន្ត​ដឹក​ទំនិញ សំបក​កង់​ ជីរ ឱសថ ឧបភោគបរិភោគ និង​ទំនិញ​ផ្សេងៗទៀត​”។

សេចក្តី​ថ្លែង​ដដែល​មាន​ខ្លឹម​សារ​បន្ត​ទៀត​ថា “ភាគី​បេឡារុស​នឹង​ជួយ​ប្រទេស​កម្ពុជា​ក្នុង​ការ​បង្កើន​ទំនិញ​នាំ​ចេញ​ទៅ​ប្រទេស​បេឡា​រុស​ ដូច​ជា អង្ករ គ្រឿង​សមុទ្រ កៅស៊ូ និង​ទំនិញ​​ប្រពៃណី​ខ្មែរ​ផ្សេងៗទៀត​”។

លោកនាយករដ្ឋមន្ត្រី​ ហ៊ុន សែន ក៏​បាន​ឯក​ភាព​ចំពោះ​ផែនការបង្កើត​គណៈកម្មការ​អន្តរ​រដ្ឋាភិបាល​បេឡារុស​-កម្ពុជា ទទួល​បន្ទុក​កិច្ច​សហ​ប្រតិបត្តិការ​ពាណិជ្ជកម្ម​ និង​សេដ្ឋកិច្ច​។

សេចក្តី​ថ្លែងការណ៍​ដដែល​​បាន​ឲ្យ​ដឹង​ទៀត​ថា លោកនាយករដ្ឋមន្ត្រី​ បេឡារុស​ បាន​អប​អរ​សាទរ​គណបក្ស​ប្រជាជន​របស់​លោក ហ៊ុន សែន ដែល​បាន​ទទួល​ជោគ​ជ័យ​ក្នុង​ការ​បោះ​ឆ្នោត​ជាតិ​កាលពី​ខែកក្កដា ប្រកប​ដោយ​ភាព​ចម្រូង​ចម្រាស។ ប៉ុន្តែ លោក​ មីយ៉ាស់នីកូវីច បាន​លើក​ឡើង​ថា ការ​បោះ​ឆ្នោត​នោះ​ត្រូវ​បាន​រៀប​ចំ​ប្រកប​ដោយ​បរិយា​កាស​​សេរី​ យុត្តិធម៌​ និង​សន្តិភាព​៕សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស