27 C
Phnom Penh

លោក​នាយក​រដ្ឋមន្ត្រី​ ហ៊ុន សែន​ ថ្កោល​ទោស​ចំពោះ​ការ​រិះគន់​​​ច្បាប់​ស្តី​ពី​​កំណែ​ទម្រង់​ប្រព័ន្ធ​តុលាការ​

ដោយ ឌឹ ខេមបូឌា ដេលី

បទវិភាគ

លោក​នាយក​រដ្ឋមន្ត្រី​ ​ហ៊ុន សែន​​ បាន​​ប្រើ​​ពិធី​ប្រគល់​សញ្ញាប​ត្រ​នៅក្នុង​រាជ​ធានី​ភ្នំពេញ​កាលពី​ម្សិលមិញ​ដើម្បី​ថ្កោល​ទោស​ចំពោះ​​​ការ​​​រិះគន់​ពីសំណាក់​​អង្គការ​សង្គម​ស៊ីវិល​ដែល​​និយាយថា រដ្ឋាភិបាល​របស់​លោក​​ប្រញាប់​ប្រញាល់ក្នុង​ការបង្កើត​ច្បាប់​​ធ្វើ​កំណែ​​ទម្រង់​​ប្រព័ន្ធ​តុលាការ​​​ដោយ​មិន​មាន​ការ​ពិគ្រោះ​ជា​សាធារណៈ​ឲ្យ​បាន​ត្រឹម​ត្រូវ​​។

ថ្លែងនៅ​ពិធី​ប្រគល់​សញ្ញា​បត្រ​ដល់​​និស្សិត​​ប្រហែល​១.៨០០នាក់​មក​ពី​សាកល​វិទ្យា​ល័យ​អាស៊ី អឺរ៉ុប លោក​នាយក​រដ្ឋមន្ត្រី​ បាន​មាន​ប្រសាសន៍ថា លោក​បាន​ដឹង​​អំពី​ការ​រិះ​គន់​​នេះ​អំឡុង​ដំណើរ​ទស្សនកិច្ច​របស់លោក​កាល​ពី​ពេល​ថ្មីៗ​នេះ​ទៅកាន់​ប្រទេស​អាស៊ែ​បៃ​ហ្សង់ និងប្រទេស​បេឡារុស​តាម​រយៈ​ការ​អាន​ព័ត៌​មាន​តាម​ទូរស័ព្ទដៃរបស់លោក។

លោក ហ៊ុន សែន បាន​មាន​ប្រសា​សន៍ថា “ពួកគេ​និយាយថា ច្បាប់នេះ​មិន​ត្រូវ​បាន​បញ្ជូនទៅ​សង្គមស៊ីវិល​ឲ្យ​ធ្វើការ​ពិភាក្សា​ជា​មួយ​​ប្រជាពលរដ្ឋ​ទេ។ ខ្ញុំគ្រាន់​តែ​ផ្ញើ​សារ​ត្រឡប់ទៅវិញថា ទី១ យើង​បាន​​ស្តាប់​រឿង​នេះ​​ច្រើន​ដង​ហើយ”។​ លោក​បាន​បន្តថា “ទី២ ច្បាប់​រដ្ឋ​ធម្មនុញ្ញ​មិន​អនុញ្ញាត​ឲ្យ​យើង​ប្រគល់ [សេចក្តីព្រាង​ច្បាប់] ទៅ​នរណា​ក្រៅពី​ទីស្តីការ​គណៈរដ្ឋ​មន្ត្រី​​​​ឡើយ​ ហើយ​ចែង​ថា ទីស្តីការ​គណៈ​រដ្ឋ​ម​ន្ត្រី​ត្រូវ​​​បញ្ជូន​សេចក្តី​​ព្រាង​ច្បាប់​នេះ​ទៅ​រដ្ឋ​សភា។ ច្បាប់​មិន​បាន​ចែង​ឲ្យ​បញ្ជូន​សេចក្តី​ព្រាង​​ច្បាប់​ទៅ​អង្គការ​មិនមែន​រដ្ឋាភិបាល​ទេ”។

អង្គកា​រមិន​មែន​រដ្ឋាភិបាល​រួមមាន​មជ្ឈ​មណ្ឌលសិទ្ធិមនុស្ស​កម្ពុជាជាដើម​​បាន​រិះគន់ពី​កង្វះ​ការពិគ្រោះ​យោបល់​សាធារណៈអំពី​ច្បាប់ចំនួន​បី​ស្តីពី​កំណែ​ទម្រង់ប្រព័ន្ធ​​តុលា​ការ​​របស់​រដ្ឋាភិបាល​ចាប់​តាំង​ពី​ច្បាប់​នេះ​ត្រូវ​បាន​​អនុម័ត​​កាល​ពី​ថ្ងៃទី​១៨ ខែមេសា ដោយ​​ទីស្តី​ការ​គណៈ​រដ្ឋ​មន្ត្រីដើម្បី​បញ្ជូនទៅ​រដ្ឋ​សភា។

លោក​ ហ៊ុន សែន បានមាន​ប្រសា​សន៍​កាល​​​ពីម្សិលមិញថា​ ការ​រិះគន់​ពី​ដំណើរ​ការ​ពន្លឿន​ច្បាប់​របស់​រដ្ឋាភិបាល​គឺ​មិន​ត្រឹម​ត្រូវ​ទេ ដែលកើត​ចេញពីអង្គការ​នានា​​ដែលបាន​អំពាវ​នាវ​ជា​យូរមក​ហើយ ឲ្យ​មាន​ការ​កែ​ទម្រង់​​ប្រព័ន្ធតុលាការ​។

លោក​នាយក​រដ្ឋ​មន្ត្រី​បាន​មាន​ប្រសា​សន៍​ថា “នៅពេល​ [រដ្ឋាភិបាល​] មិន​អនុម័ត​ច្បាប់ គេ​ថា​យឺតម៉្លេះ ហើយ​នៅពេល​ [រដ្ឋាភិបាល] អនុម័ត​ច្បាប់ គេ​ថា លឿន​ម៉្លេះ។ អូ ព្រះ​ម្ចាស់​ថ្លៃអើយ”។ លោក​បាន​បន្ថែមថា សមាជិក​សភា​នឹង​ធ្វើ​ការ​ពិភាក្សា​ត្រឹម​ត្រូវ​​​អំពី​ច្បាប់​​នេះ។

លោក​បានមាន​ប្រសាសន៍ថា “ប្រសិន​បើ​ពួកគេ​ចង់​អនុម័ត​ច្បាប់…​សូមចូលរួម​ការ​បោះ​ឆ្នោត​ដើម្បី​បាន​ក្លាយ​ជា​សមាជិក​សភា​ទៅ…​ច្បាប់គឺ​ត្រូវ​​ពិភាក្សា​នៅ​ក្នុង​រដ្ឋ​សភា”​។

បច្ចុប្បន្ននេះ រដ្ឋសភា​មាន​សមាជិក​សភា​តែ​៦៨រូប​ប៉ុណ្ណោះ​មក​ពីគណបក្ស​ប្រជា​ជន​កម្ពុជា​កាន់​អំណាច​។ សមាជិក​សភា​៥៥រូប​របស់​គណបក្ស​សង្គ្រោះ​ជាតិ​បាន​ធ្វើ​ពហិ​ការ​ស្ថាប័ននីតិបញ្ញត្តិ​នេះ ដោយ​អះ​អាង​ថា កា​រ​បោះ​​ឆ្នោត​ជាតិ​ថ្មី​​​គឺ​​ជា​ការ​ចាំបាច់​ណាស់​បន្ទាប់ពីការ​បោះ​ឆ្នោត​កាលពី​ឆ្នាំមុ​ន​ដែល​មាន​ភាព​មិន​ប្រក្រតី​ និង​ការ​លួច​បន្លំ។

លោក​ ហ៊ុន សែន​ បានមាន​ប្រសា​សន៍​នៅ​ឯពិធី​ប្រគល់​សញ្ញាបត្រ​នោះថា ​លោក​ធុញ​ទ្រាន់​នឹង​ការ​និយាយអំពី​ភាពទាល់​ច្រក​ក្រោយ​ការ​បោះ​ឆ្នោត​ជាមួយ​គណ​បក្ស​សង្គ្រោះ​ជាតិ ហើយ​លោក​មិន​ចាប់​អារម្មណ៍​នឹ​ងការ​បញ្ឆេះ​​ឲ្យ​មានការ​សរសេរ​ព័ត៌មាន​កាន់​តែ​ច្រើន​ឡើយ​។ លោកមាន​ប្រសាសន៍ ថា “ប្រសិន​បើ​​ខ្ញុំបន្ត​និយាយ គេ​នឹង​បន្ត​​សរសេរ​ព័ត៌មាន។ ករណី​នយោបាយ​គឺ​ជា​រឿង​មួយ ប៉ុន្តែ​រឿង​សំខាន់​គឺ​ជា​រឿង​ការ​ទូត ពាណិជ្ជកម្ម​ សេដ្ឋ​កិច្ច​និង​ទេស​ចរណ៍”។

ត្រង់​ចំណុច​នេះ​ លោក​ ហ៊ុន សែន បាន​​ប្រាប់​​អ្នកស្តាប់​កុំឲ្យ​គិត​​ថា លោក​បាន​ទៅ​ទស្សនកិច្ច​នៅ​ឯប្រទេស​បេឡា​រុស ដើម្បី​ហេតុផល​យោធាឲ្យ​សោះ ​ហើយ​លោក ​បាន​​​​​បញ្ជាក់​ថា ប្រទេស​កម្ពុជា​បាន​នាំ​ចូល​រថយន្ត​និង​ត្រាក់​ទ័រ​​ជា​ច្រើន​ពី​ប្រទេស​នេះ​​ដោយ​​​សារ​​ប្រទេស​នេះ​ជា​សម្ពន្ធ​មិត្តជាមួយ​សាធារណរដ្ឋ​សង្គម​និយម​សូវៀត​អំឡុង​ទសវត្សរ៍​ឆ្នាំ​១៩៨០។

ដោយ​សំដៅ​ដល់​គ្រាប់​កាំភ្លើង​ផ្លោង​បំពាក់​លើរថយន្ត​សម័យ​សូវៀត​ទំហំ​១២២​មីល្លី​ម៉ែត្រ លោក​បានមាន​ប្រសា​សន៍​ថា “​ខ្ញុំបាន​ទៅ​ទស្សនកិច្ច​ក្រុមហ៊ុន​ផលិត​​រថយន្ត ហើយ​កុំ​ច្រឡំថា ខ្ញុំ​ទៅ​ទិញ​ BM-21​ឲ្យ​សោះ”។​ លោកថ្លែង​​​ថា “ពួកគេ​ដាក់​​រថយន្ត​តម្រៀប ​គ្នាជាច្រើន​រួមមាន​រថយន្ត​បំពាក់​កាំភ្លើង​វែង​ ហើយ​ស្ថានីយ​ទូរទស្សន៍​ខ្មែរ​ បាន​ចាក់​ផ្សាយ​អំពី​រូបភាព​នោះទៀត​​ផង​​។ ប៉ុន្តែកុំច្រឡំថា ខ្ញុំ​ទៅ​​​ទិញ BM-21 ឲ្យ​សោះ”៕​សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស