បណ្ដាញក្រុមហ៊ែកឃើអនាមិកនៅកម្ពុជា (Anonymous Cambodia) ដែលជាសមាជិកនៃក្រុមហ៊ែកឃើអនាមិកពិភពលោកបានអះអាងកាលពីល្ងាចថ្ងៃអាទិត្យថា ខ្លួនបានបិទគេហទំព័រសារព័ត៌មានដើមអម្ពិល ព្រមទាំងបានបំផ្លាញបណ្ណាសាររបស់គេហទំព័រនេះផងដែរ ហើយក្រុមខ្លួនក៏បានព្រមានដល់បណ្តាគេហទំព័រដទៃទៀតដែលជាគោលដៅរបស់ពួកគេនឹងត្រូវរងការវាយប្រហារជាបន្ត ប្រសិនបើគេហទំព័រទាំងនោះនៅតែបន្តផ្សាយ “ព័ត៌មានមិនពិត”។
ការវាយប្រហារទៅលើគេហទំព័រដើមអម្ពិលដែលកំពុងតែពេញនិយមនេះ ដែលមាននិន្នាការគាំទ្ររដ្ឋាភិបាលយ៉ាងសកម្ម មិនឲ្យដំណើរការអស់រយៈពេល១២ម៉ោង ហើយបែរជាចេញសារមួយដែលមានខ្លឹមសារថា “សូមអភ័យទោសយើងកំពុងតែស្ថាបនា ហើយយើងនឹងត្រឡប់មកវិញនៅពេលឆាប់ៗនេះ”។
ក្រុមរអនាមិកកម្ពុជា (Anonymous Cambodia ) បាននិយាយនៅក្នុងទំព័របណ្ដាញទំនាក់ទំនងសង្គមហ្វេសប៊ុករបស់ខ្លួនថា “យើងនឹងមិនបញ្ចប់ឡើយ ហើយយើងនឹងបន្តស្វែងរកយុត្តិធម៌សម្រាប់ប្រជាជនកម្ពុជា”។ ក្រុមនេះសរសេរបន្តទៀតថា “ទំហំនៃការវាយប្រហាររបស់យើងនឹងកើនឡើងជាលំដាប់ អ្នកនិយាយកាន់តែច្រើនពួកយើងធ្វើកាន់តែច្រើន”។
ក្រុមនេះបានសរសេរបន្តទៀតថា “កាលពីពេលថ្មីៗនេះគេហទំព័រដើមអម្ពិលមិនបានរក្សាទុកទិន្នន័យសំខាន់ៗរបស់ខ្លួនឲ្យមានសុវត្ថិភាពទេ ហើយក៏បានបាត់បង់ទិន្នន័យសំខាន់ៗជាច្រើន។ សូមប្រព័ន្ធផ្សព្វផ្សាយដទៃទៀតកុំផ្សាយព័ត៌មាន មិនពិតដូចគេហទំព័រមួយនេះ។ បើមិនដូច្នោះទេ អ្នកនឹងទទួលបានលទ្ធផលដូចគ្នាក្នុងថ្ងៃណាមួយ”។
លោក សយ សុភាព និពន្ធនាយកគេហទំព័រសារព័ត៌មានដើមអម្ពិលបានលើកឡើងថា ការបិទគេហទំព័រដោយ បង្ខំបែបនេះពិតជាបង្កគ្រោះថ្នាក់ខ្លាំងណាស់។ លោកបានមានប្រសាសន៍ថា “ការខូចខាតមានទំហំធំណាស់។ វាស្ទើរតែបិទគេហទំព័រយើងទាំងមូលទៅហើយ”។ លោកបានបន្ថែមថា វិធានការការពារសន្តិសុខ បន្ថែមកំពុងត្រូវបានពិចារណា។
លោក សុភាព បានមានប្រសាសន៍បន្ថែមទៀតថា “ខ្ញុំនឹងព្យាយាមឲ្យអស់ពីសមត្ថភាពរបស់ខ្ញុំ ដើម្បីការពារវា ព្រោះក្រុមអនាមិកនេះបានព្រមានថា ពួកគេនឹងត្រឡប់មករកយើងទៀត ហើយវាធ្វើឲ្យខ្ញុំបារម្ភណាស់ ពីព្រោះខ្ញុំមានបុគ្គលិក២០០នាក់ ធ្វើការជាមួយខ្ញុំលើគេហទំព័រនេះ។ វាមិនមែនខាតបង់ចំពោះតែខ្ញុំប៉ុណ្ណោះទេ ប៉ុន្តែថែមទាំងបុគ្គលិករបស់ខ្ញុំផងដែរ គឺពួកគេ ប្រឈមនឹងហានិភ័យ ប្រសិនបើយើងបាត់បង់គេហទំព័រសារព័ត៌មាននេះ” ។
ក្រុមអនាមិកកាលពីសប្ដាហ៍មុនបានគំរាមសងសឹកចំពោះ ប្រតិបត្តិការចាប់ខ្លួនសមាជិករបស់ខ្លួនចំនួនពីរនាក់គឺឈ្មោះ ប៊ុន ឃីងមង្គលបញ្ញា អាយុ២១ឆ្នាំ និងមានឈ្មោះក្នុងអុីនធើណិតថា Sex Machine ឬ Black Cyber និងម្នាក់ទៀតឈ្មោះ ជូ សុងហេង អាយុ២១ឆ្នាំ ដែលមានឈ្មោះក្នុង អុីនធើណិតថា Zoro។
ជនទាំងពីរនេះត្រូវបានចោទប្រកាន់ពីបទចូល ដោយគ្មានការអនុញ្ញាតទៅក្នុងប្រព័ន្ធដំណើរការទិន្នន័យស្វ័យប្រវត្តិ និងបង្អាក់ដំណើរការក្នុងប្រព័ន្ធដំណើរការទិន្នន័យស្វ័យប្រវត្តិ។
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មាន បានលើកឡើងថា ការវាយប្រហារទៅលើគេហទំព័រ សារព័ត៌មានដើមអម្ពិលនេះ ទំនងធ្វើឲ្យខូចស្មារតីប្ដូរផ្ដាច់ចំពោះតម្លាភាពរបស់ក្រុមហ៊ែកឃើនេះ។
លោក បានមានប្រសាសន៍ថា “ខ្ញុំគិតថា វាជារឿងមួយគួរឲ្យសោកស្ដាយដែលគេហទំព័រនេះត្រូវបានវាយប្រហារ ទោះបីជាគេហទំព័រនេះគាំទ្រ ឬ ប្រឆាំងរដ្ឋាភិបាលក៏ដោយ ក៏វាជាការខុសឆ្គងក្នុងការពិនិត្យចាប់កំហុសអ្នកដែលមានចំណាប់អារម្មណ៍ដូចគ្នាក្នុងលទ្ធិប្រជាធិបតេយ្យផងដែរ”៕ សុធា
(រាយការណ៍បន្ថែមដោយ Lauren Crothers)