33 C
Phnom Penh

ដោយសារ​​កូដកម្ម​​​កាន់​តែ​រាល​​ដាល​ រដ្ឋាភិបាល​បញ្ជា​ឲ្យ​​បិទ​រោង​ចក្រ​​​មួយ​រយៈ​​

ដោយ ឌឹ ខេមបូឌា ដេលី

បទវិភាគ

ក្រុង​បាវិត​ ,ខេត្ត​ស្វាយ​រៀង ​- រដ្ឋាភិបាល​​បាន​​បញ្ជា​ឲ្យ​រោង​ចក្រ​ទាំង​អស់​នៅ​ក្រុង​បា​វិត​​បិទ​ទ្វារ​រហូតដល់​ថ្ងៃ​ព្រហស្បតិ៍ ដើម្បី​ទប់​ស្កាត់​មិន​​ឲ្យកូដ​កម្ម​រីករាល​ដាល​កាន់តែ​ធំ​ទៅៗនៅ​ទូ​ទាំង​ប្រទេស​​​​ខ្លាច​​គ្រប់​គ្រង​លែង​បាន​​​។

លោក អឹុម​ វិសុទ្ធ​ ប្រធាន​រដ្ឋ​បាល​ខេត្ត​បាន​មាន​ប្រសាសន៍​ថា “លោក ជៀង អំ អភិ​បាល​ខេត្ត​បាន​លើក​ឡើង​នៅក្នុង​កិច្ច​ប្រជុំ​កាល​ពីម្សិលមិញ​ថា យើង​គួរ​ប្រាប់​​រោង​ចក្រ​ឲ្យ​​បិទ​ទ្វារ​ពីរ​បីថ្ងៃ​សិន​ ពីព្រោះ​កូដកម្ម​កំពុង​រីករាល​ដាល​ធំទៅ​ៗ​ ប៉ុន្តែលោក​មិន​និយាយ​ថា ត្រូវ​បិទ​ប៉ុន្មាន​ថ្ងៃ​នោះទេ​”។ លោក​បានមាន​ប្រសាសន៍​ថា “រដ្ឋាភិ​បាល​​ព្រួយ​បារម្ភ​ខ្លាច​កូដកម្ម​នេះ​រីករាល​ដាល​ប្រសិន​បើ​យើង​មិន​ចាត់​វិធាន​ការ​ភ្លាម​ៗ​ទេ​”។

កូដកម្ម​នេះ​បាន​ចាប់​ផ្តើម​ជា​ទ្រង់​ទ្រាយ​​តូច​ ក្រោយ​ថ្ងៃ​ចូល​ឆ្នាំ​ខ្មែរ​កាល​ពី​ដើម​ខែ​នេះ​ នៅពេល​ដែល​កម្មករ​មួយ​ចំនួន​បាន​ឮ​ថា កម្មករ​នៅ​រោង​ចក្រ​មួយ​ទៀត​បាន​ទទួល ប្រាក់​ឧបត្ថម្ភ​ម្តង​ចំនួន​៥០​ដុល្លារ​ចំពោះការ​មិន​ចូល​រួម​ធ្វើ​កូដកម្ម​រយៈពេល​ពីរ​បីខែ​មក​​នេះ ហើយ​បាន​សម្រេច​ទាម​ទារ​ប្រាក់​ឧប​ត្ថម្ភ​​ដូចគ្នា​នេះ​សម្រាប់​ពួក​គេ។ កូដកររោង​​​ចក្រ​​​បាន​​ប្រមូល​កម្មករ​​កាន់​តែ​ច្រើន​​​ឲ្យ​ចូល​រួមជាមួយ​​ពួកគេ​ និង​បានធ្វើ​ឲ្យរាំង​ស្ទះ​ដល់​ការ​ងារ​នៅ​រោង​ចក្រ​ជាង​៣០​ក្នុង​ក្រុង​បាវិត​ដែល​មាន​​កម្ម​ករ​ធ្វើ​ការ​ប្រហែល​៣០.០០០ នាក់​​កាល​ពីថ្ងៃ​ច័ន្ទ។

លោក​ ជៀង​ អំ អភិបាល​ខេត្ត​មិន​អាច​ទាក់​​ទង​បាន​ទេ។ ប៉ុន្តែ លោក​ រស់​ ឆាយ ​អភិ​បាល​​រង​ខេត្ត​​ដែល​លោក​បាន​ចាត់​តាំង​ឲ្យ​​ដោះ​ស្រាយ​កូដកម្ម​ទាំង​នេះ​បាន​មាន​​ប្រសាសន៍​ថា ការ​បញ្ជា​ឲ្យ​បិទ​រោង​ចក្រ​នេះ​ចេញ​មក​ពី​ថ្នាក់​ជាតិ​ ហើយ​លោក​មិន​បាន​ប្រាប់​លម្អិត​ថែម​ទៀត​ទេ​។ ក្រសួង​មហា​ផ្ទៃ​បាន​បដិសេធ​​ថា មិន​បាន​​ជាប់​ពាក់​ព័ន្ធ​ទេ​។

លោក កែវ​ ហន អធិការ​រង​នគរបាល​ក្រុង​បាវិត​​បានមាន​ប្រសាសន៍​ថា មេ​ឃុំ​ និង​មេ​ភូមិ​ក៏​ត្រូវ​បាន​ប្រាប់​ឲ្យ​រារាំង​រថយន្ត​មិន​ឲ្យ​ដឹក​កម្មករ​ទៅ​រោង​ចក្រ​​នៅ​ពេល​ព្រឹក​ដែរ​​​ ហើយ​បាន​ឲ្យធ្វើ​ដូច្នេះ​យ៉ាង​ហោចណាស់​​រហូត​ដល់​ថ្ងៃ​ព្រហស្បតិ៍​។

នៅឯ​តំបន់​សេដ្ឋ​កិច្ច​ពិសេស ម៉ាន់​​ហាតាន់​ ដែលមាន​រោង​ចក្រ​កាត់​ដេរ​សម្លៀក​បំពាក់​​ចំនួន​២២​ និង​មាន​កូដ​កម្ម​ដ៏ធំ​​នៅពេល​ថ្មី​នេះ​​មាន​​បន្លា​លួស​​ដាក់​​បិទ​​​ផ្លូវ​ចូល​ខាង​មុខ​។ មន្ត្រី​កង​រាជ​អាវុធ​ហត្ថ​ប្រដាប់​អាវុធ​ដែល​ទើប​ដាក់​ឲ្យឈរ​ជើង​នៅ​ច្រក​ចូល​នោះ​បាន​ឈរ​យាម​​នៅ​ក្រោម​ម្លប់​ដើម​ឈើ​មួយ​ដើម​។

នៅខាង​ក្នុង​ការិយា​ល័យ​រដ្ឋបាល​នៃ​តំបន់​សេដ្ឋកិច្ច​ពិសេ​ស​នេះ​ វិនិយោគិន​ដែល​មាន​ការ​មិន​សប្បាយ​​ចិត្ត​បាន​ជួប​ជុំ​គ្នា​​នៅ​ជុំវិញ​តុ​​ប្រជុំ​ដ៏​វែង​មួយ​​ដើម្បី​ពិភាក្សា​គ្នា​អំពី​វិធាន​ការ​បន្ទាប់​​របស់​ពួក​គេ​។លោក​ ឡារី កៅ នាយក​គ្រប់​គ្រង​​តំបន់​​សេដ្ឋកិច្ច​ពិសេស​នេះ​បាន​អង្គុយ​នៅ​ខាង​ក្បាល​តុ​នោះ​។ លោក​បានមាន​ប្រសាសន៍​ថា រោង​ចក្រ​នៅទី​នេះ​ត្រូវ​បិទ​ទ្វារ​រហូត​ដល់​ថ្ងៃ​សុក្រ​។

លោក​បាន​បង្ហាញ​អ្នក​យក​ព័ត៌​មាន​​នូវ​​វីដេអូ​ខ្លី​មួយ​​​​ដែ​ល​លោក​បានមាន​ប្រសាសន៍​ថា កាមេរ៉ា​សុវត្ថិភាព​របស់​តំបន់​សេដ្ឋកិច្ច​ពិសេស​នេះចាប់​បាន​​កាល​ពីថ្ងៃ​ព្រហស្បតិ៍។  នៅក្នុង​វីដេអូ​ខ្លី​នោះ ​គេ​មើល​ឃើញ​តាម​ផ្សែង​ពណ៌​ស យុវជន​ជាង​១០​នាក់​​គប់​ដំុថ្ម​​ដាក់​កាមេរ៉ា​សុវត្ថិ​ភាព​មុន​ពេល​​កាមេរ៉ា​នោះ​ត្រូវ​បាន​កម្ទេច​។​លោក​បាន​បង្ហាញ​ពី​រូប​ថត​បង្អួច​រោង​ចក្រ​បាក់​បែក​។ លោក​បានមាន​ប្រសាសន៍​ថា “ពួកគេ​​មាន​​សិទ្ធិ​ធ្វើ​កូដកម្ម​ ប៉ុន្តែ ពួកគេ​ត្រូវ​ធ្វើ​ដោយ​ស្រប​ច្បាប់ និង​ដោយ​​អហិង្សា​។ តើ​មនុស្ស​ទាំង​នេះ​មិន​ប្រើ​ហិង្សា​ឬ? មិន​មែន​ទេ​”។

លោក ឡារី កៅ បានមាន​ប្រសាសន៍​ថា ​រោងចក្រ​បាន​បន្ទោស​​បញ្ហា​នេះ​ទៅ​លើ​លោក​ ប៉ាវ សីុណា ប្រធាន​​សហ​ជីព​ និង​សហ​ការី​របស់​គាត់​មួយ​ក្រុម​ចំពោះការ​ញុះ​ញង់​ឲ្យកម្មករ​ធ្វើ​កូដក​ម្ម​។ លោក​បានមាន​ប្រសាសន៍​ថា “លុប​បំបាត់​​ប្ញសគល់​នៃ​អំពើ​អាក្រក់​នេះគឺ​​ប្ញ​ស​​គល់​នៃបញ្ហា​នេះ​។​ មាន​មនុស្ស​មួយក្រុម​តូច​ប៉ុណ្ណោះដែល​បង្ក​បញ្ហា​នេះ​”។  ទោះ​ជា​យ៉ាង​ណា​ លោក​បាន​អះអាង​ថា លោក​មិន​ស្នើ​ឲ្យ​មានការ​ចាប់​ខ្លួន​ ឬ​ផ្តន្ទា​ទោស​តំណាង​សហជីព​ទាំង​នេះ​ទេ​។ លោក​បានមាន​ប្រសាសន៍​ថា “យើង​ត្រូវ​​បញ្ចុះ​បញ្ជូល​មនុស្ស​មួយក្រុម​តូច​កុំ​ឲ្យធ្វើ​អំពើ​ខុស​ច្បាប់​។​ ធ្វើ​បែប​នេះ​ប្រសើ​រ​ជាង​”។

ប៉ុន្តែ លោក​ ឡារី កៅ បាន​បន្ទោស​នគរបាល​ និង​រដ្ឋាភិបាល​ ក៏​ដូ​ចជា​មេដឹក​នាំ​សហ​ជីព​ចំពោះ​ការ​ធ្វើ​ឲ្យ​វិនិយោគ​ិន​​មិន​មាន​ជំនឿ​។ លោក​បានមាន​ប្រសាសន៍​ថា “ការ​ងារ​របស់​ពួកគេ​គឺ​ត្រូវ​រក្សា​សណ្តាប់​ធ្នាប់​ ប៉ុន្តែ នៅ​ពេលមាន​ភាព​ច្រ​បូក​ច្រ​បល់​ពួកគេ​មិន​បាន​ធ្វើ​អ្វី​ឡើយ​។ ពួកគេ​ត្រូវ​បាន​បង្គាប់​មិន​ឲ្យមាន​​ប្រតិកម្ម​តប​ត​ គឺ​យើង​បាន​​ឮ​ដូច្នេះ​”។

លោក​បាន​បញ្ជាក់​ឡើង​វិញ​ពី​គោល​ជំហរ​របស់​រោង​ចក្រ​ថា ការ​ផ្តល់​ប្រាក់ឧបត្ថម្ភ​ចំនួន​៥០​ដុល្លារ​ទៅ​ឲ្យកម្មករ​​ដែល​ពួកគេ​​មិន​ដែល​បាន​សន្យា​នោះ​មាន​ន័យ​ស្មើ​នឹង​ការ​ជំរិត​ទារ​ប្រាក់​។ការ​ចុះ​ញ៉ម​នា​ពេល​នេះ​​ដូចជា​ជំរុញ​ឲ្យ​ពួកគេ​ទាមទារ​ខុស​ច្បាប់​​កាន់​តែ​ច្រើន​​​។

លោក​មិន​​ដឹង​ថា តើ​ការ​បញ្ជា​ឲ្យ​បិទ​រោង​ចក្រ​នេះយូរ​ប៉ុណ្ណាទេ​  ប៉ុន្តែ លោក​បាន​មាន​ប្រសាសន៍​ថា កូដកម្ម​អាច​រាលដាល​កាន់​តែ​ធំ​ប្រសិន​បើ​មិន​បិទ​រោង​ចក្រ​។  លោក​បាន​និយាយថា “​មិន​យូរ​មិន​ឆាប់​ ប្រសិន​បើ​ពួក​គេ​ទាម​ទារ​មិន​បាន​សម្រេច​ទេ​ វានឹង​រាលដាល​​ដល់ទី​ក្រុង​ភ្នំពេញ​ និងទូទាំង​ប្រទេស​ ហើយ​ប្រសិន​បើ​ការ​ធ្វើ​កូដ​កម្ម​ នេះ​មាន​រយៈ​ពេល​កាន់​តែ​យូរ​ វិនិយោគ​ិន​ប្រាកដជា​​នឹង​ដក​​ខ្លួន​ចេញ​​”។

កាល​ពីខែ​ធ្នូ​ មហា​កូដកម្ម​នៅ​តំបន់​សេដ្ឋ​កិច្ច​ ម៉ាន់​ហាតាន់ និងតាយសេង​ក្នុងក្រុ​ង​បាវិត​​បាន​នាំ​ឲ្យមាន​កូដកម្ម​ក្នុង​វិស័យ​កាត់​ដេរ​ទូ​ទាំង​ប្រទេស​ដែល​បានចាប់​ផ្តើម​បីថ្ងៃ​ក្រោយ​​មក​ ធ្វើ​ឲ្យរាំង​ស្ទះ​ដល់​ផលិត​កម្ម​ និង​ធ្វើ​ឲ្យ​ឧស្សាហកម្មកាត់ដេរ​ខាត​បង់​ទឹក​ប្រាក់​អស់​២០០លាន​ដុល្លារ​។ កូដកម្ម​ទាំង​នោះ​បាន​បញ្ចប់​​បន្ទាប់​ពី​មានការ​ប៉ះទង្គិច​គ្នា​ដោយ​ហិង្សា រវាង​កម្មករ​ និង​អាជ្ញាធរ​កាល​ពី​ថ្ងៃ​ទី​៣ ខែ​មករា​ ដែល​នៅ​ពេល​នោះ​កង​រាជ​អាវុធ​ហត្ថ​បាន​បាញ់សម្លាប់អ្នក​តវ៉ា​ប្រាំនាក់​។

លោក ប៉ាវ សីុណា បាន​បដិសេធ​ថា មិន​បាន​ដឹក​នាំ​កូដកម្ម​នៅក្រុង​​​​បាវិត​នៅ​សប្តាហ៍​នេះ​ទេ​ ហើយ​លោក​ ឆេង ឈន់​ អនុ​ប្រធាន​សម្ព័ន្ធ​សហជីព​ចលនា​កម្ពុជា​បាន​បដិសេធ​​បែប​នេះ​ម្តង​ទៀត​កាល​ពីម្សិលមិញ​។ លោក​បានមាន​ប្រសាសន៍​ថា “សហជីព​ខ្ញុំ​មិន​ធ្វើ​យុទ្ធ​នា​ការ​ទាម​ទារ​​លុយ​៥០​ដុល្លារនេះ​ទេ​ ហើយ​​យើង​មិន​បាន​ញុះ​ញង់​ឲ្យ​កម្ម​ករ​​ធ្វើ​កូដ​កម្ម​​ឡើយ​​ ពីព្រោះ​កម្មករ​ធ្វើ​កូដ​កម្ម​ដោយ​ខ្លួន​​ឯង​”។

នៅ​ឯ​តំបន់​សេដ្ឋកិច្ច​ពិសេស​តាយ​សេង​ដែល​​រងផល​ប៉ះពាល់ដោយ​សារ​ការ​ធ្វើ​កូដ​កម្ម​ក្នុង​រយៈ​ពេល​ពីរ​បី​ថ្ងៃ​មក​នេះ លោក​ ម៉ៅ​ កុសល ប្រធាន​រដ្ឋ​បាល​បាន​មាន​ប្រសាសន៍​ថា លោក​មិន​ឃើញមាន​ដំណោះ​ស្រាយទេ​កម្មករ និងរោង​ចក្រ​មិន​បាន​ចរចា​គ្នា​ឡើយ​នៅ​ពេល​នេះ​​។

លោក​បាននិយាយ​ថា “ឥឡូវ​នេះ​កម្មករ​​និង​រោង​ចក្រ​នៅ​ឆ្ងាយ​ពីគ្នា​។ កម្មករ​ទាម​ទារ​ប្រាក់​៥០​ដុល្លារ​ ហើយ​រោង​ចក្រ​បដិសេធ​”។ ដោយសារ​មានការ​ភ័យ​ខ្លាច​និង​​ការ​​មិន​សប្បាយ​ចិត្ត​ ក្រុង​បាវិត​មានភាព​ស្ងប់​ស្ងាត់​កាល​ពីម្សិលមិញ។ បន្ទប់​ជួល​តូច​ៗ​ធ្វើ​ពី​ស័ង្កសី​ចាក់​សោ​ចោល​គ្មាន​មនុស្ស​​នៅ​ទេ​ ដោយសារ​កម្មករ​ជាច្រើន​ចេញ​ពី​ក្រុង។ កម្ម​ករ​ជា​ច្រើន​​បាន​ឆ្លៀត​ឱកាស​ធ្វើ​ដំណើរ​ទៅ​ផ្ទះ​នៅពេល​បិទរោង​ចក្រ​។

លោក ព្រាប​ រតនៈគឺជា​កម្មករ​ម្នាក់​ក្នុង​ចំណោម​កម្ម​ករ​ពីរបីនាក់​ដែល​បាន​ស្នាក់​នៅ​បន្ទប់​ជួល​នៅ​ផ្ទាល់​ដី​របស់​គាត់​​។ គាត់​បាន​និយាយ​ថា គាត់​បាន​ចូល​រួម​ធ្វើ​​កូដកម្ម​ ប៉ុន្តែ ​ត្រូវ​មានការ​បញ្ចុះ​បញ្ជូល​ខ្លះៗ​។

លោក​ រតនៈ ដែល​ផលិត​សម្លៀក​បំពាក់​កីឡា​ឲ្យក្រុមហ៊ុន​ Adidas  នៅ​រោង​ចក្រ​អេឡៃ​ នៅតំបន់សេដ្ឋកិច្ច​ពិសេស​ម៉ាន់ហាតាន់​ បាន​ទទួល​ស្គាល់​ថា វា​មិន​ត្រឹម​ត្រូវ​ទេ​ដែល​កម្មករ ​ទាម​ទារ​ប្រាក់​ឧបត្ថម្ភ​៥០​ដុល្លារ​ពីរោង​ចក្រ​ដែល​គេ​មិន​បានសន្យា​​ផ្តល់​ឲ្យ​។ គាត់​បាន​និយាយ​ថា “ខ្ញុំ​មិន​ចង់​ចូល​រួម​​ធ្វើ​កូដកម្ម​ទេ ប៉ុន្តែ កម្មករ​ភាគ​ច្រើន​បាន​ចូល​រួម​ ដូច្នេះ​​ខ្ញុំ​ក៏បាន​ចូល​រួម​​ដែរ​ទៅ​”។

គាត់​បាន​និយាយ​ថា កូដករ​មួយច​ំនួន​បាន​​គប់​ដុំ​ថ្ម​ដាក់​រោង​ចក្រ​ដើម្បី​ឲ្យ​កម្មករ​ផ្សេង​ទៀត​​ចេញ​មក​​​ក្រៅ​ ប៉ុន្តែ បាន​បដិសេធ​ថា ខ្លួន​គាត់​មិន​បានធ្វើ​ដូច្នេះ​ទេ។ លោក​ រតនៈ​ បាន​​និយាយ​ថា តាម​ពិត​គាត់​គួរតែ​ត្រឡប់​ទៅ​ធ្វើ​ការ​វិញ​។

គាត់​បាន​និយាយបន្ថែម​​​ទៀត​​​​ថា “ខ្ញុំ​ចង់​ត្រឡប់​ទៅ​ធ្វើ​​ការ​វិញ​ ប៉ុន្តែ ខ្ញុំ​មិន​អាច​ធ្វើ​បាន​ទេ​ ពី​ព្រោះ​ប្រសិន​បើ​យើង​​ត្រឡប់​ទៅ​ធ្វើ​ការ​វិញ​ ​កម្មករ​​ផ្សេងទៀត​នឹង​គប់​ដុំ​ថ្ម​ចូល​ទៅ​ក្នុង​រោង​ចក្រ​”។

ប៉ុន្តែ លោក​ រតនៈ នឹង​កម្មករ​ផ្សេង​ទៀត​សុទ្ធ​តែ​បាន​​និយាយ​ថា ពួកគេ​មិន​ឃើញ​មាន​​សញ្ញា​ណា​មួយ​បង្ហាញ​ថា មាន​​សហជីព​ញុះ​ញង់​ឲ្យ​ធ្វើ​កូដកម្ម​នោះ​ទេ​។

​កញ្ញា ធឿន ដែល​ទទួល​បាន​ប្រាក់​ខែ​១៥៤​ដុល្លារ​រួម​ទាំង​ការ​ងារ​​ថែម​ម៉ោង​ដើម្បី​​ផលិត​​ស្បែក​ជើង​កីឡា​ឲ្យក្រុម​ហ៊ុន Asics  នៅ​រោង​ចក្រ​កៅវេ នៅក្នុង​តំបន់​សេដ្ឋ​កិច្ច​ពិសេស​ម៉ាន់​ហាតាន់ បាន​និយាយ​ថា “ កម្មករ​​​ទាំង​នេះ​មិន​​បាន​បង្ខំ​ឲ្យ​កម្មករ​ផ្សេងទៀត​ធ្វើកូដកម្ម​ទេ។ កម្មករ​ ទាំង​នេះ​ធ្វើ​កូដកម្ម​ដោយ​ខ្លួន​ឯង។

កញ្ញា​ ធឿន​ បាន​និយាយ​ថា កូដករ​ដែល​គប់​ដុំថ្ម​បាន​ធ្វើ​ឲ្យ​រោង​ចក្រ​គាត់​បិទ​ទ្វារកាល​ពីថ្ងៃ​ព្រហស្បតិ៍​ ប៉ុន្តែ គាត់​មិន​បាន​ចូល​រួម   ​ជា​មួយ​ពួកគេ​ទេ​ ពីព្រោះគាត់​គិតថា ម្ចាស់​រោង​ចក្រ​នៅពេល​ដែល​ពួកគេ​និយាយ​ពួក​គេ​មិន​ចុះ​ចាញ់​ និង​មិន​​បើក​ប្រាក់​​៥០​ដុល្លារ​ឲ្យ​ពួក​យើង​ទេ​។ កញ្ញា ធឿន​ បាន​និយាយថា គាត់​​នឹង​ធ្វើ​​កូដ ​កម្ម​​ប្រសិន​បើ​រោង​ចក្រ​មិន​បើក​ប្រាក​់​ឲ្យ​គាត់​សម្រាប់​ថ្ងៃ​ដែល​រោង​ចក្រ​បិទ​ទ្វារ​នោះ​។

លោក​ ឡារី កៅ បាន​និយាយ​ថា ម្ចាស់​រោង​​ចក្រ​មាន​គម្រោងធ្វើ​បែបនេះ​។ នៅ​តំបន់​សេដ្ឋ​កិច្ច​ពិសេស​តាយ​សេង​ លោក​ កុសល​ បានិយាយ​ថា រោង​ចក្រ​មិន​ទាន់​បាន​​សម្រេច​នៅ​ឡើយ​ទេ​។កញ្ញា ធឿន បាន​អះអាង​ថា “ រោង​ចក្រ​បិទ​ទ្វារ​ដូច្នេះ​រោង​ចក្រ​ត្រូវ​តែ​បើក​លុយ​”៕​​គឹមហឿន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស