33 C
Phnom Penh

អ្នកភូមិ​ជាច្រើន​គ្រួសារ​ដែលមាន​វិវាទដីធ្លី​ជាមួយ​ភរិយាលោក ស៊ុយ សែម ទាម​ទារ​សំណង

ដោយ ឌឹ ខេមបូឌា ដេលី

បទវិភាគ

តំណាង​អ្នក​ភូមិ​ម្នាក់​បាន​និយាយ​កាល​ពី​ម្សិល​មិញថា គ្រួសារ​អ្នកភូមិ​ភាគច្រើន​ក្នុង​ខេត្ត​កំពង់​ឆ្នាំង​ដែលបាន​ទទួលយក​សំណង​​ជា​ប្រាក់​ដើម្បី​ដោះ​ស្រាយ​វិវាទ​ដីធ្លី​​របស់  ខ្លួន​ជាមួយ​ភរិយា​លោក ស៊ុយ សែម​​​ រដ្ឋ​មន្ត្រី​ក្រសួង​រ៉ែ​​និង​ថាមពលនោះ​​​បាន​ប្តូរ​ចិត្ត ហើយ​នឹង​ដាក់​ពាក្យ​បណ្តឹង​​ស្វែង​​រក​សំណង​បន្ថែម​ទៀត​។

កាលពី​ដើម​ខែ​នេះ អ្នក​ភូមិ​៣៥​គ្រួសារ​បាន​ទទួលយក​សំណង​ពី​អ្នកស្រី ជា​ ខេង​ ជា​ពាណិជ្ជករ​ម្នាក់​​បន្ទាប់ពី​គណៈ​កម្មការ​ខេត្ត​ដែលមាន​សមាជិក​១៥​រូប​ទើប​បង្កើត​ថ្មី​​នោះ​បាន​ជួយ​ពួកគេ​ឲ្យ​ចរចា​ស្វែង​រក​ដំណោះ​ស្រាយ។ ទោះ​យ៉ាង​ណា ឥឡូវនេះ ភាគ​​​ច្រើន ​នៃ​អ្នក​ភូមិ​ទាំង​៣៥​គ្រួសារនោះ​​​មិន​សប្បាយ ចិត្ត​នឹង​ដំណោះ​ស្រាយដែល​ពួកគាត់ទទួល បាន​នោះ​ទេ។

អ្នកស្រី សួន​​​ ញ៉េន អាយុ​៣៨ឆ្នាំ​បាន​និយាយថា​ “ថ្ងៃនេះ​យើង​បាន​រៀប​ចំ​ពាក្យ​បណ្តឹង​​ប្តឹង​ទៅ​គណៈកម្មការ​នេះ​ដើម្បី​ទាម​ទារ​សំណង​បន្ថែមទៀត​ពី​ក្រុម​ហ៊ុន”។ គាត់មិន​អាច​បញ្ជាក់​អំពី​ចំនួន​ពិត​​ប្រាកដ​នៃគ្រួសារ​ដែល​ទាម​ទារ​សំណង​បន្ថែម​ឡើយ ប៉ុន្តែ​បាន​និយាយថា មាន​គ្រួសារ​ភាគ​ច្រើន​នៃ​អ្នកភូមិ​ទាំង​៣៥គ្រួសារ​។ បន្ថែម​​ពីលើអ្នក​ភូមិ​​៣៥គ្រួសារ​នោះ អ្នក​ភូមិ​១៧​​​គ្រួសារ​ទៀត​ដែល​ជាប់​ពាក់ព័ន្ធ​នឹង​​វិវាទ​ដីធ្លី​នេះ​ដែរ​​កំពុង​​ទាម​ទារ​សំណង​បន្ថែម​​ទៀត។

អ្នកស្រី ញ៉េន បាន​និយាយថា គ្រួសារ​ទាំង​នោះ​បាន​ប្រៀប​ធៀប​សេចក្តី​ជូន​ដំណឹង​នោះ ហើយ​បាន​ដឹង​ថា ពួកគាត់​មិន​ត្រូវ​​បាន​​ផ្តល់​សំណង​ស្មើគ្នាឡើយ។គាត់​បាន​​និយាយ​​​ថា គាត់​បាន​ទទួល​ប្រាក់​១.៥០០​ដុល្លារ​សម្រាប់​ដី​របស់គាត​់​ទំហំ​៣,៥​ហិកតា​ ចំណែក ​​អ្នកភូមិ​ពីរ​គ្រួសារ​​ទៀត​​ទទួលបាន​ប្រាក់​​៣.០០០ ដុល្លារ​ក្នុង​ដី​ទំហំ​១ហិកតា។

លោក ហ៊ុល ចន្ធូ អភិបាល​ស្រុក​កំពង់​​ត្រឡាច ជាសមាជិក​ម្នាក់​នៃ​គណៈកម្មការ​ដោះស្រាយ​វិវាទដីធ្លី​នេះ​បាន​មាន​ប្រសា​សន៍ ថា គ្រួសារ​ទាំងនេះ​មិន​សប្បាយចិត្ត​នឹង​សំណង ​របស់ខ្លួន​ឡើយ រហូត​ដល់​ពួក​គាត់​ត្រូវបាន​ញុះញង់​ដោយ​លោក រាជ សីមា តំណាង​សហ​​​ គមន៍។លោក​ក៏បាន​ចោទ​ប្រកាន់​លោក សីមា ថា​ បានញុះញង់​អ្នក​ភូមិ​១៧គ្រួសារ​កុំ​ឲ្យ​​​ទទួល​យក​សំណង​ផងដែរ។

ដោយ​ហៅ​លោក សីមា ថា ជា​ពិរុទ្ធ​ជន លោក​ ចន្ធូ បានមាន​ប្រសាសន៍ថា “ដំណើរ​ការ​ស្វែង​រក​ដំណោះ​ស្រាយ​គឺ​នៅ​ទ្រឹង​ ពី​​​ព្រោះ​អ្នកភូមិ​​១៧គ្រួសារ​បដិសេធ​មិន​ទទួលយក​សំណង​ម្តង​ហើយ​ម្តងទៀត​ ហើយ​ទន្ទឹម​នឹង​នោះ​ដែរ គ្រួសារ​មួយ​ចំនួន​ដែលបាន​ទទួល​យក​សំណង​ពី​ក្រុមហ៊ុន​រួច​ហើយ​កំពុង​ត្រូវបាន​គេ​​ញុះញង់​​ឲ្យ​ទាម​ទារ​សំណង​បន្ថែម​ទៀត​ពី​ក្រុមហ៊ុន”។ លោក សីមា ត្រូវបាន​សាលាដំបូង​ខេត្ត​កោះកុង​​​​ហៅ​មក​សាកសួរ​រួចហើយ​កាលពី​ថ្ងៃ​ព្រហស្បតិ៍​ជុំវិញ​ការ​ចោទ​ប្រកាន់​ពីបទ​ញុះញង់​អ្នកភូមិ​​ទាំង​១៧គ្រួសារ​។

លោក ចន្ធូ បាន​មាន​ប្រសាសន៍ថា លោក​មិន​ច្បាស់​ថា តើ​អាជ្ញាធរ​ខេត្ត​​នឹង​ព្យាយាម​ដាក់​ពាក្យ​បណ្តឹង​ប្តឹង​តំណាង​សហ​គមន៍ដែល​និយាយ​ឥតសំចៃ​រូបនេះ​ឬ​យ៉ាង​ណាឡើយ។ លោក​ សីមា បាន​បដិសេធ​ថា លោក​មិន​បាន​ញុះញង់​​គ្រួសារ​ទាំង​នេះ ឬ​អ្នក​ភូមិ​៣៥​​​គ្រួសារ​ទៀត​ឡើយ។ លោក​ សីមា បានមាន​ប្រសាសន៍ថា “គ្មាន ​នរណា ​ម្នាក់​ត្រូវបាន​ញុះញង់​ទេ”៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស