គ្រួសារមកពីសហគមន៍បឹងកក់ក្នុងរាជធានីភ្នំពេញនិយាយថា នាយកធនាគារពិភពលោកប្រចាំប្រទេសកម្ពុជាបានប្រាប់ខ្លួនកាលពីម្សិលមិញថា គាត់សង្ឃឹមថា ជម្លោះរបស់គ្រួសារទាំងនេះនឹងត្រូវដោះស្រាយនៅដំណាច់ឆ្នាំនេះ ហើយថា ធនាគារនេះអាចនឹងចាប់ផ្ដើមផ្ដល់ឥណទានដល់កម្ពុជាឡើងវិញនៅឆ្នាំ២០១៥ ជាការអះអាងមួយដែលធនាគារនេះបដិសេធ។
ធនាគារពិភពលោកបានលាតត្រដាងកាលពីពាក់កណ្ដាលឆ្នាំ២០១១ថា ខ្លួនបានផ្អឹបទុកឥណទានថ្មីៗទាំងអស់ដែលត្រូវផ្ដល់ឲ្យកម្ពុជា ដើម្បីតវ៉ាចំពោះសកម្មភាពរបស់សាលារាជធានីភ្នំពេញដែលបណ្ដេញប្រជាពលរដ្ឋរាប់ពាន់គ្រួសារចេញពីសហគមន៍បឹងកក់ ដោយបង្ខិតបង្ខំ ដើម្បីបើកផ្លូវសម្រាប់គម្រោងអចលនទ្រព្យរបស់សមាជិកព្រឹទ្ធសភាមួយរូប។
ប្រជាពលរដ្ឋនៅសហគមន៍បឹងកក់ជាង៦០០គ្រួសារ ដែលអាជ្ញាធរមិនទាន់បណ្ដេញចេញនៅឡើយ បានទទួលប័ណ្ណកម្មសិទ្ធិដីធ្លី ដែលពួកគាត់ទន្ទឹងរង់ចាំជាយូរមកហើយ ប៉ុន្តែប្រជាពលរដ្ឋប្រហែល៥០នាក់ ដែលកំពុងស្ថិតក្នុងដំណាក់កាលចរចាជាមួយសាលារាជធានី ដើម្បីសុំប័ណ្ណកម្មសិទ្ធិដីធ្លីផ្ទាល់ខ្លួន បានធ្វើការតវ៉ានៅខាងមុខការិយាល័យធនាគារពិភពលោកក្នុងរាជធានីភ្នំពេញកាលពីម្សិលមិញ។
ពួកគាត់និយាយថា ដីដែលសាលារាជធានីផ្ដល់ឲ្យពួកគាត់ គឺតិចជាងអ្វីដែលពួកគាត់សមនឹងទទួលបាន ហើយចង់ឲ្យមន្ត្រីធនាគារមានវត្តមាននៅពេលចរចាលើកក្រោយៗ រវាងពួកគាត់ជាមួយសាលារាជធានី។
បន្ទាប់ពីជួបជាមួយលោក អាឡាសាន សូវ (Alassane Sow) នាយកធនាគារពិភពលោកប្រចាំប្រទេសកម្ពុជា ពួកគាត់និយាយថា លោក អាឡាសាន សូវ មិនបានឆ្លើយតបតាមសំណើរបស់ពួកគាត់ទេ ប៉ុន្តែ “គាត់និយាយថា គាត់សង្ឃឹមថា ស្ថានភាពនឹងវិលទៅរកសភាពដើមដូចកាលពីឆ្នាំ២០១០។ គាត់សង្ឃឹមថា បញ្ហាបឹងកក់នឹងបញ្ចប់នៅឆ្នាំ២០១៤” នេះបើយោងតាមការលើកឡើងរបស់អ្នកស្រី បូវ សុភា ជាអ្នកតវ៉ាម្នាក់ក្នុងចំណោមអ្នកតវ៉ាដែលបានជួបជាមួយលោក អាឡាសាន សូវ។
អ្នកស្រីនិយាយទៀតថា “គាត់ក៏មានប្រសាសន៍ដែរថា នៅពេលបញ្ហាបឹងកក់ដោះស្រាយរួច គាត់នឹងផ្ដល់ឥណទានដល់រដ្ឋាភិបាលសម្រាប់ជួយដល់វិស័យសុខាភិបាល និងជួយដល់ប្រជាពលរដ្ឋកម្ពុជាក្រីក្រ”។
ពេលទាក់ទងទៅលោក អាឡាសាន សូវ តាមក្រោយ លោកបានបដិសេធយ៉ាងដាច់អហង្ការថា មិនបានធ្វើអត្ថាធិប្បាយបែបនេះទេ។ លោកមានប្រសាសន៍ថា “ខ្ញុំមិនបាននិយាយបែបនោះទេ”។
លោក អាឡាសាន សូវ បានមានប្រសាសន៍ថា លោកបានស្ដាប់ក្ដីបារម្ភរបស់អ្នកតវ៉ាទាំងនេះ ហើយប្រាប់ពួកគាត់ថា លោកចាប់អារម្មណ៍ចង់ស្ដាប់គ្រួសារទាំងនេះនិយាយ ហើយក៏ចង់ស្ដាប់សាលារាជធានីដែរ។ លោកបានបដិសេធមិនធ្វើអត្ថាធិប្បាយអំពីវិធីដែលរដ្ឋាភិបាលដោះស្រាយក្ដីបារម្ភរបស់គ្រួសារទាំងនេះឬពិភាក្សាអំពីជម្លោះនេះបន្ថែមទៀតឡើយ។
ពេលទាក់ទងទៅម្ដងទៀត អ្នកស្រី បូវ សុភា បានគាំទ្រការលើកឡើងរបស់ខ្លួនអំពីជំនួបនេះ ហើយបាននិយាយទៀតថា លោក អាឡាសាន សូវ បានប្រាប់ពួកគាត់កុំឲ្យនិយាយជាមួយប្រព័ន្ធផ្សព្វផ្សាយអំពីអ្វីដែលពួកគាត់បាននិយាយគ្នា។
អ្នកស្រីនិយាយថា “គាត់បានប្រាប់ពួកយើងកុំឲ្យនិយាយជាមួយអ្នកយកព័ត៌មានអំពីជំនួបនេះ ពីព្រោះគាត់កំពុងសហការយ៉ាងជិតស្និទ្ធជាមួយអភិបាល [រាជធានី]”។
ទាំងលោក ប៉ា សុជាតិវង្ស អភិបាលរាជធានីភ្នំពេញ ទាំងលោក ឡុង ឌីម៉ង់ អ្នកនាំពាក្យសាលារាជធានីមិនអាចទាក់ទងសុំការបំភ្លឺបានទេពាក់ព័ន្ធនឹងរឿងនេះ៕ សុខុម
(រាយការណ៍បន្ថែមដោយ Zsombor Peter)