29 C
Phnom Penh

នគរបាល​​សាកសួរ​អ្នកភូមិ​​ម្នាក់​ដែលមានវិវាទ​ដីធ្លី​ជាមួយ​ភរិយាលោក ស៊ុយ សែម​ 

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ម្នាក់​ក្នុង​ខេត្ត​កំពង់​ឆ្នាំង​និយាយ​​ថា នគរ​បាល​បាន​សាក​សួរ​គាត់​កាល​ពី​ម្សិល​មិញ​ជុំវិញ​ការ​ចោទ​ប្រកាន់​ថា គាត់​បាន​ “ញុះញង់​” អ្នកជិត​ខាង​របស់​ខ្លួន​ឲ្យ​តវ៉ា​នឹ​ង​ការ​ប្រឹង​ប្រែង​​​របស់​អាជ្ញាធរ​ក្នុង​ការ​ដោះ​ស្រាយ​វិវាទ​ដីធ្លី​ដែល​កើត​មាន​ជា​យូរ​មក​ហើយ​ជា​មួយ​​ភរិយា​​​របស់​លោក​ ស៊ុយ សែម រដ្ឋមន្ត្រីក្រសួង​រ៉ែ និង​​​​​​​ថាម​ពល​។

លោក រាជ សីមា ដែល​ជា​តំណាង​អ្នក​ភូមិ​១៧​គ្រួសារ​ក្នុង​ស្រុក​កំពង់​ត្រឡាច ដែល​មិន​ទាន់​បាន​យល់​ព្រម​ទទួល​យកការ​ផ្ត​ល់​​​សំណង​​ពី​អ្នកស្រី ជា ខេង ជា​ពាណិ​ជ្ជករ​​នៅ​ឡើយ​​នោះ​និយាយ​ថា នគរ​​បាល​បាន​ចោទ​លោក​ថា បាន​ញុះញង់​​ឲ្យ​មាន​ការ​រៀប​ចំ​កិច្ច​ប្រជុំមួយ​នៅ​ផ្ទះ​របស់​លោក​កាលពីថ្ងៃ​អាទិត្យដើម្បី​ពិភាក្សា​​​អំពី​វិវាទ​​នេះ​។

លោក សីមា បាន​និយាយ​ថា លោក​ត្រូវ​បាន​​​សាក​សួរ​ផ្លូវការ​នៅ​​ស្នង​ការ​ដ្ឋាន​នគរ​បាល​ខេត្ត​កាល​ពីម្សិលមិញ ដោយ​លោក​ រី វីរៈ ស្នង​​​​ការ​រង​នគរ​បាល​ខេត្ត​។ លោក​ សីមា បាន​និយាយ​ថា “គាត់​បាន​សួរ​ខ្ញុំ​ថា តើ​ហេតុ​អ្វី​បាន​​ជា​ខ្ញុំ​ញុះញង់​ក្រុម​អ្នក​ភូមិ​ ហើយ​ខ្ញុំ​បាន​ឆ្លើយ​ថា ‘ខ្ញុំ​មិន​​បាន​ញុះ​ញង់​ក្រុម​​អ្នក​ភូមិ​ទេ។ ខ្ញុំ​គ្រាន់​តែ​រៀប​ចំ​កិច្ច​ប្រជុំ​ជាមួយ​អ្នកភូមិ​ដើម្បី​ពិភា​ក្សារ​ក​ដំណោះ​ស្រាយ​អំពី​វិវាទ​ដីធ្លី​នេះ​​ថា តើ​យើង​ត្រូវរក​វិធី​ណា​”​។

លោក​បាន​បន្ថែម​ថា “វា​មិន​ត្រឹម​ត្រូវ​ទេ​ក្នុង​ការ​ចោទ​រូប​ខ្ញុំ​ថា បាន​ញុះញង់​នោះ ព្រោះ​​ខ្ញុំ​មិន​បាន​ញុះញង់​ក្រុម​​អ្នកភូមិឲ្យ​​ប្រឆាំង​នឹង​ក្រុម​មន្ត្រី​សាធារណៈ​ ឬបង្កើត​ក្រុម​អបគមន៍​ទេ យើង​គ្រាន់តែ​រៀប​ចំ​កិច្ច​ប្រជុំ​ដើម្បី​រក​ដំណោះ​ស្រាយចំពោះ​​វិវាទ​ដីធ្លី​ជាមួយ​ក្រុម​ហ៊ុន​តែប៉ុណ្ណោះ”​។ លោក​ រី វីរៈ ​បដិសេធ​មិន​ធ្វើ​អត្ថា​ធិ​ប្បាយ​​​ទេ ចំណែក​លោក អាត់ ខែម ស្នង​ការ​នគរ​បាល​ខេត្ត​មិនអាច​ទាក់​ទង​បាន​ទេ។

លោក សំ ចាន់គា អ្នកសម្រប​សម្រួល​អង្គ​ការ​សិទ្ធិមនុស្ស​អាដ​ហុក​ប្រចាំ​ខេត្ត​នេះ​​​មាន​ប្រសាសន៍​ថា លោក​និង​អ្នក​ភូមិ​ប្រហែល​​​៦០​នាក់​បាន​ប្រមូល​ផ្ដុំ​គ្នា​នៅ​ខាង​ក្រៅ​ស្នង​ការ​នគ​រ​បាល​ដើម្បី​បង្ហាញ​ការ​គាំទ្រ​ដល់​លោក​សីមា អំឡុង​ការ​សាក​សួរ​ដែលនៅ​ក្នុង​នោះ​​​លោក​​​បាន​និយាយ​ថាគឺ​ជា​ការ​ប៉ុនប៉ង​របស់​នគរ​បាល​ដើម្បី​​បំភិត​បំភ័យ​ក្រុម​អ្នក​ភូមិ។

ប្រជា​ពល​រដ្ឋ​នៅ​​ភូមិឡពាង ឃុំ​តាជេស​​​​​​​មាន​វិវាទ​ដីធ្លី​ចាប់​តាំង​ពី​ឆ្នាំ​២០០៧​មក​ជាមួយ​​ក្រុម​ហ៊ុន​ KDC International  ជាក្រុម​ហ៊ុន​របស់​អ្នកស្រី ជា​ ខេង ដែល​ពួកគា​ត់​បាន​ចោទ​ប្រកាន់​​​​​​​ថា បាន​ចាប់​យក​ដី​របស់​ពួកគាត់​ទំហំ​១៤៥​ហិក​តា។ ទីបំផុត​អ្នក​ភូមិ​៣៥​គ្រួសារ​បានទទួល​យក​​ការ​ផ្ត​ល់​​សំណង​របស់​អ្នកស្រី ជា ខេង នៅ​ឆ្នាំ​នេះ​ ចំណែក​ឯអ្នក​ភូមិ​១៧​គ្រួសារ​ទៀត​បាន​​​​ទាម​ទារ​សំណង​​ច្រើនជាង​នេះ​៕ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស