លោក ប៉ែន ស៊ីម៉ន អគ្គនាយកនៃអគ្គនាយកដ្ឋានគយនិងរដ្ឋាករ របស់ក្រសួងហិរញ្ញវត្ថុ នឹងចូលនិវត្តន៍ក្នុងខែតុលា នេះបើយោងតាមរាជក្រឹត្យមួយឡាយព្រះហស្តលេខាដោយព្រះមហាក្សត្រ នរោត្តម សីហមុនី និងចេញប្រកាសកាលពីម្សិលមិញក្នុងបណ្ដាញព័ត៌មានក្នុងស្រុក។
ព្រះរាជក្រឹត្យចុះថ្ងៃទី៣ ខែមេសា បង្គាប់ឲ្យលោកនាយករដ្ឋមន្ត្រី ហ៊ុន សែន អនុវត្តតាមព្រះរាជក្រឹត្យនេះ។ ព្រះរាជក្រឹត្យនេះមានខ្លឹមសារថា “ដាក់ឯកឧត្តម ប៉ែន ស៊ីម៉ន ឋានន្តរស័ក្តិថ្នាក់លេខ៣ នៃក្របខណ្្ឌមន្ត្រីគ្រប់គ្រងរដ្ឋបាលនៅក្រសួងហិរញ្ញវត្ថុឲ្យចូលនិវត្តន៍ ចាប់ពីថ្ងៃទី១ ខែតុលា ឆ្នាំ២០១៤ នេះទៅ“។ “សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ត្រូវទទួលបន្ទុកអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្តលេខាតទៅ“។
លោក អ៊ុំ ដារា៉វុធ ប្រធានខុទ្ទកាល័យព្រះបរមរាជវាំង បានមានប្រសាសន៍ថា លោកមិនបានដឹងអំពីព្រះរាជក្រឹត្យនេះទេ។ លោកបានឲ្យដឹងថា “ខ្ញុំមិនដឹងទេ។ ប្រសិនបើរាជក្រឹត្យនេះត្រូវបានចេញ គាត់នឹងត្រូវចូលនិវត្តន៍“។
លោក ប៊ូ ប៊ុនណារ៉ា ប្រធានផ្នែកទំនាក់ទំនងសាធារណៈនៅអគ្គនាយកដ្ឋានគយនិងរដ្ឋាករនៃក្រសួងហិរញ្ញវត្ថុ ក៏បានលើកឡើងដែរថា លោកមិនបានដឹងអំពីព្រះរាជក្រឹត្យនេះទេ។ លោកបានឲ្យដឹងថា “ខ្ញុំមិនបានទទួលលិខិតណាមួយឡើយ ប៉ុន្តែគាត់នឹងចូលនិវត្តន៍ ប្រសិនបើអាយុរបស់គាត់ត្រូវចូលនិវត្តន៍ទៅតាមច្បាប់“។ លោក ស៊ីម៉ន មិនអាចទាក់ទងដើម្បីធ្វើអត្ថាធិប្បាយបានឡើយ៕ ប៊ុននី