លោក ហ៊ុយ សុខា នាយប៉ុស្តិ៍សង្កាត់តាខ្មៅ បានមានប្រសាសន៍ថា លី គឹមស្រ៊ុន អាយុ២៦ឆ្នាំបានសុំខ្ចីលុយ១០ដុល្លារពី ធី សំអាត អាយុ១៩ឆ្នាំ បន្ទាប់ពីអ្នកទាំងពីរបានផឹកទឹកត្នោតជូរជាមួយគ្នានៅពេលល្ងាចនៅផ្ទះជនរងគ្រោះក្នុងក្រុងតាខ្មៅ។
មុនពេលមានជម្លោះ ជនរងគ្រោះ និងជនសង្ស័យបានផឹកទឹកត្នោតជូរជាមួយគ្នា។ បន្ទាប់ពីពួកគេស្រវឹង គឹមស្រ៊ុន ដែលហៅក្រៅថា ជុក បានសុំខ្ចីលុយ១០ដុល្លារពីមិត្តភក្តិជិតស្និទ្ធរបស់ខ្លួន ប៉ុន្តែ ជនរងគ្រោះមិនព្រមឲ្យ។
លោក សុខា បានមានប្រសាសន៍ថា ដោយមានកំហឹង គឹមស្រ៊ុន ដែលគ្មានការងារធ្វើបានរត់ទៅផ្ទះរបស់ខ្លួនស្ថិតនៅចម្ងាយប្រហែល១០០ម៉ែត្រ ហើយបានយកកាំបិតត្រឡប់មកចាក់មិត្តភក្តិរបស់ខ្លួនដែលជាកម្មករសំណង់ រួចគេចខ្លួនបាត់។លោកបានបន្ថែមថា “ជនសង្ស័យបានយកកាំបិតចាក់ជនរងគ្រោះចំកញ្ចឹងក ធ្វើឲ្យរងរបួសធ្ងន់ធ្ងរ រួចជនសង្ស័យបានគេចខ្លួនបាត់“។ជនរងគ្រោះត្រូវបានបញ្ជូនមកមន្ទីរពេទ្យកាល់ម៉ែតក្នុងរាជធានីភ្នំពេញ ហើយបានស្លាប់ដោយសាររបួសធ្ងន់ធ្ងរកាលពីថ្ងៃអង្គារ៕ សារុន