35 C
Phnom Penh

សព​​​បុរស​​​​​​ចេះ​​​អំពើ​​​អាប​​​ឆ្មប់​​​ដែល​​​អ្នក​​​ភូមិ​ព្រួត​​​​​​​​វាយ​​​រហូត​​​ដល់​​​ស្លាប់​​​​​​ត្រូវ​​​បូជា​​​

ដោយ ឌឹ ខេមបូឌា ដេលី

បទវិភាគ

បុរស​​​ម្នាក់​​​​​​ ដែល​​​ត្រូវ​​​បាន​​​អ្នក​​​ភូមិ​​​ប្រមាណ​​​​​​៦០០​​​នាក់​​​​​​ព្រួត​​​​​​វាយ​​​រហូត​​​ដល់​​​ស្លាប់​​​​​​ ដោយ​​​សារ​​​ពួក​​​គេ​​​ចោទ​​​ប្រកាន់​​​ថា បុរស​​​​​​រង​​​គ្រោះ​​​​​​ចេះ​​​អំពើ​​​អាប​​​ឆ្មប់​​​នោះ​​​ត្រូវ​​​បាន​​​​​​បូជា​​​កាល​​​ពី​​​ម្សិលមិញ​​​​​​ នៅ​​​ផ្ទះ​​​ឪពុក​​​ម្ដាយ​​​​​​ជន​​​រងគ្រោះ​​​​​​ក្នុង​​​ខេត្ត​​​តាកែវ​​​។​​​

លោក​​​ ឯម សាវុធ​​​ នាយ​​​ប៉ុស្ដិ៍​​​នគរបាល​​​​​​ឃុំ​​​ក្រាំង​​​លាវ​​​ បាន​​​មាន​​​ប្រសាសន៍​​​ថា មនុស្ស​​​ជា​​​ច្រើន​​​​​​មក​​​ពី​​​​​​តំបន់​​​ជុំ​​​វិញ​​​នោះ​​​​​​បាន​​​​​​​​​មក​​​កាន់​​​ភូមិ​​​ដើម​​​ស្វាយ​​​ដើម្បី​​​ចូល​​​រួម​​​​​​កាន់​​​មរណ​​​ទុក្ខរបស់​​​លោក​​​ ពៅ សុវណ្ណ អាយុ​​​៣៦​​​ឆ្នាំ​​​ ជា​​​គ្រូ​​​ឱសថ​​​បុរាណ​​​ដែល​​​ត្រូវ​ក្រុម​​​​​អ្នក​​​ភូមិព្រួត​​​​​​​​​​​​វាយ​​​សម្លាប់​​​យ៉ាង​​​ព្រៃ​​​ផ្សៃ​​​​​​បំផុត​​​នៅ​​​ក្នុង​​​ស្រុក​​​បាទី​​​ កាល​​​ពី​​​ថ្ងៃ​​​អាទិត្យ​​​។

លោក​​​មាន​​​ប្រសាសន៍​​​ថា “មាន​​​ភ្ញៀវ​​​ជា​​​ច្រើន​​​ ដែល​​​មក​​​ចូល​​​រួម​​​​​​ពិធី​​​បុណ្យ​​​សព​​​ជន​​​រង​​​គ្រោះ​​​​​​ដូច​​​ពិធី​​​បុណ្យ​​​សព​​​ផ្សេង​​​ៗ​​​ទៀត​​​ដែរ​​​។​​​ ភ្ញៀវ​​​មួយ​​​ចំនួន​​​តូច​​​មក​​​ពី​​​ភូមិ​​​ព្រៃ​​​​​​ជន្លួញ​​​ ហើយ​​​​​​អ្នក​​​ផ្សេង​​​ទៀត​​​មក​​​ពី​​​ភូមិ​​​ផ្សេងៗ​​​គ្នា​​​​​​”។

ទោះ​​​បី​​​ជា​​​​​​មាន​​​មនុស្ស​​​យ៉ាង​​​ច្រើន​​​ពាក់​​​ព័ន្ធ​​​នៅ​​​​​​ក្នុង​​​​​​​​​សកម្មភាព​​​វាយ​​​ដំ និង​​​​​​គប់​​​​​​ដុំ​​​ថ្ម​​​ដាក់​​​លោក​​​​​​ ពៅ សុវណ្ណ រហូត​​​ដល់ស្លាប់​​​​​​ក្ដី​​​ ក៏​​​លោក​​​​​​ ឯម សាវុធ មាន​​​ប្រសាសន៍​​​ថា  អ្នកភូមិ​​​ជា​​​ច្រើន​​​​​​ដឹង​​​ថា ជន​​​រងគ្រោះ​​​​​​​​​គ្មាន​​​អ្វី​​​ពាក់ព័ន្ធ​​​នឹង​​​ការ​​​ស្លាប់​​​មនុស្ស​​​ប៉ុន្មាន​​​អ្នក​​​ដែល​​​គេ​​​ចោទ​​​​​​ថា បុរស​​​រងគ្រោះ​​​​​​បាន​​​ធ្វើ​​​អំពើ​​​​​​អាប​​​ធ្មប់​​​​​​ដាក់​​​ក្នុង​​​រយៈ​​​ពេល​​​ពី​​​រ​​​ឆ្នាំ​​​កន្លង​​​មក​​​នេះ​​​ទេ​​​។

លោក​​​មាន​​​ប្រសាសន៍​​​ទៀត​​​ថា “ខ្ញុំ​​​​​​បាន​​​ចូល​​​រួម​​​ពិធី​​​បុណ្យ​​​សព​​​​​​នេះ​​​ដែរ ហើយ​​​ឮ​​​ភ្ញៀវ​​​​​​ដែល​​​មក​​​ពី​​​ភូមិ​​​ផ្សេង​​​ៗ​​​និយាយ​​​គ្នា​​​ថា ជន​​​រង​​​គ្រោះ​​​មិន​​​បាន​​​ធ្វើ​​​​​​អ្វី​​​ខុស​​​ទេ​​​ ហើយ​​​គ្មាន​​​​​​​​​ហេតុ​​​ផល​​​ដែល​​​ត្រូវ​​​សម្លាប់​​​គាត់​​​ឡើយ​​​”។

លោក​​​ ពៅ សុវណ្ណ​​​ ត្រូវ​​​បាន​​​អ្នក​​​ភូមិ​​​ព្រួត​​​វាយ​​​​​​នឹង​​​​​​ដំបង​​​ និង​​​​​​គប់​​​​​​ដុំ​​​ថ្ម​​​​​​អស់​​​រយៈ​​​ពេល​​​ប្រាំ​​​មួយ​​​ម៉ោង​​​​​​ក្រោយ​​​ពី​​​​​​ប្រធាន​​​ភូមិ​​​​​​ព្រៃ​​​ជន្លួញ​​​​​​និង​​​​​​ស្ត្រី​​​​​​វ័យ​​​៥៤​​​ឆ្នាំ​​​ម្នាក់​​​បាន​​​ស្លាប់​​​ក្នុង​​​ពេល​​​​​​ថ្មីៗ​​​នេះ​​​​​​ ជា​​​ហេតុ​​​​​​ធ្វើ​​​ឲ្យ​​​​​​អ្នក​​​ភូមិ​​​គិត​​​ថា អ្នក​​​​​​ទាំង​​​ពីរ​​​ស្លាប់​​​​​​ដោយ​​​សារ​​​បុរស​​​​​​រូប​​​នេះ​​​​​​។

លោក​​​ ទូច​​​ សឿន​​​ មេភូមិ​​​ក្រាំង​​​លាវ​​​ បាន​​​​​​មាន​​​ប្រសាសន៍​​​ថា មិត្តភក្ភិ និង​​​​​​សាច់​​​ញាតិ​​​ស្ត្រី​​​រងគ្រោះ​​​​​​ពោល​​​គឺ​​​​​​​​​ប្រទះ​​​ឃើញ​​​សាក​​​សព​​​ មិន​​​បាន​​​​​​រក​​​ឃើញ​​​​​​មូល​​​ហេតុ​​​ច្បាស់​​​លាស់​​​នៃ​​​ការ​​​​​​ស្លាប់​​​នោះ​​​ទេ ហើយ​​​គិត​​​ថា គាត់​​​ស្លាប់​​​​​​ដោយ​​​សារ​​​អំពើ​​​អាប​​​ធ្មប់​​​ បន្ទាប់ពី​​​ឃើញ​​​ក្អែប​​​នៅ​​​ជុំ​​​វិញ​​​ក្បាល​​​ស្ដ្រី​​​រងគ្រោះ​​​។​​​

លោក​​​បាន​​​មាន​​​ប្រសាសន៍​​​ថា “ក្រុម​​​គ្រួសារ​​​​​​សាច់​​​ញាតិ​​​ និង​​​​​​អ្នក​​​ភូមិ​​​​​​មើល​​​ឃើញ​​​ក្អែប​​​ធំ​​​ចំនួន​​​បួន​​​ក្បាល​​​​​​នៅ​​​ជិត​​​ក្បាលស្ត្រី​​​រងគ្រោះ​​​​​​។ នៅពេល​​​គ្រួសារ​​​​​​​​​ស្ត្រី​​​រងគ្រោះ​​​ទៅ​​​​​​វាយ​​​ក្អែប​​​ទាំង​​​នោះ​​ [ក្អែប​​​ទាំង​​​នោះ] ​​​ក៏​​​​​​រលាយ​​​​​​បាត់​​​”។

ក្រោយ​​​មក​​​អ្នក​​​ភូមិ​​​ទាំង​​​នេះ​​​បាន​​​​​​លើក​​​គ្នា​​​​​​ទៅ​​​កាន់​​​ផ្ទះ​​​របស់​​​​​​លោក​​​ ពៅ សុវណ្ណ ហើយ​​​នៅ​​​ទីនោះ​​​ ពួក​​​គេ​​​បាន​​​រក​​​ឃើញ​​​អ្វី​​​ដែល​​​ខ្លួន​​​គិត​​​ថា ជាភ័ស្ដុតាង​​​ច្បាស់​​​ក្រឡែត​​​​​​បង្ហាញ​​​​​​ថា ពិត​​​ជា​​​មាន​​​អំពើ​​​អាប​​​ធ្មប់​​​មែន​​​។

លោក​​​ ទូច សឿន បាន​​​មាន​​​ប្រសាសន៍​​​ថា “អ្នក​​​ភូមិ​​​ នគរបាល​​​ និង​​​ខ្ញុំ​​​បាន​​​​​​រក​​​ឃើញ​​​​​​ភ័ស្ដុ​​​តាង​​​មួយ​​​ចំនួន​​​នៅ​​​ក្នុង​​​ផ្ទះ​​​​​​របស់​​​ជន​​​រង​​​គ្រោះ​​​ដូចជា​​​ អាសនៈ រូប​​​ថត​​​ជា​​​ច្រើន​​​ និង​​​ឈ្មោះ​​​ជា​​​ច្រើន​​​​​​​​​មាន​​​សរសេរ​​​​​​ថ្ងៃ​​​ខែ​​​ឆ្នាំ​​​កំណើត​​​នៅ​​​លើ​​​ខ្នង​​​ក្រដាស​​​ប្រក្រតិទិន​​​”។

លោក​​​ ទូច សឿន បាន​​​ពន្យល់​​​ថា ឈ្មោះ​​​ដែល​​​សរ​​​សេរ​​​​​​នៅ​​​លើ​​​ខ្នង​​​ក្រដាស​​​ប្រក្រតិ​​​ទិន​​​ទាំង​​​នោះ​​​រួម​​​មាន​​​ទាំង​​​ឈ្មោះ​​​​​​របស់​​​អ្នក​​​ភូមិ​​​ដែល​​​បាន​​​​​​ស្លាប់​​​​​​ដោយ​​​មិន​​​ដឹង​​​មូល​​​ហេតុ​​​ក្នុង​​​រយៈ​​​ពេល​​​ប៉ុន្មាន​​​ឆ្នាំ​​​កន្លង​​​​​​មក​​​នេះ​​​ផង​​​ដែរ៕ សុខុម​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស