28 C
Phnom Penh

​អ្នក​ភូមិ​ធ្វើ​ការ​តវ៉ា​បន្ទាប់ពី​ក្រុម​ហ៊ុន​ បូម​ខ្សាច់​លុប​ដី​ស្រែ​របស់ពួក​​គាត់​

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ប្រហែល​៣០នាក់​ក្នុង​ខណ្ឌ​មាន​ជ័យ​រាជធានីភ្នំពេញ​ បាន​ធ្វើការ​តវ៉ា​កាល​ពីព្រឹក​​ម្សិលមិញប្រឆាំង​ឧកញ៉ា សុខ​ គង់ ដែល​ពួកគាត់​ចោទ​ប្រកាន់​ថាបាន​​បូម​ខ្សាច់​លុប​​ដីស្រែនិង​ស្រះ​ចិញ្ចឹម​ត្រី​របស់​ពួក​គាត់​។

អ្នក​ភូមិ​មក​ពីខណ្ឌ​មាន​ជ័យ​តវ៉ា​ប្រឆាំង​នឹង​ឧកញ៉ា​ សុខ គង់ បន្ទាប់​ពីក្រុម​ហ៊ុន​នេះបា​ន​បូម​ខ្សាច់​លុប​ដី​ស្រែ​ដែល​ពួក​គាត់ កាល​ពីម្សិលមិញ​។ ស៊ីវ ចាន់ណា
អ្នក​ភូមិ​មក​ពីខណ្ឌ​មាន​ជ័យ​តវ៉ា​ប្រឆាំង​នឹង​ឧកញ៉ា​ សុខ គង់ បន្ទាប់​ពីក្រុម​ហ៊ុន​នេះបា​ន​បូម​ខ្សាច់​លុប​ដី​ស្រែ​ដែល​ពួក​គាត់ កាល​ពីម្សិលមិញ​។ ស៊ីវ ចាន់ណា

អ្នក​ភូមិ​១៤​គ្រួសារ​ដែល​បានកាន់​កាប់​ដី​ទំហំ​២១​ហិកតា​ក្នុងសង្កាត់​ព្រែក​ប្រានោះ​បាន​ជាប់​ពាក់​ព័​ន្ធ​ក្នុង​វិវាទ​ដី​ធ្លី​រយៈពេល​ជាច្រើន​ឆ្នាំ​មក​ហើយ​​ជាមួយ​ក្រុម​ហ៊ុន​ សុខ គង់ អាហរ័ណ ​នី​ហរ័ណ ​ដែល​ពួកគាត់​លើក​ឡើង​ថា ទទួល​បាន​ប័ណ្ណ​កម្ម​សិទ្ធិ​ដី​ដោយ​ខុស​ច្បាប់​ដែល​ពួក​គាត់​បាន​កាន់​កាប់​ជាង​មួយ​ទស​វត្សរ៍​មក​​ហើយ​។

នៅឯ​ការ​តវ៉ា​នោះ​ ក្រុម​អ្នក​ភូមិបាន​ដុត​កង់​ឡាន​ និងស្រែក​ចោទ​ប្រកាន់​ក្រុម​ហ៊ុន​នេះ​ ដែល​បាន​ប្រកាសអំពី​​ផែន​ការ​គម្រោង​អភិ​វឌ្ឍន៍​ទ្រង់​ទ្រាយ​ធំ​ដោយការ​សាង​សង់​ផ្ទះ​ល្វែង​ ភូមិ​គ្រឹះ និង​ផ្សារ​។

អ្នក​ស្រី​ លន ពិសី អាយុ​៣៣​ឆ្នាំ​បាន​និយាយ​​ថា “​យើង​តវ៉ា​ប្រឆាំង​ក្រុមហ៊ុន​ សុខ គង់ ដែល​បាន​បូម​​ខ្សាច់​ដោយ​​សម្ងាត់​លុប​ដី​ស្រែ​របស់​យើង​ ពី​ព្រោះ​ពួកគេ​ចង់​កាន់​កាប់​ដី​​របស់​យើង​”។

យោង​តាម​អ្នកស្រី ពិសី បាន​ឲ្យដឹង​ថា អ្នក​ស្រី​ និង​អ្នក​ភូមិ១៣​គ្រួសារ​ទៀត​បាន​ទិញ​ដី​ទំហំ​ប្រហែល​២១​ហិកតា​នៅក្នុង​តំបន់​នេះ​ពី​ម្ចាស់​ដី​ម្នាក់​ដែល​បាន​រស់​នៅ​ទី​នោះ​ចាប់​តាំង​ពី​ឆ្នាំ​១៩៨៣មក​ម៉្លេះ។ ប៉ុន្តែ កាល​ពី​ឆ្នាំ​២០១០​រដ្ឋាភិបាល​បាន​ផ្តល់​​ប័ណ្ណ​កម្ម​សិទ្ធិ​ដីនេះដល់​ក្រុម​ហ៊ុន សុខ គង់​ ដែល​ត្រួត​សីុ​គ្នា​នឹង​ដី​របស់ពួក​គាត់​។

អ្នកស្រី​បាន​និយាយ​ថា “ក្រុម​ហ៊ុន​បាន​​ឃុប​​ឃិត​ជាមួយអាជ្ញាធរធ្វើប័ណ្ណ​កម្ម​សិទ្ធិ​ដី ​​ជាន់​លើ់​ដីរបស់​យើង​ ហើយ​បន្ទាប់​មក​​បាន​ចាប់​ផ្តើម​​បូម​ខ្សាច់​លុបនៅ​មុន​ការ​បោះ​​ឆ្នោត​ជាតិ​។ ពាក្យ​បណ្តឹង​ត្រូវ​បាន​ប្តឹង​ទៅ​សាលា​ដំបូង​រាជ​ធានី​ ក្រសួង​មហាផ្ទៃ​ និង​ក្រសួង​រៀប​ចំ​ដែន​ដី​ ប៉ុន្តែ មិន​មាន​ដំណោះស្រាយ​ទេ​។ អ្នក​ភូមិ​មួយ​ចំនួន​បាន​លើក​ឡើង​ថា ពួ​ក​គាត់​ពេញ​ចិត្ត​នឹ​ង​ចាក​ចេញ​ប្រសិន​បើ​លោក​ ឧកញ៉ាផ្តល់​សំណង​សមរម្យ​នោះ​។

ស៊ុន សុគន្ធី អាយុ​៤៧​ឆ្នាំ​បាន​និយាយ​ថា “យើង​ចង់​ឲ្យ​ក្រុមហ៊ុន​ផ្តល់​សំណង​សមរម្យ​ដល់​ពួកយើង​ ប៉ុន្តែ ប្រសិន​បើ​ក្រុម​ហ៊ុន​មិន​ដោះស្រាយ​ជូន​ពួក​​យើង​ទេ​នោះ​យើង​នឹង​បន្ត​ធ្វើការ​តវ៉ា​ទៀត​ ហើយ​​យើង​នឹង​លះបង់​អាយុ​ជីវិត​ដើម្បី​បាន​រស់​នៅ​លើ​ដី​នេះ​។ សូម​សម្តេច​ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត​ ប៊ុន រ៉ានី ហ៊ុន សែន​ ជួយ​អន្តរា​គមន៍​ក្នុង​​បញ្ហា​របស់​ពួក​យើង​ផង​”។

ទាំង​លោក​ សុខ គង់ និង​តំណាង​ក្រុម​ហ៊ុន​របស់​លោក​មិន​អាច​ទាក់​ទង​បាន​ទេ​កាល​ពី​ម្សិលមិញ​ ប៉ុន្តែ លោក​ គួច ចំរើន​ អភិ​បាល​​ខណ្ឌ​មាន​ជ័យ​បាន​ចាត់​ទុក​ការ​អះ​អាង​របស់​អ្នក​ភូមិ​ថា​ គ្មាន​មូល​ដ្ឋាន​។ លោកបានមាន​ប្រសាសន៍​ថា “បើ​តាម​ឯកសារ​ ដី​នេះ​​ជា​កម្ម​សិទ្ធិ​របស់​ក្រុម​​​ហ៊ុន​​​ សុខ គង់​ ពីព្រោះ​ពួកគេ​មាន​ប័ណ្ណកម្មសិទ្ធិ​”៕​សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស