ជនជាតិតៃវ៉ាន់ប្រាំមួយនាក់ ដែលប្រាំនាក់នៅមិនទាន់ចាប់ខ្លួនបាននៅឡើយកាលពីម្សិលមិញត្រូវបានផ្តន្ទាទោសឲ្យជាប់ពន្ធនាគាររយៈពេល១០ឆ្នាំ ពីបទជួញដូរជនជាតិខ្មែរចំនួន៧៤នាក់ទៅធ្វើការក្រោមស្ថានភាពដូចទាសករនៅលើទូកនេសាទក្នុងសមុទ្រនៅអាហ្វ្រិក។
លោក កោ វណ្ឌី ចៅក្រមសាលាដំបូងរាជធានីភ្នំពេញបានរកឃើញពិរុទ្ធភាពរបស់ជនទាំងប្រាំមួយនាក់នេះពីបទជួញដូរមនុស្សនិងបានបង្គាប់ឲ្យពួកគេបង់ប្រាក់ពី១.៨០០ដុល្លារទៅ១៥.០០០ដុល្លារជាការសងជំងឺចិត្តនិងការខូចខាតដល់ជនរងគ្រោះម្នាក់ៗ។
ឈ្មោះ លីន លីចេន អាយុ៥៤ឆ្នាំ ជាម្ចាស់ក្រុមហ៊ុននេសាទអន្តរជាតិដែលពេលនេះសាបសូន្យទៅហើយ ដែលជាចុងចោទតែម្នាក់គត់មានវត្តមាននៅឯសវនាការជំនុំជម្រះ ត្រូវបាននាំខ្លួនទៅកាន់ពន្ធនាគារ។គេមិនទាន់ដឹងអំពី ទីកន្លែងលាក់ខ្លួនរបស់អ្នកសមគំនិតប្រាំនាក់ឈ្មោះ ហុង ជុនហ្វា ស៊ា ហ៊ីស៊ូ លូ ទៀនតេ ចេន ជុននុំ និង វូ ហ៊្វុតសាង នៅឡើយទេ។
លោកវង់រដ្ឋាមេធាវីការពាររបស់អ្នកស្រី លីចេន បានមានប្រសាសន៍ថា កូនក្តីរបស់លោកនឹងប្តឹងឧទ្ធរណ៍ការផ្តន្ទាទោសនេះ។ លោកបានមានប្រសាសន៍បន្ថែមទៀតថា ប្រាក់សំណង គឺប្រាក់ចំនួន១០០.០០០ដុល្លារ ដែលក្រុមហ៊ុន Giant Ocean បង់ជាប្រាក់ធានា នៅពេលខ្លួនបានចុះបញ្ជីនៅក្រសួងការងារក្នុងឆ្នាំ២០០៩។
លោក រដ្ឋា បានមានប្រសាសន៍ថា “តុលាការអាចទាមទារប្រាក់ពីក្រសួងការងារពេលនេះ ដែលពួកគេបានធ្វើសេចក្តីសម្រេច”។
លោក ហ៊ុយ ពេជ្រសុវណ្ណ មន្ត្រីទទួលបន្ទុកកម្មវិធីចំណាកស្រុកនៅមជ្ឈមណ្ឌលអប់រំច្បាប់សហគមន៍ ដែលប៉ាន់ប្រមាណថា មានជនជាតិខ្មែរជាង១.០០០នាក់ត្រូវបានជួញដូរដោយក្រុមហ៊ុន Giant Ocean មុនក្រសួងការងារបិទក្រុមហ៊ុននេះក្នុងឆ្នាំ២០១២ បានមានប្រសាសន៍ថា សាលក្រមនឹងជាដំណាក់កាលដំបូងវិជ្ជមានមួយ។
លោក ពេជ្រសុវណ្ណ បានឲ្យដឹងថា “នៅមានបញ្ហាមួយចំនួន។ ដំបូង តើជនរងគ្រោះនឹងទទួលសំណងរបស់ខ្លួនយ៉ាងម៉េច?។ ក្នុងនោះដែរ មនុស្សជាច្រើនធ្វើការនៅក្នុងក្រុមហ៊ុន ប៉ុន្តែមានតែម្នាក់ប៉ុណ្ណោះត្រូវបានចាប់ខ្លួន”។ លោកបានសួរថា “ តើអ្នកផ្សេងទៀតនៅឯណា ហើយពួកគេកំពុងធ្វើអ្វី?”។
លោក ពេជ្រសុវណ្ណ ក៏បានមានប្រសាសន៍ផងដែរថា មជ្ឈមណ្ឌលអប់រំច្បាប់សហគមន៍ជឿថា នៅមានជនជាតិខ្មែររាប់រយនាក់ទៀតជាប់នៅលើទូកនៅកន្លែងផ្សេងទៀត មិនអាចរកផ្លូវមកកាន់ស្រុកកំណើតរបស់ខ្លួនបាន បន្ទាប់ពីត្រូវបានក្រុមហ៊ុន Giant Ocean បោកប្រាស់។
ជនរងគ្រោះជាង៥០នាក់បានបង្ហាញមុខនៅតុលាការកាលពីម្សិលមិញ។ បន្ទាប់ពីសាលក្រមត្រូវបានសម្រេច ពួកគេបានរៀបរាប់អំពីការបោកប្រាស់ ការជាប់បំណុល និងស្ថានភាពការងារឥតមេត្តា។
មនុស្សភាគច្រើនត្រូវបានបញ្ចុះបញ្ចូលដោយសន្យាផ្តល់ប្រាក់ឈ្នួលយ៉ាងតិច២៥០ដុល្លារក្នុងមួយខែ សម្រាប់ការងារនៅលើទូកនេសាទនៅក្នុងប្រទេសជប៉ុន និងក្នុងប្រទេសសិង្ហបុរី។
ឈ្មោះ ហុង គឹមសាន អាយុ២៨ឆ្នាំ បានមានប្រសាសន៍ថា បន្ទាប់ពីយល់ព្រមទៅធ្វើការនៅលើទូកនេសាទរបស់ជប៉ុនមួយគ្រឿងគាត់ត្រូវបានបញ្ជូនទៅអឺរ៉ុប ហើយបន្ទាប់មកទៅអាហ្វ្រិក ជាទីដែលគាត់បានធ្វើការរយៈពេលពី១៤ម៉ោងដល់១៨ម៉ោងមួយថ្ងៃនៅលើទូកនេសាទ និងត្រូវបានគេនិយាយប្រាប់ថា ប្រាក់ខែរបស់គាត់ត្រូវបានផ្ញើមកផ្ទះឲ្យគ្រួសាររបស់គាត់ហើយ។ គឹមសាន បានមានប្រសាសន៍ថា “ខ្ញុំត្រូវបានបង្ខំឲ្យធ្វើការ និងគំរាមប្រើអំពើហិង្សា។នៅពេលខ្ញុំរត់គេចខ្លួន ខ្ញុំបានដឹងថា គ្មានប្រាក់ឈ្នួលណាត្រូវបានផ្ញើមកឲ្យគ្រួសាររបស់ខ្ញុំឡើយ”៕ ប៊ុននី