យោងតាមសេចក្តីប្រកាសមួយដែលបានចេញផ្សាយកាលពីម្សិលមិញ បានឲ្យដឹងថា លោក អាត់ ធន់ បានផ្ទេរការងាររបស់លោកជាប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ( សីុខៅឌូ) ខណៈពេលពាក្យបណ្តឹង និងលក្ខ ខណ្ឌសុំនៅក្រៅឃុំរបស់លោកប៉ះពាល់ដល់តួនាទីជាមេដឹកនាំសហជីពការងារឯករាជ្យដ៏ធំបំផុតក្នុងប្រទេសកម្ពុជា។
លោក អាត់ ធន់ ដែលក៏ជាប្រធានសហភាពការងារកម្ពុជាជាសហជីពកម្មករដ៏ធំមួយត្រូវបានចោទប្រកាន់ពីបទញុះញង់ឲ្យមានការប្រើអំពើហិង្សាអំឡុងការតវ៉ាកាលពីថ្ងៃទី២០ខែកញ្ញានៅរោងចក្រកាត់ដេរ អេស អិល ក្នុងរាជធានីភ្នំពេញ ហើយសាលាដំបូងរាជធានីបានរឹតបន្តឹងទៅលើសកម្មភាពសហជីពរបស់លោកជាលក្ខខណ្ឌសុំនៅក្រៅឃុំ។
ហេតុដូច្នេះហើយ លោក អាត់ ធន់ បានផ្ទេរការទទួលខុសត្រូវរបស់លោកក្នុងនាមជាមេដឹកនាំសីុខៅឌូ ទៅលោក ឯក សុខភក្តី ជាអគ្គលេខាធិការ។
សេចក្តីប្រកាសដែលចុះហត្ថលេខាដោយលោក អាត់ ធន់ បានលើកឡើងថា “ចាប់ពីថ្ងៃនេះទៅលោក ឯក សុខភក្តី មានសិទ្ធិគ្រប់គ្រង និងចាត់ចែងការងារសហជីពទាំងអស់ ដូច្នេះខ្ញុំសូមឲ្យបុគ្គលិក និងសមាជិក និងស្ថាប័នពាក់ព័ន្ធទាំងអស់បន្តសហការចាប់ពីទទួលបានព័ត៌មាននេះទៅ“។
លោក ឯក សុខភក្តី បានមានប្រសាសន៍ថា លោកនឹងប្រឹងប្រែងឲ្យអស់ពីសមត្ថភាពនៅក្នុងកាលៈទេសៈនេះដើម្បីបំពេញតួនាទីថ្មីរបស់លោក។ លោក ឯក សុខភក្តី បានមានប្រសាសន៍ថា “លោក អាត់ ធន់ មានការងារច្រើនណាស់ត្រូវធ្វើនៅសហភាពការងារកម្ពុជា ហើយលោកក៏មានដីកាបង្គាប់ពីតុលាការហាមឃាត់រូបលោកមិនឲ្យធ្វើការជួបជុំគ្នាជាសាធារណៈផងដែរ ហេតុដូច្នោះហើយលោកបានផ្ទេរការងារមួយចំនួនទៀតឲ្យខ្ញុំធ្វើ ហើយខ្ញុំនឹងប្រឹងប្រែងឲ្យអស់ពីសមត្ថភាពដើម្បីរកយុត្តិធម៌ និងគាំទ្រដល់កម្មករ“៕សារុន